ಶುಕ್ರವಾರ, 29 ಮಾರ್ಚ್ 2024
×
ADVERTISEMENT
ಈ ಕ್ಷಣ :
ADVERTISEMENT
ADVERTISEMENT

ಭಾರತೀಯರ ಕೆಲಸ ಕಸಿಯಲು ಟ್ರಂಪ್‌ ಚಿಂತನೆ

ಎಚ್‌4 ವೀಸಾದಾರರ ಕೆಲಸದ ಪರವಾನಗಿ ರದ್ದತಿಯ ಸುತ್ತಮುತ್ತ
Last Updated 27 ಏಪ್ರಿಲ್ 2018, 19:25 IST
ಅಕ್ಷರ ಗಾತ್ರ

ಎಚ್‍1ಬಿ ವೀಸಾ ಪಡೆದು ಅಮೆರಿಕದಲ್ಲಿ ಕೆಲಸ ಮಾಡುವ ವಿದೇಶಿ ವೃತ್ತಿಪರರ ಸಂಗಾತಿಗಳಿಗೆ ನೀಡಲಾಗುವ ಕೆಲಸದ ಅನುಮತಿ ಪತ್ರವನ್ನು (ಇಎಡಿ) ರದ್ದು ಮಾಡುವ ಬಗ್ಗೆ ಅಲ್ಲಿನ ಸರ್ಕಾರ ಗಂಭೀರ ಚಿಂತನೆ ನಡೆಸಿದೆ ಎಂದು ಮಾಧ್ಯಮಗಳು ವರದಿ ಮಾಡಿವೆ. ಈ ನಿಯಮ ಜಾರಿಗೆ ಬಂದರೆ ಎಚ್‍1ಬಿ ವೀಸಾದಾರರ ಸಂಗಾತಿಗಳು ಅವಲಂಬಿತರಾಗಿ ಮಾತ್ರ ಅಮೆರಿಕದಲ್ಲಿ ಜೀವಿಸಬೇಕಾಗುತ್ತದೆ. ಅಮೆರಿಕ ನೀಡುವ ಎಚ್‍1ಬಿ ವೀಸಾದಲ್ಲಿ ಭಾರತದ ಮಾಹಿತಿ ತಂತ್ರಜ್ಞಾನ ವೃತ್ತಿಪರರದ್ದೇ ಸಿಂಹಪಾಲು. ಹಾಗಾಗಿ ಡೊನಾಲ್ಡ್ ಟ್ರಂಪ್‍ ನೇತೃತ್ವದ ಸರ್ಕಾರದ ನಿರ್ಧಾರ ಭಾರತದ ಕಳವಳಕ್ಕೆ ಕಾರಣವಾಗಿದೆ. ಅಮೆರಿಕ ಸರ್ಕಾರದ ಪ್ರಸ್ತಾವ ಕುರಿತು ಒಂದಷ್ಟು ಮಾಹಿತಿ ಇಲ್ಲಿದೆ.

ಎಚ್‍4, ಎಚ್‍1ಬಿ ವೀಸಾ ಬಗ್ಗೆ… 
ವಿಶೇಷ ಪರಿಣತಿಯ ವಿದೇಶಿ ವೃತ್ತಿಪರರಿಗಾಗಿ ಎಚ್‍1ಬಿ ವೀಸಾ ನೀಡಲಾಗುತ್ತದೆ. ಇದು ವಲಸೆ ವೀಸಾ ಅಲ್ಲ. ಹಾಗಾಗಿ ಗರಿಷ್ಠ ಮೂರು ವರ್ಷಕ್ಕೆ ವೀಸಾ ನೀಡುವ ಪದ್ಧತಿ ಇತ್ತು. ಈಗ ಎಚ್‍1ಬಿ ವೀಸಾ ನೀಡಿಕೆ ನಿಯಮಗಳನ್ನು ಕಠಿಣಗೊಳಿಸಲಾಗಿದೆ. ಯಾವ ಕೆಲಸಕ್ಕೆ ವೀಸಾ ನೀಡಲಾಗಿದೆಯೋ ಆ ಕೆಲಸದ ಅವಧಿಗೆ ಮಾತ್ರ ವೀಸಾ ಮಂಜೂರು ಮಾಡಲಾಗುತ್ತದೆ.

ವಲಸಿಗರಲ್ಲದ, ಆದರೆ ವೃತ್ತಿಪರ ವೀಸಾದಲ್ಲಿ ಅಮೆರಿಕಕ್ಕೆ ಹೋಗುವ ವ್ಯಕ್ತಿಗಳ ಸಂಗಾತಿಗಳು (ಗಂಡ ಅಥವಾ ಹೆಂಡತಿ) ಮತ್ತು ಮಕ್ಕಳಿಗೆ ‘ಎಚ್‍’ ವರ್ಗದಲ್ಲಿ ವೀಸಾ ನೀಡಲಾಗುತ್ತದೆ. ಇವರು ಅಮೆರಿಕದಲ್ಲಿ ಇರುವಷ್ಟೂ ದಿನ ಅವಲಂಬಿತರಾಗಿಯೇ ಇರಬೇಕು ಎಂಬುದು ನಿಯಮ. ಎಷ್ಟೇ ಅರ್ಹತೆ, ಪ್ರತಿಭೆ ಇದ್ದರೂ, ಕೆಲಸಕ್ಕೆ ಸೇರುವ ಉತ್ಸಾಹ ಇದ್ದರೂ ಇವರು ಸಂಬಳಕ್ಕಾಗಿ ಕೆಲಸ ಮಾಡುವಂತಿಲ್ಲ. ಸ್ವಯಂ ಸೇವಕರಾಗಿ ಕೆಲಸ ಮಾಡುವುದಕ್ಕೆ ಅವಕಾಶ ಇದೆ. ಆದರೆ ಆ ಕೆಲಸ ಅಮೆರಿಕದ ಪೌರರು ಮಾಡಬಹುದಾದ ಸಂಬಳದ ಕೆಲಸ ಆಗಿದ್ದರೆ ‘ಎಚ್‍’ ವರ್ಗದ ವೀಸಾದಲ್ಲಿರುವವರು ಸ್ವಯಂಸೇವಕರಾಗಿಯೂ ಈ ಕೆಲಸ ಮಾಡುವಂತಿಲ್ಲ. ಆದರೆ ಈ ವೀಸಾದಲ್ಲಿ ಇರುವವರು ಶಿಕ್ಷಣ ಪಡೆಯುವುದಕ್ಕೆ ಅವಕಾಶ ಇದೆ. ‘ಎಚ್‍’ ವರ್ಗದ ವೀಸಾದಲ್ಲಿ ಇರುವವರಿಗೆ ಅಮೆರಿಕದಲ್ಲಿ ಬ್ಯಾಂಕ್‍ ಖಾತೆ ತೆರೆಯುವ ಹಕ್ಕೂ ಇಲ್ಲ.

ಆದರೆ, ಎಚ್‍1ಬಿ ವೀಸಾದಾರರ ಸಂಗಾತಿಗಳಿಗೆ ಕೆಲಸದ ಪರವಾನಗಿ ನೀಡುವ ನಿಯಮ ರೂಪಿಸಿ 2015ರಲ್ಲಿ ಅಧ್ಯಕ್ಷ ಬರಾಕ್‍ ಒಬಾಮ ವಿಶೇಷ ಆದೇಶ ಹೊರಡಿಸಿದರು. ಹಾಗಾಗಿ ಎಚ್‍4 ವೀಸಾ ಹೊಂದಿರುವವರಿಗೆ ಕೆಲಸ ಮಾಡುವ ಅವಕಾಶ ದೊರೆಯಿತು.

ಕೆಲಸದ ಪರವಾನಗಿ ರದ್ದತಿ ಸುದ್ದಿ ಅಧಿಕೃತವೇ?

ಅಮೆರಿಕದ ಪೌರತ್ವ ಮತ್ತು ವಲಸೆ ಸೇವಾ ವಿಭಾಗದ (ಯುಎಸ್‍ಸಿಐಎಸ್‍) ನಿರ್ದೇಶಕ ಫ್ರಾನ್ಸಿಸ್‍ ಸಿಸಾನಾ ಅವರು ಸೆನೆಟ್‍ನ ಕಾನೂನು ಸಮಿತಿಗೆ ಇದೇ 4ರಂದು ಪತ್ರ ಬರೆದು ಎಚ್‍4 ವೀಸಾದಾರರ ಕೆಲಸದ ಪರವಾನಗಿ ರದ್ದು ಮಾಡುವ ಪ್ರಸ್ತಾವವನ್ನು ಸರ್ಕಾರ ಹೊಂದಿದೆ ಎಂದು ತಿಳಿಸಿದ್ದಾರೆ. ವಲಸೆ ವ್ಯವಸ್ಥೆಯನ್ನು ಇನ್ನಷ್ಟು ಸಮಗ್ರಗೊಳಿಸುವ ಪ್ರಯತ್ನದ ಭಾಗವಾಗಿ ಈ ನಿಯಮ ಜಾರಿಗೆ ಬರಲಿದೆ. ಆಗಸ್ಟ್ ಕೊನೆಯೊಳಗೆ ಹೊಸ ನಿಯಮ ಜಾರಿಗೆ ಬರಬಹುದು ಎಂದು ಅವರು ಹೇಳಿದ್ದಾರೆ.

ಭಾರತದ ಕಳವಳಕ್ಕೆ ಕಾರಣವೇನು?

ಅಮೆರಿಕದಲ್ಲಿ ಈಗ 71 ಸಾವಿರಕ್ಕೂ ಹೆಚ್ಚು ಎಚ್‍4 ವೀಸಾದಾರರಿದ್ದಾರೆ. ಇವರಲ್ಲಿ ಶೇ 93ರಷ್ಟು ಭಾರತೀಯರು. ಒಟ್ಟು ವೀಸಾದಾರರ ಪೈಕಿ ಶೇ 94ರಷ್ಟು ಮಹಿಳೆಯರೇ ಇದ್ದಾರೆ. ಎಚ್‍4 ವೀಸಾದಾರರಲ್ಲಿ ಹೆಚ್ಚಿನವರು ಉನ್ನತ ವಿದ್ಯಾಭ್ಯಾಸ, ತಾಂತ್ರಿಕ ಮತ್ತು ವೃತ್ತಿಪರ ಪರಿಣತಿ ಹೊಂದಿರುವವರು. ಬಹಳಷ್ಟು ಮಂದಿ ಯಶಸ್ವಿ ವೃತ್ತಿಜೀವನವನ್ನು ಅಲ್ಲಿ ಕಟ್ಟಿಕೊಂಡಿದ್ದಾರೆ. ಹೊಸದಾಗಿ ಬರುವ ನಿಯಮ ಪೂರ್ವಾನ್ವಯ ಆದರೆ, ಇವರೆಲ್ಲರೂ ಮನೆಯೊಳಗೆ ಕುಳಿತುಕೊಳ್ಳಬೇಕಾಗುತ್ತದೆ. ಕೆಲಸದ ಪರವಾನಗಿ ರದ್ದು ಮಾಡುವ ನಿಯಮ ಬಹುತೇಕ ಖಚಿತವೇ ಆಗಿದೆ. ಆದರೆ ಅದು ಪೂರ್ವಾನ್ವಯ ಆಗಲಿದೆಯೇ ಎಂಬ ಬಗ್ಗೆ ಸದ್ಯಕ್ಕೆ ಸ್ಪಷ್ಟತೆ ಇಲ್ಲ.

ಪರವಾನಗಿ ರದ್ದತಿಯ ಹಿಂದಿನ ಉದ್ದೇಶವೇನು?

ವಲಸೆ ನೀತಿಯನ್ನು ಬಿಗಿಗೊಳಿಸುವುದು ಟ್ರಂಪ್‍ ಅವರು ಚುನಾವಣೆ ಸಂದರ್ಭದಲ್ಲಿ ನೀಡಿದ ಪ್ರಮುಖವಾದ ಭರವಸೆಯಾಗಿತ್ತು. ಟ್ರಂಪ್‍ ಅವರ ವಲಸೆ ಕಾರ್ಯಸೂಚಿಯನ್ನು ಜಾರಿಗೆ ತರಲು ಅಮೆರಿಕದ ಆಂತರಿಕ ಭದ್ರತೆ ವಿಭಾಗದ ಮುಖ್ಯಸ್ಥೆ ಕ್ರಿಸ್ಜೆನ್‍ ನೀಲ್ಸನ್‍ ಸತತವಾಗಿ ಪ್ರಯತ್ನಿಸುತ್ತಿದ್ದಾರೆ. ಈ ಪ್ರಯತ್ನಕ್ಕೆ ಸಾಕಷ್ಟು ಫಲವೂ ದೊರೆತಿದೆ.  ಈ ನವೆಂಬರ್‌ನಲ್ಲಿ ಅಮೆರಿಕದ ಸಂಸತ್ತಿಗೆ ಮಧ್ಯಂತರ ಚುನಾವಣೆ ನಡೆಯಲಿದೆ. ಹಾಗಾಗಿ, ಮತ ಗಳಿಕೆ ತಂತ್ರವಾಗಿ ವಲಸೆ ನಿರ್ಬಂಧದ ಕ್ರಮಗಳು ಮುನ್ನೆಲೆಗೆ ಬಂದಿವೆ ಎಂದು ಹೇಳಲಾಗುತ್ತಿದೆ. ಟ್ರಂಪ್‍ ಕ್ರಮಗಳು ಅಮೆರಿಕದ ವೃತ್ತಿಪರರು ಮತ ಚಲಾಯಿಸುವಂತೆ ಉತ್ತೇಜನ ನೀಡಬಹುದು ಎಂದು ವಿಶ್ಲೇಷಿಸಲಾಗುತ್ತಿದೆ.

ಟ್ರಂಪ್‌ ನಿರ್ಧಾರಕ್ಕೆ ವಿರೋಧ ವ್ಯಕ್ತವಾಗಿದೆಯೇ?

ಅಮೆರಿಕದ ಹಲವು ಪ್ರಭಾವಿ ಸಂಸದರು ಎಚ್‍4 ವೀಸಾದಾರರ ಕೆಲಸದ ಪರವಾನಗಿ ರದ್ದತಿಗೆ ವಿರೋಧ ವ್ಯಕ್ತಪಡಿಸಿದ್ದಾರೆ. ‘ಅಮೆರಿಕದ ವೃತ್ತಿ ಕ್ಷೇತ್ರದಿಂದ ಸಾವಿರಾರು ಜನರನ್ನು ಹಿಂದಕ್ಕೆ ಕಳುಹಿಸುವುದು ಅವರ ಕುಟುಂಬಗಳ ಮೇಲೆ ಪ್ರತಿಕೂಲ ಪರಿಣಾಮ ಬೀರಲಿದೆ. ಅಷ್ಟೇ ಅಲ್ಲ, ಅದು ಅಮೆರಿಕದ ಅರ್ಥ ವ್ಯವಸ್ಥೆಯನ್ನೂ ಬಾಧಿಸಲಿದೆ’ ಎಂದು ಸಿಲಿಕಾನ್‍ ವ್ಯಾಲಿಯ ಎ‍ಫ್‍ಡಬ್ಲ್ಯುಡಿ ಡಾಟ್‍ ಯುಎಸ್‍ ಸಂಸ್ಥೆ ಹೇಳಿದೆ. ಮಾಹಿತಿ ತಂತ್ರಜ್ಞಾನ ಕ್ಷೇತ್ರದ ದಿಗ್ಗಜ ಸಂಸ್ಥೆಗಳಾದ ಫೇಸ್‍ಬುಕ್‍, ಗೂಗಲ್‍ ಮತ್ತು ಮೈಕ್ರೊಸಾಫ್ಟ್ ಜತೆಯಾಗಿ ಈ ಸಂಸ್ಥೆಯನ್ನು ಸ್ಥಾಪಿಸಿವೆ. → v

ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.

ADVERTISEMENT
ADVERTISEMENT
ADVERTISEMENT
ADVERTISEMENT