ವಚನಾಮೃತ | ಸಮಾಜಕ್ಕೆ ಉತ್ತಮ ಕೊಡುಗೆ ನೀಡಿ

ಜೀವಿತ ಕಾಲದಲ್ಲಿ ಜೀವನದ ಬೆಲೆ ಬಲ್ಲವರು ಬಹಳಿಲ್ಲ. ಹೋದ ಮೇಲೆ ಹುಡುಕಲು ಕಳಕೊಂಡವರೇ ಉಳಿದಿರುವುದಿಲ್ಲ. ಜೀವನ ಬಹಳ ಅಮೂಲ್ಯವಾದದ್ದು. ಕೊರೊನಾದಂಥ ಮಾರಕ ಸೋಂಕಿನ ವಿರುದ್ಧ ಹೋರಾಡಿ ಜೀವನವನ್ನು ಇಂದಿನ ಸಂದರ್ಭದಲ್ಲಿ ಉಳಿಸಿಕೊಳ್ಳಬೇಕಾಗಿದೆ. ಈ ಹಿನ್ನೆಲೆಯಲ್ಲಿಯೇ ಪ್ರಧಾನಿ ನರೇಂದ್ರ ಮೋದಿ ಅವರು ಒಂಬತ್ತು ಗಂಟೆ ಒಂಬತ್ತು ನಿಮಿಷಕ್ಕೆ ಒಂದು ದೀಪ ಹಚ್ಚಿರಿ ಎಂದು ಸಂದೇಶ ಸಾರಿದರು.

ಬಂಗಾಲಿ ಸಂತಿ ಬಹು ಗಡಿಬಿಡಿ
ಸುಳ್ಳೇ ಭ್ರಾಂತಿಗೆಟ್ಟು ತಿರುಗಬ್ಯಾಡೆಲೆ ಖೋಡಿ
ಒಂಬತ್ತು ಅಗಸಿ-ಪ್ಯಾಟಿ ಬಾಜಾರ
ಅಲ್ಲಿ ಇರುವವರು ಆರು ಮಂದಿ ದಲಾಲರು
ಪಟ್ಟಣಶೆಟ್ಟಿ ಎಂಬ ಸಾಹುಕಾರ
ಅವನ ಹತ್ತಿರ ಮಾಡಿಕೊ ವ್ಯಾಪಾರ...

ಎಂದು ಶಿಶುನಾಳ ಶರೀಫ ಶಿವಯೋಗಿಗಳು ಹಾಡಿದ್ದಾರೆ. ನಾವೆಲ್ಲರೂ ಜೀವವೆಂಬ ಅನರ್ಘ್ಯ ರತ್ನವನ್ನು ಉಳಿಸಿಕೊಂಡು ಸಮಾಜಕ್ಕೆ ಒಳ್ಳೆಯ ಕೊಡುಗೆ ಕೊಡಬೇಕಿದೆ.

-ಪಂಚಾಕ್ಷರಿ ಸ್ವಾಮೀಜಿ, ಶ್ರೀಗುರು ಮಡಿವಾಳೇಶ್ವರಮಠ, ನಿಚ್ಚಣಕಿ, ಚನ್ನಮ್ಮನ ಕಿತ್ತೂರು, ಬೆಳಗಾವಿ ಜಿಲ್ಲೆ