ವಿವಿಧ ವಾದ್ಯ ಮೇಳಗಳು ಮೆರವಣಿಗೆಗೆ ಕಳೆ ತಂದವು. ಪಲ್ಲಕ್ಕಿಯಲ್ಲಿ ಅಮ್ಮ ಅವರ ಉತ್ಸವ ಮೂರ್ತಿಯನ್ನು ಇಟ್ಟು, ಭಕ್ತರು ಹೊತ್ತು ಸಾಗಿದರು. ಅದರ ಮುಂದೆ ಬಣ್ಣಬಣ್ಣಗಳಿಂದ ಅಲಂಕರಿಸಿದ ಎತ್ತಿನ ಬಂಡಿಗಳು ಸಾಗಿದವು. ಪೂರ್ಣಕುಂಭ ಹೊತ್ತ ಮಹಿಳೆಯರ ತಂಡ ಇದರ ಹಿಂದೆ ಸಾಗಿತು. ಸಮವಸ್ತ್ರದಲ್ಲಿ ಶಿಸ್ತಿನಿಂದ ಪಾಲ್ಗೊಂಡಿದ್ದ ಹಲವಾರು ಮಹಿಳೆಯರು ಮಾರ್ಗದುದ್ದಕ್ಕೂ ಭಕ್ತಿ ಹಾಡು, ಸಂಗೀತಕ್ಕೆ ಹೆಜ್ಜೆ ಹಾಕಿ ಸಂಭ್ರಮಿಸಿದರು. ಸಾಂಪ್ರದಾಯಿಕ ವೇಷಭೂಷಣದಲ್ಲಿ ಬಂದ ಯುವಕ– ಯುವತಿಯರು ಕೇಸರಿ ಪೇಠಾ ಧರಿಸಿ, ಡೋಲುಗಳನ್ನು ಬಾರಿಸಿ, ಹಾಡಿ ಕುಣಿದು ಸಂಭ್ರಮಿಸಿದರು.