‘ದಾಖಲೆ’ಯ ಶೇ 78ರಷ್ಟು ಮಳೆ ಕೊರತೆ!

ಬುಧವಾರ, ಜೂನ್ 19, 2019
27 °C
ಹೋದ ವರ್ಷ ವಾಡಿಕೆಗಿಂತ ಶೇ 18ರಷ್ಟು ಹೆಚ್ಚಿನ ‍ಮಳೆಯಾಗಿತ್ತು

‘ದಾಖಲೆ’ಯ ಶೇ 78ರಷ್ಟು ಮಳೆ ಕೊರತೆ!

Published:
Updated:
Prajavani

ಬೆಳಗಾವಿ: ಜಿಲ್ಲೆಯಲ್ಲಿ ಪೂರ್ವ ಮುಂಗಾರು ಅವಧಿಯಲ್ಲಿ ವಾಡಿಕೆಗಿಂತ ಶೇ 78ರಷ್ಟು ಕಡಿಮೆ ಪ್ರಮಾಣದ ಮಳೆಯಾಗಿರುವುದು ಆತಂಕ ಮತ್ತು ಕಳವಳಕ್ಕೆ ಕಾರಣವಾಗಿದೆ.

ಮಾರ್ಚ್‌, ಏಪ್ರಿಲ್‌ ಹಾಗೂ ಮೇ ತಿಂಗಳ ಅವಧಿಯನ್ನು ಪೂರ್ವ ಮುಂಗಾರು ಎಂದು ಪರಿಗಣಿಸಲಾಗುತ್ತದೆ. ಈ ಅವಧಿಯಲ್ಲಿ ಬೀಳುವ ಮಳೆಯು ಕೃಷಿ ಚಟುವಟಿಕೆಗಳಿಗೆ ‘ಜೀವ’ ನೀಡುತ್ತದೆ. ಅನ್ನದಾತರು ಭೂಮಿ ಹಸನು ಮಾಡಿಕೊಳ್ಳಲು ಅನುಕೂಲಕರವಾಗಿರುತ್ತದೆ. ಅದರಲ್ಲೂ ಜಿಲ್ಲೆಯಲ್ಲಿ ಮೇ 2ನೇ ವಾರದಿಂದ ಆಗುವ ಮಳೆ ಕೃಷಿ ಚಟುವಟಿಕೆಗಳಿಗೆ ಪೂರಕವಾಗಿರುತ್ತದೆ. ಆದರೆ, ಹಿಂದಿನ ವರ್ಷಗಳಿಗೆ ಹೋಲಿಸಿದರೆ ಈ ಬಾರಿ ಕೊರತೆಯ‍ ಪ್ರಮಾಣವೇ ಜಾಸ್ತಿಯಾಗಿರುವುದು ಅಂಕಿ–ಅಂಶಗಳಿಂದ ಕಂಡುಬರುತ್ತಿದೆ.

ಹೋದ ವರ್ಷದ ಚಿತ್ರಣ:

ಜಿಲ್ಲೆಯಲ್ಲಿ ವಾಡಿಕೆಯಂತೆ, ಮಾರ್ಚ್‌ನಿಂದ ಮೇ 21ರವರೆಗೆ 76.7 ಮಿ.ಮೀ. ಮಳೆಯಾಗಬೇಕಿತ್ತು. ಆದರೆ, ಆಗಿರುವುದು ಶೇ 17.1ರಷ್ಟು ಮಾತ್ರ. ಆದರೆ, ಇದೇ ಅವಧಿಯಲ್ಲಿ ಹೋದ ವರ್ಷ (2018ರಲ್ಲಿ) ವಾಡಿಕೆಯಂತೆ ಬೀಳಬೇಕಿದ್ದ ಮಳೆ 74. ಮಿ.ಮೀ. ಇತ್ತು. ಅದರಲ್ಲಿ 87 ಮಿ.ಮೀ. ಅಂದರೆ ಶೇ 18ರಷ್ಟು ಮಳೆ ಜಾಸ್ತಿ ಬಿದ್ದಿತ್ತು. ಆಗ, 21ಸಾವಿರ ಹೆಕ್ಟೇರ್‌ ಪ್ರದೇಶದಲ್ಲಿ ಬಿತ್ತನೆಯೂ ನಡೆದಿತ್ತು! ಆದರೆ, ಈ ಬಾರಿ ಮಳೆಯು ಸಮಾಧಾನಕರವಾದ ಪ್ರಮಾಣದಲ್ಲಿ ಆಗಿರುವುದರಿಂದ ಬಿತ್ತನೆಯೂ ನಡೆದಿಲ್ಲ!

2017 ಹಾಗೂ 2016ರಲ್ಲೂ ಪೂರ್ವ ಮುಂಗಾರು ಮಳೆಯು ಆಶಾದಾಯಕವಾಗಿ ಸುರಿದಿತ್ತು. ಇತ್ತೀಚಿನ ವರ್ಷಗಳಿಗೆ ಹೋಲಿಸಿದರೆ, ಈ ಬಾರಿ ಮಳೆ ಕೈಹಿಡಿಯಲಿಲ್ಲ. ಇದು, ಪ್ರತಿಕೂಲ ವಾತಾವರಣಕ್ಕೆ ಕಾರಣವಾಗಿದೆ. ಮಳೆಯಾಗದೇ ಇರುವುದರಿಂದ, ಜಾನುವಾರುಗಳಿಗೆ ಹಸಿರು ಮೇವಿನ ಕೊರತೆ ಉಂಟಾಗಿದೆ. ಅಂತರ್ಜಲ ಮಟ್ಟ ಕುಸಿತವೂ ಉಂಟಾಗುತ್ತಿದೆ. ಕುಡಿಯುವ ನೀರಿಗೆ ಹಾಹಾಕಾರ ಉಂಟಾಗಿದೆ.

ಇಲ್ಲಿ ಸಾಮಾನ್ಯವಾಗಿ ಮೇ 2ನೇ ವಾರದಲ್ಲಿ ಮುಂಗಾರು ಪೂರ್ವ ಮಳೆ (ಅಡ್ಡ ಮಳೆ) ಉತ್ತಮವಾಗಿ ಆಗುವುದು ವಾಡಿಕೆ. ಆದರೆ, ಮೇ 4ನೇ ವಾರವಾದರೂ ಮಳೆಯ ಸುಳಿವಿಲ್ಲ. ಕೆಲವೆಡೆ ಕೆಲವು ನಿಮಿಷ ತುಂತುರು ಅಥವಾ ಸಾಧಾರಣ ಮಳೆಯಾಗಿದ್ದು ಬಿಟ್ಟರೆ ಬಹುತೇಕ ತಾಲ್ಲೂಕುಗಳು ಮಳೆ ಕೊರತೆ ಎದುರಿಸುತ್ತಿವೆ. ಇದರಿಂದ ತಾ‍ಪಮಾನ ಪ್ರಮಾಣ ಏರುತ್ತಲೇ ಇದೆ. ಬಿಸಿಲಿನ ಝಳದಿಂದಾಗಿ ಜನರು ಹೈರಾಣಾಗಿ ಹೋಗಿದ್ದಾರೆ. ನದಿ, ಕೆರೆ, ಕಟ್ಟೆಗಳು ಬರಿದಾಗಿವೆ. ಪರಿಣಾಮವಾಗಿ, ಜಾನುವಾರುಗಳು ಮೇವು, ನೀರು ಹಾಗೂ ನೆರಳಿಗಾಗಿ ಪರದಾಡುತ್ತಿರುವುದು ಸಾಮಾನ್ಯವಾಗಿದೆ.

‘ರೋಹಿಣಿ’ ಬಂದರೆ ಅನುಕೂಲ:

‘ವಾಡಿಕೆಗಿಂತ (ಪೂರ್ವ ಮುಂಗಾರು) ತೀವ್ರ ಕೊರತೆ ಉಂಟಾಗಿದೆ. ಏಪ್ರಿಲ್‌ ನಂತರ ಮಳೆಯಾಗಿಲ್ಲ. ಮಳೆ ಬಿದ್ದಿದ್ದರೆ ರೈತರು ಕೃಷಿ ಭೂಮಿ ಹಸನುಗೊಳಿಸಲು ನೆರವಾಗುತ್ತಿತ್ತು. ಭೂಮಿ ತಂಪಾಗುತ್ತಿತ್ತು. ಇದು ಬಿತ್ತನೆಗೆ ಅನುಕೂಲವಾಗುತ್ತಿತ್ತು’ ಎಂದು ಕೃಷಿ ಇಲಾಖೆ ಜಂಟಿ ನಿರ್ದೇಶಕ ಜಿಲಾನಿ ಎಚ್. ಮೊಕಾಶಿ ‘ಪ್ರಜಾವಾಣಿ’ಗೆ ಪ್ರತಿಕ್ರಿಯಿಸಿದರು.

‘ಮುಂದಿನ ದಿನಗಳಲ್ಲಿ ‘ರೋಹಿಣಿ’ ಮಳೆಯಾದರೂ ಬಂದರೆ ಒಳ್ಳೆಯದಾಗುತ್ತದೆ. ಹೆಸರು, ಸೋಯಾಬೀನ್, ಉದ್ದು ಬೆಳೆಯಲು ಸಹಕಾರಿಯಾಗುತ್ತದೆ. ಮುಂಗಾರು ಹಂಗಾಮಿನಲ್ಲಿ ರೈತರಿಗೆ ಕೃಷಿ ಪರಿಕರಗಳನ್ನು ಒದಗಿಸಲು ಇಲಾಖೆಯಿಂದ ಸಿದ್ಧತೆ ಮಾಡಿಕೊಳ್ಳಲಾಗಿದೆ. ರಸಗೊಬ್ಬರ, ಬಿತ್ತನೆಬೀಜ ದಾಸ್ತಾನಿದೆ’ ಎಂದು ತಿಳಿಸಿದರು.

ವಿರಾಟ್ ಕೊಹ್ಲಿ ನಾಯಕತ್ವದ ಭಾರತ ಕ್ರಿಕೆಟ್‌ ತಂಡ ಕಪ್ ಗೆಲ್ಲುತ್ತಾ? ಐಸಿಸಿ ವಿಶ್ವಕಪ್ 2019 ಯಾರು ಗೆಲ್ಲುತ್ತಾರೆ? ಕೋಟ್ಯಂತರ ಕ್ರಿಕೆಟ್ ಪ್ರೇಮಿಗಳ ನಿರೀಕ್ಷೆಗೆ ಉತ್ತರ ಸಿಗುವ ಕಾಲ ಬಂದಿದೆ. ವಿಶ್ವಕಪ್ ಕ್ರಿಕೆಟ್‌ನ ಸ್ಕೋರ್ ಅಪ್‌ಡೇಟ್ಸ್‌, ಮ್ಯಾಚ್‌ಗಳ ವರದಿ, ವಿಶ್ವಕಪ್ ಕ್ರಿಕೆಟ್ ಹೆಜ್ಜೆ ಗುರುತು, ಆಟಗಾರರ ಸಂದರ್ಶನ, ವೇಳಾಪಟ್ಟಿ ತಿಳಿದುಕೊಳ್ಳಲು www.prajavani.net ಜಾಲತಾಣಕ್ಕೆ ಭೇಟಿ ನೀಡಿ. ಕ್ರೀಡಾಪ್ರೇಮಿಗಳ ನೆಚ್ಚಿನ ಆಯ್ಕೆ ‘ಪ್ರಜಾವಾಣಿ’. ಇದು ಅತ್ಯಂತ ವಿಶ್ವಾಸಾರ್ಹ ಸುದ್ದಿ ಮಾಧ್ಯಮ.

ಬರಹ ಇಷ್ಟವಾಯಿತೆ?

  • 1

    Happy
  • 0

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !