ಗೋಹತ್ಯೆ ಕಾನೂನು ಪಾಲನೆಗೆ ಆಗ್ರಹ

6

ಗೋಹತ್ಯೆ ಕಾನೂನು ಪಾಲನೆಗೆ ಆಗ್ರಹ

Published:
Updated:

ಶಿವಮೊಗ್ಗ: ರಾಜ್ಯ 1964ರ ಗೋಹತ್ಯೆ ತಡೆ ಕಾಯ್ದೆ ಅನ್ವಯ ಸಂಪೂರ್ಣ ಗೋಹತ್ಯೆ ಮುಕ್ತ, ಪ್ರಾಣಿ ಬಲಿ ಮುಕ್ತ ರಾಜ್ಯವಾಗಬೇಕು. ಈ ಕಾನೂನು ಕಟ್ಟುನಿಟ್ಟಾಗಿ ಪಾಲಿಸಲು ಜಿಲ್ಲಾಡಳಿತ ಕ್ರಮ ಕೈಗೊಳ್ಳಬೇಕು ಎಂದು ಬಜರಂಗದ ಮುಖಂಡ ದೀನದಯಾಳು ಆಗ್ರಹಿಸಿದರು.

ಹಿಂದೂ ಧರ್ಮದ ಪವಿತ್ರ ಸಂಕೇತ ಗೋವು. ಆದರೆ, ಇಂದು ಗೋಹತ್ಯೆ ಅವ್ಯಾಹತವಾಗಿ ಸಾಗುತ್ತಿದೆ. ಪುಟ್ಟ ಕರುಗಳನ್ನೂ ಕ್ರೂರವಾಗಿ ಕೊಲ್ಲಲಾಗುತ್ತಿದೆ. ಸಾವಿರಾರು ಗೋವುಗಳ ಹತ್ಯೆ ಮಾಡಲಾಗುತ್ತಿದೆ. ಬಕ್ರೀದ್‌ ಹಬ್ಬ ಬಂದರೆ ಲಕ್ಷಾಂತರ ಗೋವುಗಳು ನಾಶವಾಗುತ್ತಿವೆ ಎಂದು ಶನಿವಾರ ಪತ್ರಿಕಾಗೋಷ್ಠಿಯಲ್ಲಿ ಅರೋಪಿಸಿದರು.

ಶಿವಮೊಗ್ಗದಲ್ಲಿ ಸುಮಾರು 60ಕ್ಕೂ ಹೆಚ್ಚು ಕಸಾಯಿ ಖಾನೆಗಳಿವೆ. ಅಕ್ರಮ ಗೋ ಸಾಗಾಣಿಕೆ ನಡೆಯುತ್ತಿದೆ.
ಜಿಲ್ಲಾಡಳಿತ ಸುಪ್ರೀಂ ಕೋರ್ಟ್‌ ನಿರ್ದೇಶನದಂತೆ ಅಕ್ರಮ ಕಸಾಯಿಖಾನೆ ತೆರವುಗೊಳಿಸಬೇಕು ಎಂದು ಒತ್ತಾಯಿಸಿದರು.

ವಿಶ್ವ ಹಿಂದೂ ಪರಿಷತ್‌ ಜಿಲ್ಲಾ ಘಟಕದ ಅಧ್ಯಕ್ಷ ರಮೇಶ್‌ ಜಾದವ್ ಮಾತನಾಡಿ, ಬಕ್ರೀದ್‌ಗಾಗಿ ಅಕ್ರಮವಾಗಿ ಗೋವು ಸಾಗಾಣಿಕೆ ಹಾಗೂ ಹತ್ಯೆ ತಡೆಯಲು ಸರ್ಕಾರ ಸುತ್ತೋಲೆ ಹೊರಡಿಸಬೇಕು. ಜಿಲ್ಲಾಮಟ್ಟದ ಸಮಿತಿ ಗೋಹತ್ಯೆ ತಡೆಗೆ ವಿಶೇಷ ಕ್ರಮ ತೆಗೆದುಕೊಳ್ಳಬೇಕು ಎಂದು ಕೋರಿದರು.

ನ್ಯಾಯಾಲಯಗಳ ಆದೇಶದಂತೆ 12 ವರ್ಷದ ಒಳಗಿನ ಎತ್ತು, ಎಮ್ಮೆ, ಕೋಣ, ಹೋರಿಗಳ ಹತ್ಯೆ ಮಾಡುವಂತಿಲ್ಲ. ಪರವಾನಗಿ ಇಲ್ಲದೆ ಕಸಾಯಿಖಾನೆ ತೆರೆಯುವಂತಿಲ್ಲ. ಜಿಲ್ಲಾಡಳಿತ ಈ ಕಾನೂನು ಪಾಲಿಸಲು ಕ್ರಮ ಕೈಗೊಳ್ಳಬೇಕು. ಇಲ್ಲದಿದ್ದರೆ ಹೋರಾಟ ತೀವ್ರಗೊಳಿಸುತ್ತೇವೆ ಎಂದು ಎಚ್ಚರಿಸಿದರು.

ಪತ್ರಿಕಾಗೋಷ್ಠಿಯಲ್ಲಿ ಸಂಘಟನೆಯ ಮುಖಂಡರಾದ ಜಗದೀಶ್, ರಾಜು, ಚಂದ್ರಶೇಖರ್, ಪ್ರಶಾಂತ್, ನಟರಾಜ್, ಚಂದ್ರಹಾಸ್ ರಾಯ್ಕರ್, ಗುರುರಾಜ್ ಶೇಟ್ ಉಪಸ್ಥಿತರಿದ್ದರು.

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !