ವೇದವ್ಯಾಸರ ಶಿವಪುರಾಣಸಾರ: ತವರಿನಲ್ಲಿ ಗಿರಿಜೆಗೆ ಭವ್ಯಸ್ವಾಗತ

ಪಾರ್ವತಿ ಬರುವ ರಾಜಮಾರ್ಗವನ್ನು ತಳಿರುತೋರಣಗಳಿಂದ ಅಲಂಕರಿಸಲಾಗಿತ್ತು. ಸುತ್ತಲ ಪರಿಸರವನ್ನು ಚಂದನಧೂಪ ಕಸ್ತೂರೀ ಮುಂತಾದ ಸುಗಂಧದ್ರವ್ಯಗಳಿಂದ ಸುವಾಸಿತವಾಗಿಸಲಾಗಿತ್ತು. ಇಂತಹ ರಾಜಮಾರ್ಗದಲ್ಲಿ ಮಂಗಳವಾದ ಪೂರ್ಣಕಲಶವನ್ನು ಹಿಡಿದು ಸುಮಂಗಳೆಯರು ನಿಂತಿದ್ದರೆ, ಊರಿನ ಘನವಿದ್ವಾಂಸರು, ಪುರೋಹಿತರು, ಗಣ್ಯ ನಾಗರಿಕರು, ಬ್ರಹ್ಮವಿತ್ತುಗಳಾದ ಮುನಿಗಳೆಲ್ಲರೂ ಮಹಾತಪಸ್ವಿನಿ ಪಾರ್ವತಿಯನ್ನು ಸ್ವಾಗತಿಸಲು ಕಾಯುತ್ತಿದ್ದರು. ಅರಮನೆಯ ರಾಜನರ್ತಕಿಯರು, ಆಸ್ಥಾನ ಸಂಗೀತಗಾರರು, ಕಲಾವಿದರೆಲ್ಲರೂ ರಾಜಮಾರ್ಗದ ಉದ್ದಕ್ಕೂ ನಿಂತು ತಮ್ಮ ವೃತ್ತಿನೈಪುಣ್ಯವನ್ನು ತೋರಿಸುತ್ತಿದ್ದರು. ಎಲ್ಲಾ ವರ್ಗದ ಜನರು ಪಾರ್ವತಿಯ ಗುಣಗಾನ ಮಾಡುತ್ತಿದ್ದರು. ಅನೇಕ ಜನ ವಿಧವಿಧವಾದ ವಾದ್ಯಗಳಿಂದ ಮಂಗಳಧ್ವನಿಯನ್ನು ಮಾಡುತ್ತಿದ್ದರು. ಗಿರಿಜೆ ನಗರ ಸಮೀಪಿಸುತ್ತಿದ್ದಂತೆ ಶಂಖ-ಜಾಗಟೆಯ ಧ್ವನಿ ಕಿವಿಗಡಚಿಕ್ಕುವಂತೆ ಮೊಳಗಿದವು.

ಗಿರಿಜೆ ನಗರವನ್ನು ಪ್ರವೇಶಿಸುತ್ತಿದ್ದಂತೆ ಅವಳತ್ತ ಓಡಿ ಬಂದ ಮೇನಾದೇವಿ ಮತ್ತು ಹಿಮವಂತ ಮಗಳನ್ನು ಬಿಗಿದಪ್ಪಿಕೊಂಡು ಸಂತೋಷದಿಂದ ಬೀಗಿದರು. ತನ್ನ ಎದುರುಗೊಳ್ಳಲು ಕಾದಿದ್ದಲ್ಲದೆ, ಹರ್ಷದಿಂದ ಓಡೋಡಿ ಬಂದು ಆಲಂಗಿಸಿದ ತಂದೆತಾಯಿಗಳ ಔದಾರ್ಯ ನೋಡಿ ಗಿರಿಜೆ ಮನಸ್ಸು ಭಾವಪರವಶದಿಂದ ಉಬ್ಬಿ ಹೋಯಿತು. ಮೇನಾದೇವಿ-ಹಿಮವಂತ ಗಿರಿಜೆಯ ಶಿರವನ್ನು ನೇವರಿಸುತ್ತಾ ಆಶೀರ್ವಾದ ಮಾಡಿದರು.

ಗಿರಿಜೆಯ ಬಳಿ ಬಂದ ಸಹೋದರರು ಮತ್ತವರ ಪತ್ನಿ-ಮಕ್ಕಳು, ಇತರೆ ಬಂಧು-ಮಿತ್ರರು ಸಹ ಪ್ರೀತಿಯಿಂದ ಅವಳನ್ನು ಆಲಂಗಿಸಿಕೊಂಡು, ‘ಎಲೈ ಗಿರಿಜೆ, ನೀನು ಕುಲವನ್ನು ಉದ್ಧರಿಸುವಂತಹ ಮಹಾಕಾರ್ಯವನ್ನು ಸಾಧಿಸಿದೆ. ಈ ನಿನ್ನ ಸದಾಚಾರದಿಂದ ನಾವೆಲ್ಲರೂ ಪುನೀತರಾದೆವು’ ಎಂದು ಹೊಗಳಿ ನಮಸ್ಕರಿಸಿದರು. ಚಂದನ ಮತ್ತು ಸುಗಂಧಿತ ಹೂವುಗಳಿಂದ ಅವಳನ್ನು ಅಲಂಕರಿಸಿ ಪೂಜಿಸಿದರು. ಈ ಸಮಯದಲ್ಲಿ ದೇವತೆಗಳು ಆಕಾಶದಲ್ಲಿ ವಿಮಾನದಲ್ಲಿ ನಿಂತು, ಗಿರಿಜೆಯ ಮೇಲೆ ಹೂವಿನ ಮಳೆಯನ್ನು ಸುರಿಸಿ, ಸ್ತುತಿಸಿದರು.

ನಂತರ ಅವರೆಲ್ಲಾ ಗಿರಿಜೆಯನ್ನು ಸುಂದರವಾದ ರಥದಲ್ಲಿ ಕುಳ್ಳಿರಿಸಿಕೊಂಡು ನಗರವನ್ನು ಪ್ರವೇಶಿಸಿದರು. ಪುರದ ಪ್ರಮುಖರು, ಪುರೋಹಿತರು, ಸಖಿಯರು, ಮುತ್ತೈದೆಯರೆಲ್ಲರೂ ಸೇರಿ ಗಿರಿಜೆಯನ್ನು ಬಹುಮರ್ಯಾದೆಯಿಂದ ಬರಮಾಡಿಕೊಂಡು ಅವಳ ಮನೆಗೆ ಕರೆದೊಯ್ದರು. ಸ್ತ್ರೀಯರು ದೃಷ್ಟಿಯನ್ನು ತೆಗೆದು ಸಾಂಪ್ರದಾಯಿಕ ಆರತಿಯನ್ನು ಎತ್ತಿದರು. ಯಶಸ್ವಿ ತಪಸ್ವಿನಿಯಾಗಿ ಪಾರ್ವತಿ ಮನೆಗೆ ಬಂದಿದ್ದರಿಂದ ತನ್ನ ಗೃಹಸ್ಥಾಶ್ರಮ ಸಫಲವಾಯಿತೆಂದು ಹಿಮವಂತ ಹರ್ಷಿಸಿದ. ಮಗಳನ್ನು ತಪಸ್ಸು ಮಾಡಲು ಪ್ರೇರೇಪಿಸಿದ ನಾರದನ ಸಹಾಯವನ್ನು ಕೃತಜ್ಞತೆಯಿಂದ ಸ್ತುತಿಸಿದ.

ಪಾರ್ವತಿಯ ಸ್ವಾಗತಕಾರ್ಯಕ್ಕೆ ಬಂದಿದ್ದ ಗಣ್ಯರಿಗೆ, ಸ್ತುತಿಪಾಠಕರಿಗೆ ಹಿಮವಂತ ಧನವನ್ನು ಕೊಟ್ಟು ಸತ್ಕರಿಸಿದ. ವೇದಪಂಡಿತರಿಂದ ಮಂಗಳ ಘೋಷ ಮಾಡಿಸಿ, ಸ್ವಾಗತ ಮಹೋತ್ಸವ ಸಮಾಪ್ತಿಗೊಳಿಸಿದ. ಹೀಗೆ ಗಿರಿಜೆ ಆತ್ಮೀಯ ಸ್ವಾಗತದೊಂದಿಗೆ ಮನೆಯನ್ನು ಸೇರಿದಳು. l