ನಾನೇ ಬಿಡುಗಡೆ ಕೋರಿದ್ದೆ, ಬೇಸರವೇನಿಲ್ಲ: ಲಕ್ಷ್ಮಿ ಹೆಬ್ಬಾಳಕರ

* ದಿಢೀರನೆ ನಿಮಗೆ ಕೊಕ್ ನೀಡಲಾಗಿದೆಯಲ್ಲಾ?
ಇದು ದಿಢೀರ್‌ ಬೆಳವಣಿಗೆ ಏನಲ್ಲ. ಶಾಸಕಿಯಾಗಿ ಆಯ್ಕೆಯಾದ ನಂತರ ನಾವೇ ಎಐಸಿಸಿಗೆ ಪತ್ರ ಬರೆದಿದ್ದೆ. ಕ್ಷೇತ್ರಕ್ಕೆ ಹೆಚ್ಚಿನ ಸಮಯ ನೀಡಬೇಕಿರುವುದರಿಂದ ಸಂಘಟನೆಗೆ ಹೆಚ್ಚಿನ ಸಮಯ ಕೊಡುವುದಕ್ಕೆ ಆಗುತ್ತಿಲ್ಲ ಎಂದು ತಿಳಿಸಿದ್ದೆ. ಇದನ್ನು ವರಿಷ್ಟರು ಪರಿಗಣಿಸಿದ್ದಾರೆ. 6 ವರ್ಷ ಕಾಂಗ್ರೆಸ್‌ ಘಟಕ, ಮೂರು ಮುಕ್ಕಾಲು ವರ್ಷ ಮಹಿಳಾ ಘಟಕದ ಅಧ್ಯಕ್ಷೆಯಾಗಿ ಕೆಲಸ ಮಾಡಿದ್ದೇನೆ. 15 ಮಂದಿಯ ಹೆಸರನ್ನು ನಾನೇ ಸೂಚಿಸಿದ್ದೆ. ಅವರಲ್ಲಿ ಐದು ಮಂದಿಯ ಅಂತಿಮ ಪಟ್ಟಿ ಸಿದ್ಧಪಡಿಸಿ, ಪುಷ್ಪಾ ಅವರಿಗೆ ಅವಕಾಶ ಕೊಡಲಾಗಿದೆ. ನನ್ನೊಂದಿಗೆ ಸಮಾಲೋಚನೆ ನಡೆಸಿಯೇ ಎಲ್ಲ ಬೆಳವಣಿಗೆಗಳೂ ನಡೆದಿವೆ. ನೂತನ ಅಧ್ಯಕ್ಷರು ಸಮರ್ಥರಿದ್ದಾರೆ. ಅವರಿಗೆ ಸಹಕಾರ, ಮಾರ್ಗದರ್ಶನ ನೀಡುತ್ತೇನೆ.

* ಪಿಎಲ್‌ಡಿ ಬ್ಯಾಂಕ್‌ ಅಧ್ಯಕ್ಷ, ಉಪಾಧ್ಯಕ್ಷರ ಚುನಾವಣೆಯಲ್ಲಿ ಜಾರಕಿಹೊಳಿ ಸಹೋದರರ ನಡುವೆ ಉಂಟಾದ ಭಿನ್ನಮತದ ಪರಿಣಾಮವೇ ಇದು?
ಇಲ್ಲ. ಅದಕ್ಕೂ– ಇದಕ್ಕೂ ಎಳ್ಳಷ್ಟೂ ಸಂಬಂಧವಿಲ್ಲ. ನಾನೇ ಬೇಡ ಎಂದು ಹೇಳಿದ್ದ ಮೇಲೆ ಕಿತ್ತುಕೊಳ್ಳಲಾಗಿದೆ ಎಂಬ ಪ್ರಶ್ನೆಯೇ ಉದ್ಭವಿಸುವುದಿಲ್ಲ. ಮುಂಬರುವ ಲೋಕಸಭಾ ಚುನಾವಣೆಯಲ್ಲಿ ಪಕ್ಷದ ಅಭ್ಯರ್ಥಿಗೆ ನನ್ನ ಕ್ಷೇತ್ರದಿಂದ ಹೆಚ್ಚಿನ ಮತಗಳನ್ನು ಗಳಿಸಿಕೊಡಬೇಕಿದೆ. ಇದಕ್ಕಾಗಿ ಕ್ಷೇತ್ರ ಅಭಿವೃದ್ಧಿಗೆ ಗಮನಹರಿಸುತ್ತೇನೆ.

* ಹುದ್ದೆ ನಿರ್ವಹಿಸಿದ ಬಗ್ಗೆ ತೃಪ್ತಿ ಇದೆಯೇ?
ಹೌದು. ಇತರ ಯಾವುದೇ ಪಕ್ಷಗಳ ಮಹಿಳಾ ಘಟಕಗಳು ಮಾಡದಷ್ಟು ಕ್ರಿಯಾಶೀಲವಾಗಿ ನಾವು ಕೆಲಸ ಮಾಡಿದ್ದೇವೆ. ಘಟಕದ ವರ್ಚಸ್ಸು ವೃದ್ಧಿಸಿದ ಸಮಾಧಾನವಿದೆ. ಆ ಕುರ್ಚಿಗೆ ಗೌರವ ತಂದುಕೊಟ್ಟಿದ್ದೇನೆ; ಸಮರ್ಥವಾಗಿ ನ್ಯಾಯ ಒದಗಿಸಿದ್ದೇನೆ. ಅದರಿಂದ ನನಗೂ ಗೌರವ ದೊರೆತಿದೆ. ಮುಂದೆಯೂ ಪಕ್ಷದಿಂದ ನೀಡುವ ಜವಾಬ್ದಾರಿಯನ್ನು ಶ್ರದ್ಧೆ, ಭಕ್ತಿಯಿಂದ ನಿರ್ವಹಿಸುವೆ.

* ನಿಮ್ಮ ಅವಧಿಯಲ್ಲಾದ ಪ್ರಮುಖ ಕಾರ್ಯಕ್ರಮಗಳೇನು?
ಸಂಘಟನೆಗೆ ಹೆಚ್ಚಿನ ಒತ್ತು ನೀಡಿದ್ದೆ. ವರ್ಷವಿಡೀ ಇಂದಿರಾ ನಮನ–ದೀಪ ನಮನ ಕಾರ್ಯಕ್ರಮ ನಡೆಸಿದೆ. ಮಹಿಳೆಯರಿಗಾಗಿ ಅರಿಸಿನ–ಕುಂಕುಮ ಕಾರ್ಯಕ್ರಮವನ್ನು ರಾಜ್ಯದ ಎಲ್ಲ 224 ಕ್ಷೇತ್ರಗಳಲ್ಲೂ ಮಾಡಿದ್ದೇವೆ. ಮಹಿಳಾ ಕಾರ್ಯಕರ್ತೆಯರು ಗ್ರಾಮ ವಾಸ್ತವ್ಯ ನಡೆಸಿದ್ದು ಇತಿಹಾಸದಲ್ಲೇ ಮೊದಲು. ಮಹಿಳಾ ಮೀಸಲಾತಿ ಜಾರಿಗೊಳಿಸಲು ಆಗ್ರಹಿಸಿ, ಅಗತ್ಯ ವಸ್ತುಗಳ ಬೆಲೆ ಏರಿಕೆ ವಿರೋಧಿಸಿ 4 ಬಾರಿ ನೂರಾರು ಮಹಿಳೆಯರೊಂದಿಗೆ ಸಂಸತ್ತಿಗೆ ಮುತ್ತಿಗೆ ಹಾಕಿದ್ದೆವು. ಪಕ್ಷದಿಂದ ನಡೆಸಿದ ‘ಪ್ರಾಜೆಕ್ಟ್‌ ಶಕ್ತಿ’ ಕಾರ್ಯಕ್ರಮದ ಮೂಲಕ 1.02 ಲಕ್ಷ ಸದಸ್ಯರನ್ನು ನೋಂದಣಿ ಮಾಡಿಸಿದ ದೇಶದ 2ನೇ ಘಟಕ ನಮ್ಮದು. ಇದಕ್ಕಾಗಿ ಎಐಸಿಸಿ ಅಧ್ಯಕ್ಷ ರಾಹುಲ್‌ ಗಾಂಧಿ ಅವರು ಈಚೆಗೆ ಪ್ರಶಸ್ತಿಯನ್ನೂ ನೀಡಿದ್ದಾರೆ. ಇದಲ್ಲದೆ, ರಾಜ್ಯದಾದ್ಯಂತ ಹಲವು ಹೋರಾಟಗಳನ್ನು ನಡೆಸಿದ್ದೇನೆ. ಇದರಿಂದ ಪಕ್ಷ ಸಂಘಟನೆಗೆ ಅನುಕೂಲವಾಗಿದೆ.