ಬೆಳಗಾವಿ: ಮಗುವಿನ ಹೊಟ್ಟೆಯಲ್ಲಿದ್ದ 12 ಮ್ಯಾಗ್ನೆಟಿಕ್ ಗುಂಡಿಗಳು ಹೊರಕ್ಕೆ

‘ತೀವ್ರ ಹೊಟ್ಟೆನೋವು ಹಾಗೂ ಕಪ್ಪಾದ ಬಣ್ಣದ ಮಲ ವಿಸರ್ಜನೆ ಮಾಡುತ್ತಿದ್ದ ಗೋವಾದ ಆ ಮಗುವನ್ನು ಪೋಷಕರು ಆಸ್ಪತ್ರೆಗೆ ದಾಖಲಿಸಿದ್ದರು. ಕೋವಿಡ್–19 ಲಾಕ್‌ಡೌನ್‌ನಿಂದಾಗಿ ಚಿಕಿತ್ಸೆಗಾಗಿ ಪಾಲಕರು ವಿವಿಧೆಡೆ ಸುತ್ತಾಡಿ ಸುಸ್ತಾಗಿದ್ದರು. ಕೊನೆಗೆ ಗೋವಾ ಜಿಲ್ಲಾಡಳಿತದಿಂದ ಅನುಮತಿ ಪಡೆದು ಬೆಳಗಾವಿಗೆ ಬಂದಿದ್ದರು. ಮಗು ಜೀವನ್ಮರಣದ ನಡುವೆ ಹೋರಾಡುತ್ತಿತ್ತು’ ಎಂದು ವೈದ್ಯರು ತಿಳಿಸಿದ್ದಾರೆ.

‘ಎಕ್ಸರೇ ತೆಗೆದು ನೋಡಿದಾಗ ಹೊಟ್ಟೆಯಲ್ಲಿ ಯಾವುದೋ ವಸ್ತುಗಳು ಗೋಚರಿಸಿದವು. ಚಿಕ್ಕಮಕ್ಕಳ ತಜ್ಞಶಸ್ತ್ರಚಿಕಿತ್ಸಕ ಡಾ.ಸಂತೋಷ ಕುರಬೆಟ್ ಅವರು ಎರಡೂವರೆ ಗಂಟೆವರೆಗೆ ಶಸ್ತ್ರಚಿಕಿತ್ಸೆ ನೆರವೇರಿಸಿ ಮಗು ನುಂಗಿದ್ದ 12 ಆಯಸ್ಕಾಂತೀಯ ಬಟನ್ ಹೊರತೆಗೆಯುವಲ್ಲಿ ಯಶಸ್ವಿಯಾಗಿದ್ದಾರೆ’ ಎಂದು ಮಾಹಿತಿ ನೀಡಿದ್ದಾರೆ.

‘ಶಸ್ತ್ರಚಿಕಿತ್ಸೆ ನಂತರ 5ನೇ ದಿನಕ್ಕೆ ಹೊರಗಿನಿಂದ ಆಹಾರ ನೀಡಲು ಪ್ರಾರಂಭಿಸಲಾಗಿತ್ತು. ಕೇವಲ 7 ದಿನಗಳಲ್ಲಿ ಆಸ್ಪತ್ರೆಯಿಂದ ಮನೆಗೆ ಕಳುಹಿಸಿಕೊಡಲಾಯಿತು. ಈ ಮೊದಲು ದೇಶದಲ್ಲಿ 4–6 ಆಯಸ್ಕಾಂತದ ಆಟದ ಬಟನ್‌ಗಳನ್ನು ನುಂಗಿದ ವರದಿಯಾಗಿತ್ತು. ಆದರೆ, 12 ಬಟನ್‌ಗಳನ್ನು ನುಂಗಿದ ಪ್ರಕರಣ ಇದೇ ಮೊದಲು. ಆ ಮಗು ಇಂಗ್ಲಿಷ್‌ ಅಕ್ಷರ ಮಾಲೆಯ 12 ಆಯಸ್ಕಾಂತಗಳನ್ನು ನುಂಗಿದ್ದ’ ಎಂದು ತಿಳಿಸಿದ್ದಾರೆ.

‘ಮಕ್ಕಳು ಆಡುವಾಗ ಪಾಲಕರು ನಿರ್ಲಕ್ಷ ವಹಿಸದೆ ಅವರತ್ತ ಗಮನಹರಿಸಬೇಕು. ಒಬ್ಬೊಬ್ಬರನ್ನು ಬಿಡದೆ ಅವರೊಂದಿಗೆ ಇರಬೇಕು’ ಎಂದು ಡಾ.ಸಂತೋಷ್ ಸಲಹೆ ನೀಡಿದ್ದಾರೆ.

ವೈದ್ಯರು ಮತ್ತು ತಂಡವನ್ನು ಕೆಎಲ್‌ಇ ಸಂಸ್ಥೆಯ ಕಾರ್ಯಾಧ್ಯಕ್ಷ ಪ್ರಭಾಕರ ಕೋರೆ ಹಾಗೂ ಆಡಳಿತ ಮಂಡಳಿ ಸದಸ್ಯರು, ಆಸ್ಪತ್ರೆಯ ವೈದ್ಯಕೀಯ ನಿರ್ದೇಶಕ ಡಾ.ಎಂ. ಜಾಲಿ, ಜೆಎನ್ಎಂಸಿ ಪ್ರಾಚಾರ್ಯೆ ಡಾ.ನಿರಂಜನಾ ಮಹಾಂತಶೆಟ್ಟಿ ಅಭಿನಂದಿಸಿದ್ದಾರೆ.