ವೇದವ್ಯಾಸರ ಶಿವಪುರಾಣಸಾರ: ನಾರದ ಬೋಧಿಸಿದ ಪಂಚಾಕ್ಷರೀ

ಈವಿಷಯ ತಿಳಿದ ದೇವೇಂದ್ರನು ನಾರದನ ಮೊರೆಹೋದ. ದೇವೇಂದ್ರನ ಕೋರಿಕೆ ಮೇರೆಗೆ ಹಿಮವಂತನ ಮನೆಗೆ ಬಂದ ನಾರದ, ‘ನಿನ್ನೆಲ್ಲಾ ಸಮಸ್ಯೆ ಪರಿಹಾರಕ್ಕೆ ಶಿವನನ್ನು ಸ್ಮರಿಸು’ ಎಂದು ಸಾಂತ್ವನ ಹೇಳಿದ. ನಾರದನನ್ನು ನೋಡಿ ಪಾರ್ವತಿಗೆ ದುಃಖ ಕಡಿಮೆ ಆದಂತಾಯಿತು. ನಾರದ, ‘ಎಲೈ ಗಿರಿಜೆ, ಸತ್ಯವಾದ ಮಾತನ್ನು ಹೇಳುತ್ತೇನೆ. ಅದರಂತೆ ನಡೆದರೆ ನಿನ್ನ ಇಷ್ಟಾರ್ಥವು ಸಿದ್ಧಿಸುವುದು. ಮಹಾದೇವನನ್ನು ನೀನು ಸೇವಿಸಿರುವೆ. ಆದರೆ ತಪಸ್ಸನ್ನು ಮಾಡಿ ಸೇವಿಸಲಿಲ್ಲ. ಸೌಂದರ್ಯಗರ್ವದಿಂದ ಶಿವನ ಸೇವೆ ಮಾಡಿದೆ. ಆ ಗರ್ವವನ್ನು ಶಿವನು ಮನ್ಮಥನ ದಹನಮಾಡಿ ನಾಶಮಾಡಿದ. ನಿನ್ನ ಸ್ವಾಮಿಯಾದ ಮಹೇಶ್ವರ ಮಹಾ ವಿರಕ್ತ, ಮಹಾ ಹಠಯೋಗಿ. ಅ ಶಿವನು ಭಕ್ತವತ್ಸಲ. ನೀನು ತಪಸ್ಸಿನಿಂದ ಅವನನ್ನು ಭಕ್ತಿಯಿಂದ ಆರಾಧಿಸು. ನೀನು ತಪಸ್ಸಿನಿಂದ ಪರಿಶುದ್ಧಳಾದರೆ ಶಿವ ನಿನ್ನ ಮದುವೆಯಾಗುತ್ತಾನೆ’ ಎಂದ. ಗಿರಿಜೆಗೆ ಸ್ವಲ್ಪ ಸಮಾಧಾನವಾಯಿತು. ಆಗ ಪಾರ್ವತಿ ‘ನಾರದಮುನಿ, ರುದ್ರನನ್ನಾಧರಿಸಲು ಮಂತ್ರವೊಂದನ್ನು ನನಗೆ ಉಪದೇಶಿಸು’ ಎಂದು ಪ್ರಾರ್ಥಿಸಿದಳು.

ಆಗ ನಾರದ ಶಿವಪಂಚಾಕ್ಷರೀ (ನಮಃ ಶಿವಾಯ) ಮಂತ್ರವನ್ನು ವಿಧಿವತ್ತಾಗಿ ಪಾರ್ವತಿಗೆ ಉಪದೇಶಿಸಿದ. ಶಿವಪಂಚಾಕ್ಷರೀ ಮಂತ್ರದ ಮಹತ್ವವನ್ನೂ ಹೇಳಿದ. ‘ಎಲೈ ಗಿರಿಜೆ, ಈ ಮಂತ್ರದ ಅದ್ಭುತವಾದ ಮಹಿಮೆಯನ್ನು ಹೇಳುವೆನು ಕೇಳು. ಇದನ್ನು ಕೇಳಿದ ಮಾತ್ರದಿಂದಲೇ ಶಿವ ಪ್ರಸನ್ನನಾಗುವನು. ಈ ಪಂಚಾಕ್ಷರೀಮಂತ್ರವು ಎಲ್ಲಾ ಮಂತ್ರಗಳಿಗೂ ಶ್ರೇಷ್ಠವಾದುದು. ಇದು ಇಷ್ಟಾರ್ಥಗಳನ್ನೂ ಭೋಗ-ಮೋಕ್ಷಗಳನ್ನೂ ಕೊಡುವುದು. ಈ ಮಂತ್ರವನ್ನು ವಿಧಿವತ್ತಾಗಿ ಜಪಿಸಿ ಶಂಕರನನ್ನು ಆರಾಧಿಸಿದರೆ ಪ್ರತ್ಯಕ್ಷನಾಗುವನು. ನೀನು ತಪೋನಿಯಮದಿಂದಿದ್ದು, ಶಂಕರನ ರೂಪವನ್ನು ಧ್ಯಾನಿಸುತ್ತಾ ಪಂಚಾಕ್ಷರೀಮಂತ್ರವನ್ನು ಜಪಿಸು. ಶಿವನು ಶೀಘ್ರದಲ್ಲಿಯೇ ಪ್ರತ್ಯಕ್ಷನಾಗುವನು. ನಿನ್ನೆಲ್ಲಾ ಇಷ್ಟಾರ್ಥಗಳು ಈಡೇರುವುವು. ಮಹಾಯೋಗಿಯಾದ ಶಿವನನ್ನು ತಪಸ್ಸಿನಿಂದ ಪಡೆಯಬಹುದೇ ಹೊರತು, ಯಾವುದೇ ಸೌಂದರ್ಯದ ಪ್ರದರ್ಶನದಿಂದ ಮತ್ತು ಬಲವಂತದಿಂದ ಅವನನ್ನು ಒಲಿಸಿಕೊಳ್ಳಲು ಸಾಧ್ಯವಿಲ್ಲ. ಯೋಗಗುರುವಾದ ಮಹಾಶಿವನನ್ನು ತಪಸ್ಸಿನಿಂದ ಒಲಿಸಿಕೊಂಡರೆ, ನಿನ್ನ ಎಲ್ಲಾ ಅಭೀಷ್ಠೆಯೂ ನೆರವೇರುವುದು’ ಎಂದು ಹೇಳಿದ ನಾರದ ಅಲ್ಲಿಂದ ಸ್ವರ್ಗಕ್ಕೆ ತೆರಳಿದ.

ನಾರದನ ಹಿತವಾದ ಮಾತು ಕೇಳಿ ಉಲ್ಲಸಿತಳಾದ ಪಾರ್ವತಿ, ಸಂತೋಷದಿಂದ ಹಿಗ್ಗಿದಳು. ನಾರದ ಉಪದೇಶಿಸಿದಂತೆ ಪಂಚಾಕ್ಷರೀಮಂತ್ರವನ್ನ ಜಪಿಸುತ್ತಾ ತಪಸ್ಸು ಮಾಡಲು ಹೊರಟಳು ಎಂಬಲ್ಲಿಗೆ ಪಾರ್ವತೀಖಂಡದ ಇಪ್ಪತ್ತೊಂದನೆಯ ಅಧ್ಯಾಯ ಮುಗಿಯುತ್ತದೆ.