ಬೆಳಗಾವಿ: ಗಣೇಶ ಚತುರ್ಥಿಗೆ ದಸರೆ ಗೊಂಬೆ ಮೆರಗು

ಬೆಳಗಾವಿ: ಇಲ್ಲಿನ ವಡಗಾವಿಯ ರೈತ ಗಲ್ಲಿಯ ಮನೆಗಳಲ್ಲಿ ಆಚರಿಸುವ ಚತುರ್ಥಿ ರಾಜ್ಯದಲ್ಲೇ ವಿಶಿಷ್ಟ.
ಇಲ್ಲಿನ ರೈತರು ವರ್ಣರಂಜಿತ ಗೊಂಬೆಗಳನ್ನು ಕೂಡ್ರಿಸಿ, ಚತುರ್ಥಿಗೆ ದಸರೆಯ ಸ್ಪರ್ಶ ನೀಡಿದ್ದಾರೆ. 30 ಕುಟುಂಬಗಳು, 29 ವರ್ಷಗಳಿಂದ ಆಚರಣೆ ಮುಂದುವರಿಸಿಕೊಂಡು ಬಂದಿವೆ. ಕಳೆದ ಐದು ದಿನಗಳಲ್ಲಿ ಈ ಮನೆಗಳಿಗೆ 1 ಲಕ್ಷ ಜನ ಭೇಟಿ ನೀಡಿದ್ದಾರೆ.

ಈ ಪ್ರದೇಶದಲ್ಲಿ ಶೇ 98ರಷ್ಟು ರೈತರೇ ಇರುವ ಕಾರಣ ಇದಕ್ಕೆ 'ರೈತ ಗಲ್ಲಿ’ ಎಂದೇ ಹೆಸರು. ಚತುರ್ಥಿ ಬಂದರೆ ಇಡೀ ಗಲ್ಲಿಯಲ್ಲಿ ಸಂಭ್ರಮ. ಪ್ರತಿ
ಮನೆಯಲ್ಲೂ ವಿಶಿಷ್ಟ ಶೈಲಿಯ, ವಿವಿಧ ಅವತಾರಗಳ ಮೂರ್ತಿಗಳ ಪ್ರತಿಷ್ಠಾಪಿಸುತ್ತಾರೆ.

ಚತುರ್ಥಿಯ ಎಲ್ಲ 11 ದಿನಗಳೂ ಇಲ್ಲಿ ಜನವೋ ಜನ. ಮಧ್ಯಾಹ್ನ 4ಕ್ಕೆ ಮೂರ್ತಿ ವೀಕ್ಷಣೆ ಆರಂಭವಾದರೆ ಮಾರನೇ ದಿನದ ನಸುಕಿನ 4ರವರೆಗೂ ನಿರಂತರ 12 ತಾಸು
ಜನಜಂಗುಳಿ.

ಮುಂಬೈ ನಗರದ ನಂತರ ಬೆಳಗಾವಿಯಲ್ಲೇ ಚತುರ್ಥಿ ವೈಭವ ದೊಡ್ಡದು. ಈ ಬಾರಿ ಗಲ್ಲಿಗಲ್ಲಿಗಳಲ್ಲಿ, ವೃತ್ತ, ಚೌಕಗಳಲ್ಲಿ 350ಕ್ಕೂ ಹೆಚ್ಚು
ಬೃಹತ್‌ ಮೂರ್ತಿಗಳ ಪ್ರತಿಷ್ಠಾಪನೆ ಮಾಡಲಾಗಿದೆ. ಇವುಗಳ ಸಡಗರ ನೋಡಲು ಲಕ್ಷಾಂತರ ಜನ ಬರುತ್ತಾರೆ. ಆದರೆ, ರೈತ ಗಲ್ಲಿಯ ಮೂರ್ತಿಗಳು ಒಂದೂವರೆ ಅಡಿಯಿಂದ ಮೂರು ಅಡಿಯಷ್ಟು ಮಾತ್ರ ಇವೆ. ಅಲಂಕಾರದ ಕಾರಣಕ್ಕೇ ಇಲ್ಲಿಗೂ ಜನ ಮುಗಿಬೀಳುತ್ತಾರೆ.

ಆಕರ್ಷಣೆ ಏನೇನು?: ಈ ಬಾರಿಯೂ ಪೌರಾಣಿಕ ಕಥೆಗಳು, ಐತಿಹಾಸಿಕ ಘಟನೆಗಳು, ಸಾಮಾಜಿಕ ಚಿಂತನೆಗಳು, ಕೃಷಿಕರ ಬದುಕು, ಜನಪದ ಆಚರಣೆಗಳು, ಅತ್ಯಾಧುನಿಕ
ಪ್ರಪಂಚದ ಬೆಳವಣಿಗೆಗಳನ್ನು ಆಧರಿಸಿ ಗೊಂಬೆಗಳ ಅಲಂಕಾರ ಮಾಡಲಾಗಿದೆ. ಅಂಗೈನಲ್ಲಿ ಇಟ್ಟುಕೊಳ್ಳ
ಬಹುದಾದ ಪುಟಾಣಿ ಗೊಂಬೆಗಳಿಂದ ಹಿಡಿದು ಐದಡಿ ಎತ್ತರದವೂ ಇವೆ. ಪ್ರತಿಯೊಂದು ಗೊಂಬೆಗೂ ಯಂತ್ರಗಳ ಮೂಲಕ ಚಲನಶೀಲತೆ ನೀಡಲಾಗಿದೆ. ಹೀಗಾಗಿ, ಈ ಅಲಂಕಾರಗಳಿಗೆ ಜೀವಂತಿಕೆ ಬಂದಿದೆ.

0.25 ಎಚ್‌.ಪಿ ಮೋಟರ್‌, ಟೇಬಲ್‌ ಫ್ಯಾನಿನಲ್ಲಿ ಬಳಸುವ ಯಂತ್ರಗಳು, ಕೀಲಿ ಕೊಡುವ ಆಟದ ಗಾಡಿಗಳನ್ನು ಬಳಸಿ ಗೊಂಬೆಗಳು ತಿರುಗುವಂತೆ, ಕುಣಿಯುವಂತೆ, ಕೆಲಸ ಮಾಡುವಂತೆ ಚಲನಶೀಲತೆ ನೀಡಿದ್ದು ನಿಬ್ಬೆರಗು ಮೂಡಿಸುತ್ತದೆ. ಕಟ್ಟಿಗೆ, ರಬ್ಬರ್‌, ಬಟ್ಟೆಗಳಿಂದ ಮಾಡಿದ ಮದ್ದಾದ ಗೊಂಬೆಗಳ ಓಡಾಟವೇಚಂದ.

ಕರ್ನಾಟಕ, ಮಹಾರಾಷ್ಟ್ರ, ಗೋವಾ, ಆಂಧ್ರ, ಗುಜರಾತ್‌ನಿಂದಲೂ ಅಲಂಕಾರ ನೋಡಲು ಬರುತ್ತಾರೆ. ಇಲ್ಲಿನ ಥೀಮ್, ಆಕರ್ಷಣೆ, ತಾಂತ್ರಿಕ ಕೌಶಲ, ಗೊಂಬೆಗಳ ಬಗ್ಗೆ ಅಧ್ಯಯನಕ್ಕಾಗಿಯೇ ಹಲವರು ಬರುತ್ತಾರೆ.

ರೈತರಾದ ರಘುನಾಥ ಡೋಗರೆ, ಅಪ್ಪಯ್ಯ ಸಪಲೆ, ವೆಂಕಟೇಶ ಹೊಸೂರಕರ, ರಾಜು ತಾರಿಹಾಳಕರ, ಅಮೃತ್ ಧಾಮನೇಕರ, ಮಾರುತಿ ಭಿರ್ಜೆ, ಭೈರು ತಾರಿಹಾಳಕರ, ಮನೋಹರ ಕಾಜೋಳಕರ, ತಾನಾಜಿ ಹಲಗೇಕರ, ದತ್ತಾ ಕಾಜೋಳಕರ, ಆದಿನಾಥ ಮಠಕರ, ನಾಗೇಂದ್ರ ಕಾಜೋಳಕರ, ದೇವಕುಮಾರ ತಾರಿಹಾಳಕರ ಅವರು ಅಲಂಕಾರ ಮಾಡಿದ್ದಾರೆ.