ಬೆಳಗಾವಿ: ತನ್ನ ಜೊತೆ ವಿವಾಹೇತರ ಸಂಬಂಧ ಹೊಂದಿದ್ದ ಮಹಿಳೆಯ ಮೂರು ವರ್ಷದ ಗಂಡು ಮಗುವನ್ನು ಹತ್ಯೆ ಮಾಡಿದ ಆರೋಪಿ ಪರಶುರಾಮ ಎಸ್‌. ಜಾಧವ (28) ಅವರನ್ನು ಪೊಲೀಸರು ಶನಿವಾರ ರಾಯಬಾಗದಲ್ಲಿ ಬಂಧಿಸಿದ್ದಾರೆ.
ಪರಶುರಾಮ ಅವರು ಲಕ್ಷ್ಮಿ (35) ಅವರ ಜೊತೆ ವಿವಾಹೇತರ ಸಂಬಂಧ ಹೊಂದಿದ್ದರು. ಇದಕ್ಕೂ ಮೊದಲು ಲಕ್ಷ್ಮಿ ಅವರು ಅಶೋಕ ಬಗಾಡೆ ಅವರನ್ನು ವಿವಾಹವಾಗಿದ್ದರು. ಅವರಿಗೆ 3 ವರ್ಷದ ಗಂಡು ಮಗು ಇತ್ತು. ನಂತರ ಲಕ್ಷ್ಮಿ ಅವರು ಪರಶುರಾಮ ಜೊತೆ ಸಂಬಂಧ ಹೊಂದಿದ್ದರು.
‘ತನ್ನ ಆಸ್ತಿಯಲ್ಲಿ ಪಾಲು ಕೇಳಬಾರದೆನ್ನುವ ಉದ್ದೇಶದಿಂದ ಪರಶುರಾಮ ಚಪಾತಿ ಮಾಡಲು ಬಳಸುವ ಲಟ್ಟಣಿಗೆಯಿಂದ ಮಗುವಿನ ತಲೆಗೆ ಹೊಡೆದು ಹತ್ಯೆ ಮಾಡಿದ್ದರು ಎನ್ನುವುದು ವಿಚಾರಣೆಯಿಂದ ತಿಳಿದುಬಂದಿದೆ’ ಎಂದು ಜಿಲ್ಲಾ ಪೊಲೀಸ್‌ ವರಿಷ್ಠಾಧಿಕಾರಿ ಸುಧೀರಕುಮಾರ್‌ ರೆಡ್ಡಿ ತಿಳಿಸಿದರು.
