ಇಂದಿರಾ ಕ್ಯಾಂಟೀನ್ ‘ಅಡುಗೆ ಮನೆ’ ಸಿದ್ಧ

7
ಎಲ್ಲ ಕ್ಯಾಂಟೀನ್‌ಗಳಿಗೂ ಇಲ್ಲಿಂದಲೇ ಆಹಾರ ಪೂರೈಕೆ

ಇಂದಿರಾ ಕ್ಯಾಂಟೀನ್ ‘ಅಡುಗೆ ಮನೆ’ ಸಿದ್ಧ

Published:
Updated:
ಬೆಳಗಾವಿಯ ನೆಹರೂ ನಗರದಲ್ಲಿ ಇಂದಿರಾ ಕ್ಯಾಂಟೀನ್ ಅಡುಗೆ ಮನೆಯ ಕಟ್ಟಡ ನಿರ್ಮಾಣಗೊಂಡಿದೆ

ಬೆಳಗಾವಿ: ಇಂದಿರಾ ಕ್ಯಾಂಟೀನ್‌ಗಳಿಗೆ ಬಿಸಿಯಾದ ಆಹಾರ ಪದಾರ್ಥ ಪೂರೈಸಲು ಇಲ್ಲಿನ ನೆಹರೂ ನಗರದ ಎಂಪಿಎಂಸಿ ರಸ್ತೆಯಲ್ಲಿ ‘ಕೇಂದ್ರೀಕೃತ ಅಡುಗೆ ಮನೆ’ ನಿರ್ಮಾಣ ಕಾಮಗಾರಿ ಪೂರ್ಣಗೊಂಡಿದೆ.

ಇದರೊಂದಿಗೆ, ನಗರದ ವಿವಿಧೆಡೆ ಸಿದ್ಧಗೊಂಡಿರುವ ಐದು ಕ್ಯಾಂಟೀನ್‌ಗಳ ಆರಂಭಕ್ಕೆ ಇದ್ದ ತೊಡಕು ನಿವಾರಣೆಯಾದಂತಾಗಿದೆ.

ಜನಸಾಮಾನ್ಯರಿಗೆ ಕಡಿಮೆ ದರದಲ್ಲಿ ಊಟ ಹಾಗೂ ಉಪಾಹಾರ ಒದಗಿಸಬೇಕು, ಹಸಿವು ಮುಕ್ತ ಕರ್ನಾಟಕ ನಿರ್ಮಾಣ ಮಾಡಬೇಕು ಎನ್ನುವ ಆಶಯದೊಂದಿಗೆ ಸಿದ್ದರಾಮಯ್ಯ ನೇತೃತ್ವದ ಹಿಂದಿನ ಸರ್ಕಾರದಲ್ಲಿ ಯೋಜನೆ ಜಾರಿಗೊಳಿಸಲಾಗಿದೆ. ಅದನ್ನು ಈಗಿನ ಜೆಡಿಎಸ್–ಕಾಂಗ್ರೆಸ್ ಸರ್ಕಾರದಲ್ಲೂ ಮುಂದುವರಿಸಲಾಗುತ್ತಿದೆ. ಜಿಲ್ಲೆಯಲ್ಲಿ ಮೊದಲಿಗೆ, ನಗರದ ಹಳೆ ಪುಣೆ–ಬೆಂಗಳೂರು ರಸ್ತೆಯ ತರಕಾರಿ ಮಾರುಕಟ್ಟೆ ಬಳಿ ಪಾಲಿಕೆ ಹಾಗೂ ದಂಡು ಮಂಡಳಿ ಸಹಯೋಗದಲ್ಲಿ ನಿರ್ಮಿಸಿರುವ ಕ್ಯಾಂಟೀನ್‌ ಮಾರ್ಚ್ 12ರಿಂದ ಪ್ರಾರಂಭವಾಗಿದ್ದು, ನಿತ್ಯ ನೂರಾರು ಮಂದಿಯ ಹಸಿವು ನೀಗಿಸುತ್ತಿದೆ.

ಎಲ್ಲ ಕಡೆಗೂ ಇಲ್ಲಿಂದಲೇ:

ಇಂದಿರಾ ಕ್ಯಾಂಟೀನ್‌ಗಳಲ್ಲಿಯೇ ಅಡುಗೆ ಸಿದ್ಧಪಡಿಸುವುದಿಲ್ಲ. ಬೇರೆಡೆ ತಯಾರಿಸಿದ್ದನ್ನು ತಂದು ಅಲ್ಲಿ ಬಡಿಸಲಾಗುತ್ತಿದೆ. ಇದರಂತೆ, ತರಕಾರಿ ಮಾರುಕಟ್ಟೆ ಬಳಿಯ ಕ್ಯಾಂಟೀನ್‌ಗೆ ಉಪಾಹಾರ ಹಾಗೂ ಊಟ ಪೂರೈಕೆಗೆ ಸದ್ಯಕ್ಕೆ ಪರ್ಯಾಯ ವ್ಯವಸ್ಥೆ ಮಾಡಲಾಗಿದೆ. ಕೆಲವೇ ದಿನಗಳಲ್ಲಿ ನೂತನ ಅಡುಗೆ ಮನೆಯಿಂದ ರವಾನೆಯಾಗಲಿದೆ.

ಈ ಕ್ಯಾಂಟೀನ್‌ಗಳಲ್ಲಿ ಕಡಿಮೆ ದರದಲ್ಲಿ ಉಪಾಹಾರ (₹ 5) ಹಾಗೂ ಊಟ (ತಲಾ ₹ 10, ಮಧ್ಯಾಹ್ನ ಹಾಗೂ ರಾತ್ರಿ ಲಭ್ಯ) ನೀಡಲಾಗುತ್ತದೆ. ಬೆಳಿಗ್ಗೆ 500 ಮಂದಿಗೆ ಉಪಾಹಾರ, ಮಧ್ಯಾಹ್ನ ಹಾಗೂ ರಾತ್ರಿ ತಲಾ 500 ಊಟ ಮಾರಲಾಗುತ್ತದೆ. ನಗರದ ಆರು ಕ್ಯಾಂಟೀನ್‌ಗಳಿಗೆ ನಿತ್ಯ 3000 ಉಪಾಹಾರ ಹಾಗೂ ಊಟವನ್ನು ನೆಹರೂನಗರದ ಅಡುಗೆಮನೆಯಲ್ಲಿ ಸಿದ್ಧಪಡಿಸಲು ಯೋಜಿಸಲಾಗಿದೆ.

ಪಾಲಿಕೆ ಸೇರಿದ, ತಿಪ್ಪೆಗುಂಡಿಯಂತಾಗಿದ್ದ ಈ ಜಾಗದಲ್ಲಿದ್ದ ತ್ಯಾಜ್ಯ ಹಾಗೂ ಹೂಳು ತೆರವುಗೊಳಿಸಿ ಕಟ್ಟಡ ನಿರ್ಮಿಸಲಾಗುತ್ತಿದೆ. ಅಡುಗೆ ಮನೆ ಮುಂದೆಯೇ ಕ್ಯಾಂಟೀನ್ ಕೂಡ ತಲೆಎತ್ತಿದೆ. ಇದು ಆರಂಭಗೊಂಡರೆ, ಆ ಭಾಗದ ಜನರಿಗೆ ಅನುಕೂಲವಾಗಲಿದೆ.

ವಾರದಲ್ಲಿ ಆರಂಭ:

‘ಅಡುಗೆ ಮನೆಗೆ ಕಟ್ಟಡ ನಿರ್ಮಾಣಗೊಂಡಿದೆ. ಬಾಯ್ಲರ್‌ಗಳ ಅಳವಡಿಕೆ, ಒಳಾಂಗಣದ ಕೆಲಸ ಬಾಕಿ ಇದೆ. ಇನ್ನೊಂದು ವಾರದಲ್ಲಿ ಸಿದ್ಧಪಡಿಸಲು ಸೂಚಿಸಲಾಗಿದೆ. ಜಿಲ್ಲಾಧಿಕಾರಿ ಕಚೇರಿಯಿಂದ ಟೆಂಡರ್‌ ನೀಡಲಾಗಿದೆ. ಆ ಕಂಪನಿಯವರು ಅಗತ್ಯ ಸಿಬ್ಬಂದಿ ನೇಮಿಸಿಕೊಂಡು, ಗುಣಮಟ್ಟದ ಉಪಾಹಾರ ಹಾಗೂ ಊಟವನ್ನು ಸಮರ್ಪಕವಾಗಿ ಕ್ಯಾಂಟೀನ್‌ಗಳಿಗೆ ಪೂರೈಸುವ ಕೆಲಸ ಮಾಡಬೇಕು ಎಂದು ಸೂಚಿಸಲಾಗಿದೆ. ಇದಕ್ಕೆ ಬೇಕಾಗುವ ವಾಹನಗಳನ್ನು ಅವರೇ ಹೊಂದಿಸಿಕೊಳ್ಳಬೇಕು’ ಎಂದು ಪಾಲಿಕೆ ಆಯುಕ್ತ ಶಶಿಧರ ಕುರೇರ ‘ಪ್ರಜಾವಾಣಿ’ಗೆ ತಿಳಿಸಿದರು.

‘ಅಲ್ಲಿ ಕಾಂಪೌಂಡ್‌ ಕೂಡ ನಿರ್ಮಿಸಲಾಗುವುದು. ಸುತ್ತಲೂ ಚರಂಡಿ ನಿರ್ಮಾಣವೂ ಪ್ರಗತಿಯಲ್ಲಿದೆ. ಅಡುಗೆ ಮನೆ ಸಿದ್ಧಗೊಂಡ ನಂತರ, ಉಳಿದ ಐದು ಕ್ಯಾಂಟೀನ್‌ಗಳನ್ನು ಆರಂಭಿಸುವುದಕ್ಕೂ ಕ್ರಮ ವಹಿಸಲಾಗಿದೆ. ಇವುಗಳನ್ನು ಆರಂಭಿಸಲು ಕೇಂದ್ರೀಕೃತ ಅಡುಗೆ ಮನೆ (ಮಾಸ್ಟರ್ ಕಿಚನ್) ಅತ್ಯಗತ್ಯವಾಗಿತ್ತು. ಏಕೆಂದರೆ, ಎಲ್ಲ ಕ್ಯಾಂಟೀನ್‌ಗಳಿಗೂ ಒಂದೇ ಅಡುಗೆ ಮನೆಯಿಂದ ಉಪಾಹಾರ ಹಾಗೂ ಊಟ ಒದಗಿಸುವುದು ಸರ್ಕಾರ ಉದ್ದೇಶವಾಗಿದೆ’ ಎಂದು ಹೇಳಿದರು.

ನಗರದಲ್ಲಿ 6 ಸೇರಿ ಜಿಲ್ಲೆಯ ವಿವಿಧ ತಾಲ್ಲೂಕು ಕೇಂದ್ರಗಳಲ್ಲಿ 16 ಇಂದಿರಾ ಕ್ಯಾಂಟೀನ್‌ಗಳನ್ನು ಆರಂಭಿಸುವ ಗುರಿ ಜಿಲ್ಲಾಡಳಿತದ್ದು.

ನಗರದಲ್ಲಿ ಎಲ್ಲ ಇಂದಿರಾ ಕ್ಯಾಂಟೀನ್‌ಗಳನ್ನೂ ಕೆಲವೇ ದಿನಗಳಲ್ಲಿ ಉದ್ಘಾಟಿಸಲಾಗುವುದು. ಇದರಿಂದ ಆ ಭಾಗದ ಸಾರ್ವಜನಿಕರಿಗೆ ಅನುಕೂಲವಾಗಲಿದೆ
- ಶಶಿಧರ ಕುರೇರಆಯುಕ್ತ, ನಗರಪಾಲಿಕೆ

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 1

    Angry

Comments:

0 comments

Write the first review for this !