ಪ್ರಯಾಣಿಕರೊಂದಿಗೆ ಸೌಜನ್ಯ: ಸಲಹೆ

ಜಮಖಂಡಿ: ಪೊಲೀಸ್ ಇಲಾಖೆ ಅಟೋ/ಪ್ಯಾಜೋ ವಾಹನಗಳಿಗೆ ನೀಡಿದ ನಂಬರನ್ನು ಎಲ್ಲರಿಗೂ ಕಾಣುವಂತೆ ವಾಹನಗಳಿಗೆ ಅಂಟಿಸಬೇಕು. ರಾತ್ರಿ ಪಾಳೆಯಲ್ಲಿ ಓಡಿಸುವ ಆಟೋಗಳ ಮತ್ತು ಚಾಲಕರ ಮಾಹಿತಿಯನ್ನು ಪೊಲೀಸ್ ಠಾಣೆಗೆ ಕಡ್ಡಾಯವಾಗಿ ತಿಳಿಸಬೇಕು ಎಂದು ಸಿಪಿಐ ಉಮೇಶ ಚಿಕ್ಕಮಠ ಹೇಳಿದರು.

ನಗರ ಪೊಲೀಸ್ ಠಾಣೆಯ ಸಭಾ ಭವನದಲ್ಲಿ ಗುರುವಾರ ಸಂಜೆ ಏರ್ಪಡಿಸಿದ್ದ ಅಟೋ/ಪ್ಯಾಜೋ ಮಾಲೀಕರ ಮತ್ತು ಚಾಲಕರ ಸಭೆಯ ಅಧ್ಯಕ್ಷತೆ ವಹಿಸಿ ಅವರು ಮಾತನಾಡಿದರು.

ಚಾಲಕರು ಕಡ್ಡಾಯವಾಗಿ ಚಾಲನಾ ಪ್ರಮಾಣ ಪತ್ರ ಹೊಂದಿರಬೇಕು. ಚಾಲಕರ ಮೊಬೈಲ್ ನಂಬರನ್ನು ದಪ್ಪ ಅಂಕಿಗಳಲ್ಲಿ ಎಲ್ಲರಿಗೂ ಕಾಣುವಂತೆ ವಾಹನದ ಮೇಲೆ ಬರೆಯಿಸಬೇಕು. ಪ್ರಯಾಣಿಕರಿಂದ ಹೆಚ್ಚಿನ ಬಾಡಿಗೆ ಹಣ ವಸೂಲಿ ಮಾಡಬಾರದು. ಪ್ರಯಾಣಿಕರೊಂದಿಗೆ ಸೌಜನ್ಯದಿಂದ ವರ್ತಿಸಬೇಕು.

ನಿಗದಿತ ಸ್ಥಳದಲ್ಲಿಯೇ ವಾಹನ ನಿಲುಗಡೆ ಮಾಡಬೇಕು. ಸಂಚಾರ ನಿಯಮಗಳನ್ನು ಕಡ್ಡಾಯವಾಗಿ ಪಾಲಿಸಬೇಕು. ಮದ್ಯಪಾನ ಮಾಡಿ ವಾಹನ ಓಡಿಸಬಾರದು. ಪ್ರಯಾಣಿಕರು ಹೇಳುವ ವಿಳಾಸಕ್ಕೆ ಸುರಕ್ಷಿತವಾಗಿ ತಲುಪಿಸಬೇಕು. ತಮ್ಮ ಕರ್ತವ್ಯದಲ್ಲಿ ಪ್ರಾಮಾಣಿಕತೆ ಮೆರೆಯಬೇಕು ಎಂದು ಸಲಹೆ ನೀಡಿದರು.

ನಗರ ಪೊಲೀಸ್ ಠಾಣೆಯ ಪಿಎಸ್‌ಐ ರವಿಚಂದ್ರ ಡಿ.ಬಿ. ಸ್ವಾಗತಿಸಿ, ಪ್ರಾಸ್ತಾವಿಕವಾಗಿ ಮಾತನಾಡಿದರು.