ಬಾಗಲಕೋಟೆ: ಇಳಕಲ್ ನಗರದ ಮೌಲಾನ ಅಬುಲ್‌ ಕಲಾಂ ಆಜಾದ್ ಸರ್ಕಾರಿ ಆಂಗ್ಲ ಮಾಧ್ಯಮ ಮಾದರಿ ಶಾಲೆಯಲ್ಲಿ ಶುಕ್ರವಾರ ಆರು ಮಂದಿವಿದ್ಯಾರ್ಥಿನಿಯರು ನಮಾಜ್ ಮಾಡಿರುವ ವಿಡಿಯೊ ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡಿದೆ.
‘ಸರ್ಕಾರಿ ಶಾಲೆಯ ಆವರಣದಲ್ಲಿ ಆಟದ ಹೊತ್ತಿನಲ್ಲಿ ಮಕ್ಕಳು ನಮಾಜ್ ಮಾಡಿರುವುದನ್ನು ವಿಡಿಯೊ ಮಾಡಿರುವ ಸಾರ್ವಜನಿಕರು ಅದನ್ನು ಇಳಕಲ್ ಕ್ಷೇತ್ರ ಶಿಕ್ಷಣಾಧಿಕಾರಿಗೆ ಕಳುಹಿಸಿದ್ದಾರೆ. ಆ ಬಗ್ಗೆ ಬಿಇಒ ನನಗೆ ಮಾಹಿತಿ ನೀಡಿದ್ದಾರೆ. ಅವರಿಂದ ವರದಿ ಕೇಳಿದ್ದೇನೆ. ನಂತರ ಕ್ರಮ ಕೈಗೊಳ್ಳುವೆ’ ಎಂದು ಡಿಡಿಪಿಐ ಶ್ರೀಶೈಲ ಬಿರಾದಾರ ಮಾಧ್ಯಮದವರಿಗೆ ಪ್ರತಿಕ್ರಿಯಿಸಿದ್ದಾರೆ.
‘ಶಾಲೆಯಲ್ಲಿ ಒಟ್ಟು 232 ವಿದ್ಯಾರ್ಥಿಗಳು ಇದ್ದಾರೆ. ನಮ್ಮ ಗಮನಕ್ಕೆ ಬಾರದೇ ಇದು ನಡೆದಿದೆ. ಇನ್ನು ಮುಂದೆ ಮರುಕಳಿಸದಂತೆ ನೋಡಿಕೊಳ್ಳುವೆ’ ಎಂದು ಶಾಲೆಯ ಪ್ರಭಾರ ಶಿಕ್ಷಕಿ ಎಚ್.ವೈ.ಕಾರಕೂರ ತಿಳಿಸಿದ್ದಾರೆ.
