ವಿ.ವಿ ಕಾಲೇಜುಗಳ ನಿರ್ವಹಣಾ ವ್ಯವಸ್ಥೆ ದೋಷ: ಅಂಕಪಟ್ಟಿಗಾಗಿ ವಿದ್ಯಾರ್ಥಿಗಳ ಪರದಾಟ

ಬೆಳಗಾವಿ: ಏಕೀಕೃತ ವಿಶ್ವವಿದ್ಯಾಲಯ ಕಾಲೇಜುಗಳ ನಿರ್ವಹಣಾ ವ್ಯವಸ್ಥೆ (ಯುಯುಸಿಎಂಎಸ್‌) ದೋಷಗಳಿಂದ ರಾಜ್ಯದ ಹಲವಾರು ಪದವೀಧರರು ಅಂಕ‍ಪಟ್ಟಿಗೆ ಪರದಾಡುವಂತಾಗಿದೆ.

ವರ್ಷದ ಹಿಂದೆ ಪದವಿ ಶಿಕ್ಷಣ ಮುಗಿಸಿದ್ದರೂ ಇನ್ನೂ ಅಂಕಪಟ್ಟಿ ಸಿಕ್ಕಿಲ್ಲ. ಇದು ಅವಕಾಶಗಳಿಂದ ವಂಚಿತರಾಗುವಂತೆ ಮಾಡಿದೆ.

ಬಿ.ಇಡಿ ಮತ್ತು ಸ್ನಾತಕೋತ್ತರ ಪದವೀಧರರ ಅಂಕಪಟ್ಟಿಗಳಲ್ಲಿ ಸಾಕಷ್ಟು ದೋಷಗಳು ಇವೆ. 1 ಮತ್ತು 2ನೇ ಸೆಮಿಸ್ಟರ್‌ನ ಅಂಕಪಟ್ಟಿಗಳಲ್ಲಿ ವಿದ್ಯಾರ್ಥಿಗಳ ಭಾವಚಿತ್ರ ಪ್ರಕಟಿಸಲಾಗಿದೆ. 3 ಮತ್ತು 4ನೇ ಸೆಮಿಸ್ಟರ್‌ ಅಂಕಪಟ್ಟಿಗಳಲ್ಲಿ ಭಾವಚಿತ್ರ ಪ್ರಕಟವಾಗಿಲ್ಲ. ಈ ಸಮಸ್ಯೆ ಎಲ್ಲರಿಗೂ ಆಗಿಲ್ಲ. ಎಲ್ಲಾ ವಿಶ್ವವಿದ್ಯಾಲಯಗಳ ಕೆಲವು ಕಾಲೇಜುಗಳಲ್ಲಿ ಕಂಡುಬಂದಿದೆ.

‘ಬೆಳಗಾವಿಯ ರಾಣಿ ಚನ್ನಮ್ಮ ವಿ.ವಿಯಿಂದ 2023ರ ಅಕ್ಟೋಬರ್‌ನಲ್ಲಿ ಬಿ.ಇಡಿ  ಶಿಕ್ಷಣ ಮುಗಿಸಿದ್ದೇನೆ. 3 ಮತ್ತು 4ನೇ ಸೆಮಿಸ್ಟರ್‌ನ ಅಂಕಪಟ್ಟಿಗಳಲ್ಲಿ ನನ್ನ ಚಿತ್ರ ಪ್ರಕಟವಾಗಿಲ್ಲ. ಇದಕ್ಕೆ ಯಾರು ಜವಾಬ್ದಾರಿ? ಪದವಿ ಮುಗಿಸಿ ವರ್ಷವಾದರೂ ಉದ್ಯೋಗಕ್ಕೆ ಅರ್ಜಿಹಾಕದ ಸ್ಥಿತಿ ಇದೆ. ಇದರಿಂದ ಪ್ರಾಥಮಿಕ, ಪ್ರೌಢಶಾಲೆಗಳಲ್ಲಿ ಅತಿಥಿ ಶಿಕ್ಷಕರ ನೇಮಕಾತಿಗೆ ಅರ್ಜಿಹಾಕಲಾಗಿಲ್ಲ’ ಎಂದು ವಿಜಯಪುರದ ಪ್ರಕಾಶ ತಿಳಿಸಿದರು.

‘ಎಷ್ಟು ಬಾರಿ ಕೇಳಿದರೂ ತಾಂತ್ರಿಕ ದೋಷ’ ಎಂಬ ಉತ್ತರ ಸಿಗುತ್ತಿದೆ. ಈ ದೋಷ ಸರಿಪಡಿಸಬೇಕಾದ ಯುಯುಸಿಎಂಎಸ್‌ ವ್ಯವಸ್ಥೆ ಸರಿಪಡಿಸಲು ಮೇಲೆ ಒತ್ತಡ ಹೇರುತ್ತಿಲ್ಲ’ ಎಂದು ಪ್ರಾಂಶುಪಾಲರೊಬ್ಬರು ದೂರಿದರು.