ಬಳ್ಳಾರಿ ಕಾರಾಗೃಹ | ಪತ್ನಿಗೆ ಕರೆ ಮಾಡಿದ ದರ್ಶನ್

‘ವಿಚಾರಣಾಧೀನ ಕೈದಿಗಳಿಗೆ ವಾರದಲ್ಲಿ ಎರಡು ಬಾರಿ ಸ್ಥಿರ ದೂರವಾಣಿ ಮೂಲಕ ಕರೆ ಮಾಡಲು ಮತ್ತು ಎರಡು ಬಾರಿ ವಿಡಿಯೊ ಕರೆ ಮಾಡಲು ಅವಕಾಶವಿದೆ’ ಎಂದು ಕಾರಾಗೃಹದ ಅಧಿಕಾರಿಗಳು ತಿಳಿಸಿದರು.

‘ದರ್ಶನ್‌ ಟಿವಿಗಾಗಿ ಮನವಿ ಮಾಡಿದ್ದು, ಸದ್ಯ ಜೈಲಿನಲ್ಲಿ ಹೊಸ ಟಿವಿ ಇಲ್ಲ. ಟಿವಿಯನ್ನು ದುರಸ್ತಿಪಡಿಸಿ, ಕೊಡಲಾಗುವುದು. ಸದ್ಯಕ್ಕೆ ಕಾರಾಗೃಹದಲ್ಲಿ 50ಕ್ಕೂ ಹೆಚ್ಚು ಟಿವಿಗಳಿವೆ’ ಎಂದು ಕಾರಾಗೃಹದ ಅಧೀಕ್ಷಕಿ ಲತಾ ‘ಪ್ರಜಾವಾಣಿ’ಗೆ ತಿಳಿಸಿದರು.

ಕೈದಿಗಳ ವೈಯಕ್ತಿಕ ಹಣ (ಪಿಪಿಸಿ)ವೆಂದು ದರ್ಶನ್‌ ಹೆಸರಿನಲ್ಲಿ ಸದ್ಯ ₹30 ಸಾವಿರಕ್ಕೂ ಹೆಚ್ಚು ಮೊತ್ತ ಇದೆ ಎಂದು ಗೊತ್ತಾಗಿದೆ.

ಈ ಬಗ್ಗೆ ಪ್ರತಿಕ್ರಿಯಿಸಿರುವ ಉತ್ತರ ವಲಯ ಡಿಐಜಿ ಟಿ.ಪಿ ಶೇಷ, ‘ಪಿಪಿಸಿ’ ಹಣದಿಂದ ಯಾವುದೇ ಕೈದಿ ಜೈಲಿನೊಳಗಿನ ಕ್ಯಾಂಟೀನ್‌ನಲ್ಲಿ ವಸ್ತುಗಳನ್ನು ಕೊಳ್ಳಬಹುದು. ಹೊರಗಿನಿಂದ ಔಷಧ, ತೀರ ಅಗತ್ಯವಿರುವ ವಸ್ತುಗಳನ್ನೂ ತರಿಸಿಕೊಳ್ಳಬಹುದು. ವ್ಯಕ್ತಿಯೊಬ್ಬ ಜೈಲಿನ ಒಳಗೆ ಬಂದಾಗ ಅವನ ಬಳಿ ಇದ್ದ ಹಣವನ್ನು ಪಿಪಿಸಿಯಲ್ಲಿ ಇಡಲಾಗುತ್ತದೆ. ಕುಟುಂಬದವರೂ ಅದಕ್ಕೆ ಹಣ ಜಮೆ ಮಾಡಬಹುದು. ಇದೇನು ಗಳಿಸಿದ ಹಣವಲ್ಲ. ಸದ್ಯ ದರ್ಶನ್‌ ಅವರ ವಿಷಯದಲ್ಲಿ ಈ ಹಣ ಬೆಂಗಳೂರು ಜೈಲಿನಿಂದ ವರ್ಗಾವಣೆಯಾಗಿದೆ’ ಎಂದರು.