ದಲೈ ಲಾಮಾಗೆ ಅನಾರೋಗ್ಯ; ಮುಂದಿನ ಉತ್ತರಾಧಿಕಾರಿ ಯಾರು?

82 ವರ್ಷ ವಯಸ್ಸಿನ ದಲೈ ಲಾಮಾ ಅವರ ಆರೋಗ್ಯ ಕೆಲ ದಿನಗಳಿಂದ ಕುಸಿದಿದೆ. ಪ್ರಸಕ್ತ ವರ್ಷ ಅವರು ಸಾರ್ವಜನಿಕ ಸಮಾರಂಭಗಳು ಮತ್ತು ಪ್ರವಾಸಗಳನ್ನು ಮೊಟಕುಗೊಳಿಸಿದ್ದಾರೆ. ವಯಸ್ಸಿನ ಕಾರಣ ಸಾರ್ವಜನಿಕರ ಸಮಾರಂಭಗಳನ್ನು ರದ್ದುಗೊಳಿಸಿದ್ದಾರೆ ಎಂದು ಸಿಎಟಿಯ ವಕ್ತಾರರು ಮಾರ್ಚ್‌ನಲ್ಲಿ ಹೇಳಿದ್ದರು.

ದಲೈ ಲಾಮಾ ಅವರನ್ನು ವಿವಿಧ ದೇಶಗಳಿಗೆ ಆಹ್ವಾನಿಸಲಾಗುತ್ತಿದೆ. ಆದರೆ, ವಯಸ್ಸಿನ ಕಾರಣದಿಂದಗಿ ಅವರು ಸಾರ್ವಜನಿಕ ಕಾರ್ಯಕ್ರಮಗಳನ್ನು ಕಡಿತಗೊಳಿಸಿದ್ದಾರೆ. ಸುದೀರ್ಘ ಕಾಲದವರೆಗೆ ಬೋಧಿಸಿದ ಬಳಿಕ ಅವರು ದಣಿದಿದ್ದಾರೆ. ಆದ್ದರಿಂದ, ಕೆಲವು ಪೂರ್ವನಿರ್ಧರಿತ ಸಮಾರಂಭಗಳನ್ನು ರದ್ದುಗೊಳಿಸಿದ್ದಾರೆ ಎಂದು ವಕ್ತಾರರು ತಿಳಿಸಿದ್ದಾರೆ. ಪ್ರಸಕ್ತ ವರ್ಷ ಫೆಬ್ರುವರಿಯಲ್ಲಿ ದಲೈಲಾಮಾ ಅವರ ಆರೋಗ್ಯದ ಬಗೆಗಿನ ಗುಪ್ತಚರ ವರದಿಗಳನ್ನು ಭಾರತ ಸರ್ಕಾರ ಗಮನಿಸುತ್ತಿದೆ.

ದಲೈ ಲಾಮಾ ಅವರ ಉತ್ತರಾಧಿಕಾರಿ ಯಾರೆಂಬುದರ ಬಗ್ಗೆ ಚೀನಾ ಮತ್ತು ಅಮೆರಿಕ ಸೇರಿದಂತೆ ಹಲವು ದೇಶಗಳಿಗೆ ಆಸಕ್ತಿದಾಯಕ ವಿಷಯವಾಗಿದ್ದು, ಅತ್ಯಂತ ಕುತೂಹಲದಿಂದ ನೋಡುತ್ತಿವೆ.

'ತಮ್ಮ ನಂತರ ಯಾರು ಎಂಬುದನ್ನು ಚೀನಾ ನಿರ್ಧರಿಸುವಂತಿಲ್ಲ' ಎಂದು ದಲೈ ಲಾಮಾ ಅವರು ಹೇಳಿದ್ದ ಹೇಳಿಕೆಗೆ ಹಾಗೂ ದಲೈ ಲಾಮಾ ಅವರ ಪುನರ್ಜನ್ಮ ಕುರಿತಾಗಿ 2015ರಲ್ಲಿ ಚೀನಾ ಅಪಹಾಸ್ಯ ಮಾಡಿತ್ತು. ಉತ್ತರಾಧಿಕಾರಿ ವಿಚಾರವನ್ನು ಔಪಚಾರಿಕವಾಗಿ ತನ್ನ 90ನೇ ಹುಟ್ಟುಹಬ್ಬದಂದು ಪರಿಹರಿಸಲಾಗುವುದು ಎಂದು ಅವರು ಹೇಳಿದ್ದರು.

ಆದಾಗ್ಯೂ, ಈಚಿನ ವರದಿಗಳ ಪ್ರಕಾರ, ಉತ್ತರಾಧಿಕಾರಿ ಸಮಸ್ಯೆಯನ್ನು ದಲೈ ಲಾಮಾ ಅವರ ಆರೋಗ್ಯ ಪೂರ್ಣ ಕ್ಷೀಣಿಸುವ ಮುನ್ನವೇ ಬಗೆಹರಿಸಬೇಕಾಗಿದೆ ಎಂದು ಹೇಳಲಾಗಿದೆ. ಈ ವಿಷಯವಾಗಿ ಚೀನಾ ತನ್ನ ಪ್ರಭಾವನ್ನು ಹೆಚ್ಚಿಸಿಕೊಳ್ಳುತ್ತಿದ್ದು, ಹಸ್ತಕ್ಷೇಪ ಮಾಡಲು ಹವಣಿಸುತ್ತಿದೆ. ಈ ಮಧ್ಯೆ ಕಳೆದ ವಾರ, ಉತ್ತರಾಧಿಕಾರಿ ವಿಷಯದಲ್ಲಿ ಹೇಳಿಕೆ ನೀಡಿರುವ ಅಮೆರಿಕ ಅಧ್ಯಕ್ಷ ಟ್ರಂಪ್‌ ಆಡಳಿತ, ಈ ವಿಷಯದಲ್ಲಿ ಚೀನಾ ಮಧ್ಯಪ್ರವೇಶಿಸುವುದನ್ನು ತಡೆಯಲು ಚೀನಾವನ್ನು ಒತ್ತಾಯಿಸಿದೆ.

ಧಾರ್ಮಿಕ ಸ್ವಾತಂತ್ರ್ಯದ ಟಿಬೆಟಿಯನ್‌ ಬೌದ್ಧ ಧರ್ಮದ ಸಾರ್ವತ್ರಿಕ ಮಾನವ ಹಕ್ಕಿನ ಗೌರವವು ದಲೈ ಲಾಮಾ ಸೇರಿದಂತೆ ಟಿಬೆಟಿಯನ್‌ ಬೌದ್ಧ ಲಾಮಾಗಳ ಅನುಕ್ರಮ ಮತ್ತು ಗುರುತ್ವವನ್ನು ಹಸ್ತಕ್ಷೇಪವಿಲ್ಲದೆ ತಮ್ಮ ನಂಬಿಕೆಗಳಿಗೆ ಅನುಗುಣವಾಗಿ ನಡೆಯಬೇಕು ಎಂದು ಅಮೆರಿಕ ಸರ್ಕಾರ ಬಯಸುತ್ತದೆ ಎಂದು ಅಮೆರಿಕದ ಲೆಜಿಸ್ಲೇಟಿವ್‌ ವ್ಯವಹಾರಗಳ ಸಹಾಯಕ ಕಾರ್ಯದರ್ಶಿ ಮೇರಿ ಕೆ. ವಾಟರ್ಸ್‌ ಅವರು ಸಹಿ ಹಾಕಿರುವ ವರದಿ ಹೇಳಿದೆ.

ದಲೈ ಲಾಮಾ ಅವರು ಎರಡು ವರ್ಷಗಳ ಹಿಂದೆ ಅಮೆರಿಕಾಗೆ ಭೇಟಿ ನೀಡಿದ್ದಾಗಲೇ ಅವರಿಗೆ ಪ್ರಸ್ಟ್ರೇಟ್‌ ಕ್ಯಾನ್ಸರ್‌ ಸಂಬಂಧ ಇಲ್ಲಿನ ಮೇಯೊ ಆಸ್ಪತ್ರೆಯಲ್ಲಿ ಚಿಕಿತ್ಸೆ ನೀಡಲಾಗುತ್ತಿದೆ ಎಂಬ ಮೊದಲ ಸುಳಿವು ದೊರೆತಿದೆ. ಚಿಕಿತ್ಸೆಗಾಗಿ ಹಲವು ಬಾರಿ ಅವರು ಅಲ್ಲಿಗೆ ಭೇಟಿ ನೀಡಿದ್ದಾರೆ. ದಲೈ ಲಾಮ ಅವರ ಆರೋಗ್ಯ ಸ್ಥಿತಿಯ ಬಗೆಗಿನ ಮಾಹಿತಿಯನ್ನು ತಡೆಹಿಡಿಯಲು ಟಿಬೆಟಿಯನ್‌ ಆಡಳಿತವು ಪ್ರಯತ್ನಿಸುತ್ತಿರುವ ಬೆನ್ನಲ್ಲೇ, ಟಿಬೆಟ್‌ ಅಮೆರಿಕ ಕಾಂಗ್ರೆಸ್‌ ಜತೆ ನಡೆಸಿರುವ ಮಾತುಕತೆಗಳ ಕುರಿತ ಗುಪ್ತಚರ ವರದಿಗಳು ಇದನ್ನು ದೃಢೀಕರಿಸುತ್ತವೆ.

ಮೆಯೊ ಕ್ಲಿನಕ್‌ನಲ್ಲಿ ದಲೈ ಲಾಮಾ ಅವರು ಪ್ರೋಟೋನ್‌ ಕಿರಣ ಚಿಕಿತ್ಸೆಗೆ ಒಳಗಾಗುತ್ತಿದ್ದಾರೆ ಎಂದು ಗೊತ್ತಾಗಿದೆ. ಆದರೆ, ಪ್ರಾಟೆಸ್ಟ್‌ ಕ್ಯಾನ್ಸರ್‌ ಈಗಾಗಲೇ ದೇಹದ ಇತರ ಭಾಗಗಳಿಗೆ ಹರಡಿದ್ದು, ಗುಣಪಡಿಸಲಾಗ ಸ್ಥಿತಿ ತಲುಪಿದೆ ಎಂದು ವರದಿಯಾಗಿದೆ.

ಈ ಕಾರಣಕ್ಕಾಗಿ ದಲೈ ಲಾಮಾ ಅವರು ದೀರ್ಘ ಪ್ರಯಾಣ ಕೈಗೊಳ್ಳಲು ಸಾಧ್ಯವಾಗದೆ ಹಲವು ವಿದೇಶಿ ಪ್ರವಾಸಗಳನ್ನು ರದ್ದುಗೊಳಿಸಿದ್ದಾರೆ. ರಿಕಾನ್‌ನ 50ನೇ ವರ್ಷಾಚರಣೆ ಸಮಾರಂಭಕ್ಕೆ ಹಾಜರಾಗಲು ಅವರು ಪ್ರಸಕ್ತ ವರ್ಷ ಸೆಪ್ಟೆಂಬರ್‌ನಲ್ಲಿ ಸ್ವಿಟ್ಜರ್‌ಲೆಂಡ್‌ಗೆ ಭೇಟಿ ನೀಡಲಿದ್ದಾರೆ. ಅವರ ಈ ಕಾರ್ಯಕಮದ ಪ್ರವಾಸವನ್ನು ರದ್ದುಗೊಳಿಸಿಲ್ಲ ಎಂದು ವರದಿಯಾಗಿದೆ.

ದಲೈ ಲಾಮಾ ಅವರು ಆರೋಗ್ಯ ಸ್ಥಿತಿಯನ್ನು ಅವರು ಈಚೆಗೆ ಭಾಗವಹಿಸಿದ್ದ ಸಾರ್ವಜನಿಕ ಸಮಾರಂಭಗಳಲ್ಲಿ ಇತರರ ನೆರವಿನಿಂದ ನಡೆದಾಡಿದ ದೃಶ್ಯಗಳು ತೋರುತ್ತವೆ ಎಂದು ವರದಿ ಮಾಡಿದೆ.