ಶನಿವಾರ, ಮಾರ್ಚ್ 6, 2021
30 °C
ಬ್ರಾಹ್ಮಣ ಪ್ರೀಮಿಯರ್ ಲೀಗ್ ಕ್ರಿಕೆಟ್ ಪಂದ್ಯಾವಳಿ

ಬಾಗಲಕೋಟೆ: ಯುನೈಟೆಡ್ ತಂಡಕ್ಕೆ ಚಾಪಿಯನ್ ಪಟ್ಟ

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

Deccan Herald

ಬಾಗಲಕೋಟೆ: ಇಲ್ಲಿನ ವಿಪ್ರ ಕ್ರೀಡಾ ಹಾಗೂ ಸಾಂಸ್ಕೃತಿಕ ಸಂಘಟನೆ ಆಯೋಜಿಸಿದ್ದ ನಗರ ಮಟ್ಟದ ಬ್ರಾಹ್ಮಣ ಪ್ರೀಮಿಯರ್ ಲೀಗ್ ಕ್ರಿಕೆಟ್ ಪಂದ್ಯಾವಳಿಯಲ್ಲಿ ನವನಗರ ಯುನೈಟೆಡ್ ತಂಡ ಚಾಂಪಿಯನ್ ಪಟ್ಟ ಮುಡಿಗೇರಿಸಿಕೊಂಡಿದೆ.

ಪಂದ್ಯಾವಳಿಯ ಶ್ರೇಷ್ಠ ಆಟಗಾರ, ಉತ್ತಮ ಬೌಲರ್ ಪ್ರಶಸ್ತಿಯನ್ನು ಯುನೈಟೆಡ್ ತಂಡದ ಆಟಗಾರ ಸುಜಯ ಹೆರಂಜಲ್, ಉತ್ತಮ ಬ್ಯಾಟ್ಸ್‌ಮನ್ ಪ್ರಶಸ್ತಿಯನ್ನು ವಿಜಯಧ್ವಜ ತಂಡದ ರಾಘವೇಂದ್ರ ಸರಾಫ ಪಡೆದುಕೊಂಡರು.

ನಗರದ ಸಕ್ರಿ ಕಾಲೇಜ್ ಮೈದಾನದಲ್ಲಿ ಭಾನುವಾರ ನಡೆದ ಫೈನಲ್ ಪಂದ್ಯದಲ್ಲಿ 66 ರನ್ ಅಂತರದಿಂದ ವಿಜಯಧ್ವಜ ತಂಡಕ್ಕೆ ಸೋಲುಣಿಸಿದ ಯುನೈಟೆಡ್ ತಂಡ ಪ್ರಶಸ್ತಿ ಪಡೆಯಿತು.

ಮೊದಲು ಬ್ಯಾಟ್ ಮಾಡಿದ ಯುನೈಟೆಡ್ ತಂಡದ ಪರ ಡಾ. ಸುಜಯ್ ಹೆರಂಜಲ್ (29) ಅತ್ಯುತ್ತಮ ಆಟದ ಮೂಲಕ ತಂಡ ಉತ್ತಮ ಮೊತ್ತ ಕಲೆ ಹಾಕಲು ನೆರವಾದರು. ನಿಗದಿತ 10 ಓವರ್ಗಳಲ್ಲಿ ಯುನೈಟೆಡ್ ತಂಡ 7 ವಿಕೆಟ್ ಕಳೆದುಕೊಂಡು 108 ರನ್ ಗಳಿಸಿತು. ಯುನೈಟೆಡ್ ತಂಡದ ಮಾರಕ ಬೌಲಿಂಗ್‌ ದಾಳಿಗೆ ವಿಜಯಧ್ವಜ ತಂಡದ ಆಟಗಾರರು ವಿಕೆಟ್ ಒಪ್ಪಿಸಿದರು.

ವಿಜಯಧ್ವಜ ಪರ ಅಜಯ್ ಸೂಳಿಕೇರಿ (18) ಹೊರತುಪಡಿಸಿ ಉಳಿದ ಆಟಗಾರರು ನೆಲೆ ನಿಲ್ಲಲಿಲ್ಲ. ಕೇವಲ 42 ರನ್ ಗಳಿಸಿ ತಂಡದ ಆಟಗಾರರು ಎಲ್ಲಾ ವಿಕೆಟ್ ಕಳೆದುಕೊಂಡರು. ಆಟಗಾರರಿಗೆ ಭಂಡಾರಕೇರಿ ಮಠದ ವಿದ್ಯೇಶತೀರ್ಥ ಶ್ರೀಗಳು ಪ್ರಶಸ್ತಿ ವಿತರಿಸಿದರು. ವಿಕೆಎಸ್ಎಸ್ ಅಧ್ಯಕ್ಷ ರಾಮ ಮನಗೂಳಿ ಪ್ರಾಸ್ತಾವಿಕವಾಗಿ ಮಾತನಾಡಿದರು. ರವಿ ಮಗ್ದುಮ್ ಸ್ಕೋರರ್, ರಾಕೇಶ, ವಾಜೀದ್ ಅಂಪೈರ್‌ಗಳಾಗಿ ಕಾರ್ಯನಿರ್ವಹಿಸಿದರು. 
 

ಕೇಂದ್ರ ಬಜೆಟ್ 2021 ಪೂರ್ಣ ಮಾಹಿತಿ ಇಲ್ಲಿದೆ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.