ಮರುಕಳಿಸಿದ ರಾಜದರ್ಬಾರು

7
ರತ್ನಖಚಿತ ಸಿಂಹಾಸನ ಏರಿದ ಯದುವೀರ, ಗತಕಾಲಕ್ಕೆ ಜಾರಿದ ಅರಮನೆ

ಮರುಕಳಿಸಿದ ರಾಜದರ್ಬಾರು

Published:
Updated:
Deccan Herald

ಮೈಸೂರು: ನವರಾತ್ರಿ ಆರಂಭದ ದಿನವಾದ ಬುಧವಾರ ಇಲ್ಲಿನ ಅರಮನೆ ಅಕ್ಷರಶಃ ಗತಕಾಲಕ್ಕೆ ಜಾರಿತು.

ಅರಸೊತ್ತಿಗೆಯ ಪಳೆಯುಳಿಕೆ ರಾಜ ದರ್ಬಾರಿನ ಹಳೆಯ ವೈಭೋಗ ಮತ್ತೊಮ್ಮೆ ಗೋಚರಿಸಿತು. ರಾಜವಂಶಸ್ಥ ಯದುವೀರ ಕೃಷ್ಣದತ್ತ ಚಾಮರಾಜ ಒಡೆಯರ್ ರತ್ನಖಚಿತ ಸಿಂಹಾಸನ ಏರುವ ಮೂಲಕ 4ನೇ ಬಾರಿ ತಮ್ಮ ಖಾಸಗಿ ದರ್ಬಾರ್‌ಗೆ ಚಾಲನೆ ನೀಡಿದರು.

ರಾಜಪೋಷಾಕು, ರತ್ನಖಚಿತ ಮುತ್ತಿನ ಹಾರಗಳು, ಮೈಸೂರು ಪೇಟಾದೊಂದಿಗೆ ಸಾಲಂಕೃತಗೊಂಡ ಯದುವೀರ ಅವರು ರಾಜಗಾಂಭೀರ್ಯದಲ್ಲಿ ಚಿನ್ನವರ್ಣದ ವೈಭವೋಪೇತ ದರ್ಬಾರ್‌ ಹಾಲ್‌ ಪ್ರವೇಶಿಸುತ್ತಿದ್ದಂತೆ ಹೊಗಳುಭಟ್ಟರು ಬಹುಪರಾಕ್‌ ಹಾಕಿದರು. ಬೆಳ್ಳಿ ಕಳಸಗಳನ್ನು ಪೂಜಿಸಿದ ಅವರು ನವಗ್ರಹಗಳಿಗೆ ವಂದಿಸಿ, ಸಿಂಹಾಸನಕ್ಕೆ ಪುಷ್ಪಾರ್ಚನೆ ನೆರವೇರಿಸಿದರು.

ಈ ವೇಳೆ ರಾಜ ಪುರೋಹಿತರು ವೇದಘೋಷಗಳನ್ನು ಮೊಳಗಿಸಿದರು. ಮಂತ್ರಗಳನ್ನು ಪಠಿಸಿದರು. ಮಧ್ಯಾಹ್ನ 11.40ರಿಂದ 12.10ರ ಒಳಗೆ ಸಲ್ಲುವ ಶುಭ ವೃಶ್ಚಿಕ ಲಗ್ನದಲ್ಲಿ ಸಿಂಹಾಸನವನ್ನು 3 ಬಾರಿ ಪ್ರದಕ್ಷಿಣೆ ಹಾಕಿದ ಯದವೀರ 7 ಮೆಟ್ಟಿಲುಗಳನ್ನು ಏರಿ, ಸೆಲ್ಯುಟ್‌ ಮಾಡಿ ಆಸೀನರಾದರು. ಸಿಂಹಾಸನಾರೋಹಣವನ್ನು ರಾಜವಂಶಸ್ಥರು, ಬಂಧು ಪರಿವಾರದವರು, ಅಧಿಕಾರಿಗಳು ಮತ್ತು ಅವರ ಕುಟುಂಬಸ್ಥರು ಕಣ್ತುಂಬಿಕೊಂಡರು.

ನಂತರ ಸಿಂಹಾಸನದ ಬಳಿ ಬಂದ ರಾಜಪುರೋಹಿತರು ಚಾಮುಂಡಿಬೆಟ್ಟ, ನಂಜನಗೂಡಿನ ಶ್ರೀಕಂಠೇಶ್ವರ, ಉತ್ತನಹಳ್ಳಿ ಜ್ವಾಲಾಮುಖಿ ತ್ರಿಪುರಸುಂದರಿ, ಮೇಲುಕೋಟೆ ಚಲುವನಾರಾಯಣಸ್ವಾಮಿ, ಉಮ್ಮತ್ತೂರು ಭುಜಂಗೇಶ್ವರ, ಶ್ರೀರಂಗಪಟ್ಟಣದ ರಂಗನಾಥಸ್ವಾಮಿ, ಶೃಂಗೇರಿಯ ಶಾರದಾಂಬೆ, ಪರಕಾಲ ಮಠ ಸೇರಿದಂತೆ 24 ದೇಗುಲಗಳಿಂದ ತಂದಿದ್ದ ತೀರ್ಥ, ಪ್ರಸಾದಗಳನ್ನು ಯದುವೀರ ಅವರಿಗೆ ನೀಡಿದರು.

‌ಆಸ್ಥಾನದಲ್ಲಿ ವಿರಾಜಮಾನರಾಗಿದ್ದ 20ಕ್ಕೂ ಹೆಚ್ಚು ಪುರೋಹಿತರು, ಆಸ್ಥಾನ ವಿದ್ವಾಂಸರು, ದರ್ಬಾರ್ ಭಕ್ಷಿಗಳು ಹಾಗೂ ದೀವಟಿಗೆ ಸಲಾಮಿನವರು, ಪಂಡಿತರಿಗೆ ಮಲ್ಲಿಗೆ ಹೂ ಹಾರಗಳನ್ನು ಹಾಕಿ ಗೌರವ ಸಮರ್ಪಿಸಲಾಯಿತು.

ಸಿಂಹಾಸನದಿಂದ ಕೆಳಗಿಳಿದ ಬಳಿಕ ಯದುವೀರ ಬೆಳ್ಳಿ ಕುರ್ಚಿಯ ಮೇಲೆ ಕುಳಿತರು. ಪತ್ನಿ ತ್ರಿಷಿಕಾ ಕುಮಾರಿ ಪತಿಗೆ ನೀವಾಳಿಕೆ ತೆಗೆದು, ಪಾದಪೂಜೆ ನೆರವೇರಿಸಿದರು. ಸಿಂಹಾಸನಾರೋಹಣದ ವಿಧಿವಿಧಾನವು ಕಾಳಿಕಾಪುರಾಣದಂತೆ ನೆರವೇರಿತು. ಅರಮನೆಯ ಗೀತೆಯಾದ ‘ಕಾಯೋ ಶ್ರೀಗೌರಿ’ ಗೀತೆಯನ್ನು ಎರಡು ಬಾರಿ ಹಾಡಲಾಯಿತು.

ಇದೇ ಮೊದಲ ಬಾರಿಗೆ ಯದುವೀರ ಪುತ್ರ ಆದ್ಯವೀರ ನರಸಿಂಹರಾಜ ಒಡೆಯರ್ ತನ್ನ ತಾಯಿಯ ಮಡಿಲಲ್ಲಿ ಕುಳಿತು ತಂದೆಯ ಸಿಂಹಾಸನಾರೋಹಣವನ್ನು ಕಣ್ತುಂಬಿಕೊಂಡ. ಪರದೆ ಹಿಂದೆ ಯದುವೀರ ಅವರ ತಾಯಿ ಪ್ರಮೋದಾದೇವಿ ಒಡೆಯರ್, ರಾಜಪರಿವಾರದವರು ದರ್ಬಾರ್ ವೀಕ್ಷಣೆ ಮಾಡಿದರು. ಇನ್ಫೊಸಿಸ್ ಪ್ರತಿಷ್ಠಾನದ ಅಧ್ಯಕ್ಷೆ ಸುಧಾಮೂರ್ತಿ ಮತ್ತು ನಾರಾಯಣಮೂರ್ತಿ ಭಾಗಿಯಾದರು.

ಬರಹ ಇಷ್ಟವಾಯಿತೆ?

  • 5

    Happy
  • 1

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !