ರಾಯಬಾಗ: ತಾಲ್ಲೂಕಿನ ಬೀರನಾಳ– ಬ್ಯಾಕೂಡ ಮಧ್ಯೆ ಇರುವ ರಜನಿಕಾಂತ ಯಾದವಾಡೆ ಅವರಿಗೆ ಸೇರಿದ ತೋಟದಲ್ಲಿ ಈಚೆಗೆ ಶ್ರೀಗಂಧದ ಎರಡು ಮರಗಳ ಕಳ್ಳತನ ಮಾಡಲಾಗಿದೆ.
ಕಳೆದ ಸೋಮವಾರ ಮತ್ತೊಂದು ಮರ ಕಡಿಯಲು ಕಳ್ಳರು ಯತ್ನಿಸಿದ್ದಾರೆ. ಆದರೆ, ನಾಯಿಗಳಿಗೆ ಹೆದರಿ ಓಡಿಹೋಗಿದ್ದಾರೆ. ಈ ಸಂಬಂಧ ಅರಣ್ಯ ಇಲಾಖೆ ರಾಯಬಾಗ ವಲಯದ ಕಚೇರಿಯಲ್ಲಿ ದೂರು ದಾಖಲಾಗಿದೆ. ವಲಯ ಅರಣ್ಯ ಅಧಿಕಾರಿ ಉಮೇಶ ಪ್ರಧಾನಿ, ಉಪ ವಲಯ ಅರಣ್ಯಾಧಿಕಾರಿ ಶಾನೂರ್ ನದಾಫ್ ಹಾಗೂ ಸಿಬ್ಬಂದಿ ಭೇಟಿ ನೀಡಿ ಪರಿಶೀಲಿಸಿದರು.
‘ನಮ್ಮ ಜಮೀನಿನಲ್ಲಿ 50 ಶ್ರೀಗಂಧದ ಸಸಿ ನಾಟಿ ಮಾಡಿದ್ದೆವು. ಈ ಹಿಂದೆ ಎರಡು ಬಾರಿ ಕಳ್ಳತನ ಮಾಡಲಾಗಿದೆ. ಪದೇಪದೇ ಇಂಥ ಘಟನೆಗಳು ನಡೆಯುತ್ತಿವೆ. ಇದಕ್ಕೆ ಪರಿಹಾರ ಒದಗಿಸಬೇಕು’ ಎಂದು ಯಾದವಾಡೆ ಒತ್ತಾಯಿಸಿದ್ದಾರೆ.
