ಚಿಕ್ಕೋಡಿ | ಮಹಾರಾಷ್ಟ್ರಕ್ಕೆ ಕಬ್ಬು ಸಾಗಣೆ: ಎರಡು ಟ್ರ್ಯಾಕ್ಟರ್‌ಗಳಿಗೆ ಬೆಂಕಿ

‘ಮಹಾರಾಷ್ಟ್ರದ ಶಿರೋಳ ತಾಲ್ಲೂಕಿನ ಹುಪರಿಯ ಜವಾಹರ ಸಕ್ಕರೆ ಕಾರ್ಖಾನೆಗೆ ಕಬ್ಬು ಸಾಗಿಸುತ್ತಿದ್ದ ವೇಳೆ, ದರ ಘೋಷಣೆಗೂ ಮುನ್ನವೇ ಕಬ್ಬು ಸಾಗಿಸಕೂಡದು ಎಂದು ಆಕ್ರೋಶಗೊಂಡ ಕೆಲವರು ಟ್ರ್ಯಾಕ್ಟರ್‌ಗಳಿಗೆ ಬೆಂಕಿ ಹಚ್ಚಿದರು. ಎರಡೂ ಟ್ರ್ಯಾಕ್ಟರ್‌ಗಳ ಎಂಜಿನ್‌ ಹಾಳಾಗಿದ್ದು, ₹ 8 ಲಕ್ಷ ಹಾನಿಯಾಗಿದೆ’ ಎಂದು ಮೂಲಗಳು ತಿಳಿಸಿವೆ.

ಕಾರಣವೇನು?

‘ಪ್ರತಿ ಟನ್ ಕಬ್ಬಿಗೆ ₹3,500 ದರ ನಿಗದಿಗೊಳಿಸಬೇಕು ಎಂದು ಮಹಾರಾಷ್ಟ್ರದಲ್ಲಿ ರೈತ ಸಂಘಟನೆಗಳು ಹೋರಾಟ ನಡೆಸಿವೆ. ಆದರೆ, ಕಾರ್ಖಾನೆಗಳು ಇನ್ನೂ ದರ ಘೋಷಿಸಿಲ್ಲ. ದರ ಘೋಷಿಸುವವರೆಗೆ ಯಾರೂ ಕಬ್ಬು ಸಾಗಿಸಬಾರದು ಎಂದು ಹೋರಾಟಗಾರರು ನಿರ್ಣಯಿಸಿದ್ದಾರೆ. ಇದೇ ರೀತಿ ಪ್ರತಿಭಟನೆ ಕರ್ನಾಟಕದ ಗಡಿ ಗ್ರಾಮಗಳಲ್ಲೂ ನಡೆದಿದೆ. ಹೀಗಿದ್ದರೂ ಕೆಲ ರೈತರು ಕಬ್ಬು ಸಾಗಣೆಗೆ ಮುಂದಾದರು. ಇದರಿಂದ ಆಕ್ರೋಶಗೊಂಡ ಆರೋಪಿಗಳು, ಬೆಂಕಿ ಹಚ್ಚಿದ್ದಾರೆ’ ಎಂದು ನೇಜ ಗ್ರಾಮದ ವಾಹನಗಳ ಮಾಲೀಕರು ಆರೋಪಿಸಿದ್ದಾರೆ.

‘ತಡರಾತ್ರಿ ವಾಹನ ತಡೆದ 12 ಮಂದಿ ಮುಸುಕುಧಾರಿಗಳು ಈ ಕೃತ್ಯ ಎಸಗಿದ್ದಾರೆ’ ಎಂದು ವಾಹನ ಚಾಲಕರು ದೂರಿನಲ್ಲಿ ತಿಳಿಸಿದ್ದಾರೆ. ಸದಲಗಾ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.