ಮುಧೋಳ: ಸಿಡಿಲು ಬಡಿದು ಬಾಲಕ ಸಾವು 

ಬಾಗಲಕೋಟೆ: ಮುಧೋಳ ತಾಲ್ಲೂಕಿನ ಚಿಚಖಂಡಿ ಕೆ.ಡಿ ಗ್ರಾಮದ ದರ್ಶನ್ ಫಕೀರಪ್ಪ ಮಾದರ (14) ಮಂಗಳವಾರ ಸಿಡಿಲು ಬಡಿದು ಮೃತಪಟ್ಟಿದ್ದಾರೆ.

ದರ್ಶನ್ ತನ್ನ ಅಪ್ಪ ಫಕೀರಪ್ಪ ಮಾದರ ಹಾಗೂ ಸಹೋದರ ಆಕಾಶ ಅವರೊಂದಿಗೆ ಸಂಜೆ ಹೊಲದಲ್ಲಿ ಕುರಿಗಳೊಂದಿಗೆ ಇದ್ದಾಗ ಸಿಡಿಲು ಬಡಿದಿದೆ. ಈ ವೇಳೆ ದರ್ಶನ್  ಸ್ಥಳದಲ್ಲಿಯೇ ಸಾವಿಗೀಡಾಗಿದ್ದು, ಇನ್ನಿಬ್ಬರು ಗಾಯಗೊಂಡಿದ್ದಾರೆ. ಅವರನ್ನು ಮುಧೋಳದ ಸರ್ಕಾರಿ ಆಸ್ಪತ್ರೆಗೆ ಚಿಕಿತ್ಸೆಗೆ ದಾಖಲಿಸಲಾಗಿದೆ.

ಪರಿಹಾರ ವಿತರಣೆಗೆ ಸೂಚನೆ: ಬಾಲಕನ ಕುಟುಂಬದ ಸದಸ್ಯರಿಗೆ ದೂರವಾಣಿ ಕರೆ ಮಾಡಿ ಸಾಂತ್ವನ ಹೇಳಿದ ಉಪಮುಖ್ಯಮಂತ್ರಿ ಗೋವಿಂದ ಕಾರಜೋಳ, ₹5 ಲಕ್ಷ ಪರಿಹಾರ ವಿತರಣೆಗೆ ಜಿಲ್ಲಾಧಿಕಾರಿಗೆ ಸೂಚನೆ ನೀಡಿದರು.
 
ಮೃತಪಟ್ಟ ಬಾಲಕನ ಕುಟುಂಬದ ಇತರ ಸದಸ್ಯರಿಗೂ ಸಿಡಿಲಿನಿಂದ ಗಾಯಗಳಾಗಿದ್ದು, ಅವರಿಗೆ ಚಿಕಿತ್ಸೆ ಕೊಡಿಸಿ, ಪರಿಹಾರ ಧನ ನೀಡುವಂತೆ ಡಿಸಿಎಂ ಅಧಿಕಾರಿಗಳಿಗೆ ಸೂಚಿಸಿದರು.