ಶುಕ್ರವಾರ, ಮಾರ್ಚ್ 5, 2021
28 °C
ಗಂಗಾಮತ ಸಮಾಜದ ಸಭೆ

ಗಂಗಾಮತಸ್ಥರನ್ನು ಎಸ್.ಟಿ.ಗೆ ಸೇರಿಸಲು ರಾಜ್ಯಮಟ್ಟದ 4ನೇ ವಿಕಾಸ ಸಭೆಯಲ್ಲಿ ಆಗ್ರಹ

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

Deccan Herald

ಬಳ್ಳಾರಿ: ‘ಗಂಗಾಮತ ಸಮಾಜವನ್ನು ಪರಿಶಿಷ್ಟ ಪಂಗಡದ ಪಟ್ಟಿಗೆ ಸೇರಿಸಬೇಕು’ ಎಂದು ಬಿಜೆಪಿ ರಾಜ್ಯ ಪ್ರಧಾನ ಕಾರ್ಯದರ್ಶಿ ಎನ್‌,ರವಿಕುಮಾರ್ ಆಗ್ರಹಿಸಿದರು.

ಇಲ್ಲಿನ ವಿದ್ಯಾನಗರದಲ್ಲಿ ಭಾನುವಾರ ನಡೆದ ಗಂಗಾಮತಸ್ಥರ ರಾಜ್ಯ ಮಟ್ಟದ 4ನೇ ವಿಕಾಸ ಸಭೆಯಲ್ಲಿ ಮಾತನಾಡಿದ ಅವರು, ‘ಈ ಬಾರಿ ಸಮಾಜವನ್ನು ಪರಿಶಿಷ್ಟ ಪಂಗಡಕ್ಕೆ ಸೇರಿಸುವ ಭರವಸೆ ಇದೆ. ಸುಮಾರು42 ವರ್ಷಗಳ ಹೋರಾಟಕ್ಕೆ ಜಯ ಸಿಗಲಿದೆ’ ಎಂದರು.

‘ಸಮಾಜದ ಸರ್ವರನ್ನೂ ಒಂದೆಡೆ ಸೇರಿಸಿ ಜಾಗೃತಗೊಳಿಸುವುದಕ್ಕಾಗಿ ಈ ಸಭೆಯನ್ಉ ಏರ್ಪಡಿಸಲಾಗಿದೆ. ನಮ್ಮ ಸಮಾಜದ ಎಲ್ಲಾ ಸಂಘಟನೆಗಳು ಮೊದಲು ಒಗ್ಗೂಡಬೇಕು. ಮುಖ್ಯವಾಗಿ ಯುವಜನರೆಲ್ಲರೂ ಜಾಗೃತರಾಗಬೇಕು’ ಎಂದರು.

ಅಂಬಿಗರ ಚೌಡಯ್ಯ ಸಂಘದ ಸಲಹೆಗಾರ ದತ್ತಾತ್ರೇಯ ರೆಡ್ಡಿ, ಡಾ.ಪೂರ್ಣಾನಂದ ಮಾತನಾಡಿದರು.

ಗುಲ್ಬರ್ಗಾ ಜಿಲ್ಲೆಯ ತೊನಸನಹಳ್ಳಿಯ ಅಲ್ಲಮಪ್ರಭು ಪೀಠ ಮಲ್ಲಣ್ಣಪ್ಪ ಸ್ವಾಮಿ, ಮಂಡ್ಯ ಜಿಲ್ಲೆಯ ಮಳವಳ್ಳಿಯ ರಾಮರೂಢ ಮಠದ ಬಸವಾನಂದ ಸ್ವಾಮಿ, ಮೆಣಸನಗಳ್ಳಿಯ ಮಲ್ಲೇಶ್ವರ ಸ್ವಾಮಿ ಆಶೀರ್ವಚನ ನೀಡಿದರು.

ಬಸವಕಲ್ಯಾಣದ ಶಾಸಕ ಬಿ.ನಾರಾಯಣರಾವ್, ರಾಜಗೋಪಾರೆಡ್ಡಿ, ಗಂಗಾಮತ ಸಂಘದ ಜಿಲ್ಲಾ ಘಟಕದ ಅಧ್ಯಕ್ಷ ಮೌಲಾಲಿ, ಅಂಬಿಗರ ಚೌಡಯ್ಯ ಸಂಘದ ಜಿಲ್ಲಾ ಘಟಕದ ಅಧ್ಯಕ್ಷ ರಂಗಸ್ವಾಮಿ, ಪ್ರೊ.ಗೋವಿಂದಪ್ಪ, ಕಾಂಗ್ರೆಸ್ ನ ಜಯಲಕ್ಷ್ಮೀ ಪುತ್ರನ್, ಜುಮರಿ, ಬಸವರಾಜ್ ಬಲಕುಂದಿ ಇದ್ದರು.

ಮೆರವಣಿಗೆ: ಸಮಾವೇಶಕ್ಕೂ ಮುನ್ನ ವಿದ್ಯಾನಗರದ ಗಂಗಾ ಪರಮೇಶ್ವರಿ ಗುಡಿಯಿಂದ ಸಮುದಾಯದ ನೂರಾರು ಮಂದಿ ಮೆರವಣಿಗೆ ನಡೆಸಿದರು.

‘ಸಮ್ಮಿಶ್ರ ಸರ್ಕಾರ ಬಿದ್ದರೆ ಬಿಜೆಪಿ ಸರ್ಕಾರ’

ಬಳ್ಳಾರಿ: ‘ರಾಜ್ಯದಲ್ಲಿರುವ ಕಾಂಗ್ರೆಸ್ –ಜೆಡಿಎಸ್ ಸಮ್ಮಿಶ್ರ ಸರ್ಕಾರ ಬಿದ್ದರೆ ಬಿಜೆಪಿ ಸುಮ್ಮನೆ ಕೂರುವುದಿಲ್ಲ. 104 ಶಾಸಕರ ಬಲವಿರುವ ನಾವು ಸರ್ಕಾರ ರಚನೆಗೆ ಮುಂದಾಗುತ್ತೇವೆ’ ಎಂದು ಪಕ್ಷದ ರಾಜ್ಯ ಪ್ರಧಾನ ಕಾರ್ಯದರ್ಶಿ, ವಿಧಾನ ಪರಿಷತ್ ಸದಸ್ಯ ರವಿಕುಮಾರ ಹೇಳಿದರು.

ವಿಕಾಸ ಸಭೆಯ ಬಳಿಕ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, ‘ಬಿಜೆಪಿಯು ಸಮ್ಮಿಶ್ರ ಸರ್ಕಾರಕ್ಕೆ ಯಾವುದೇ ತೊಂದರೆ ಕೊಡುತ್ತಿಲ್ಲ. ಕಾಂಗ್ರೆಸ್ –ಜೆಡಿಎಸ್‌ನಲ್ಲೆ ಹೆಚ್ಚು ಸಮಸ್ಯೆಗಳಿವೆ. ಎರಡೂ ಪಕ್ಷಗಳ ನಾಯಕರು ಕಚ್ಚಾಟಕ್ಕಿಳಿದಿದ್ದಾರೆ’ ಎಂದು ದೂರಿದರು.

‘ಲೋಕಸಭಾ ಚುನಾವಣೆ ಕಡೆಗೆ ಗಮನ ಹರಿಸಿ ರಾಜ್ಯದ ಸರ್ಕಾರದ ವಿಚಾರಲ್ಲಿ ನಾವು ಶಾಂತವಾಗಿದ್ದೇವೆ. ಏಕೆಂದರೆ ಕೇಂದ್ರದಲ್ಲಿ ಮತ್ತೆ ಸರ್ಕಾರ ರಚಿಸಬೇಕಿದೆ. ಸಮ್ಮಿಶ್ರ ಸರ್ಕಾರ ತನ್ನಿಂತಾನೇ ಬಿದ್ದರೆ ಬಿಜೆಪಿ ಕೈಕಟ್ಟಿ ಕೂರುವುದಿಲ್ಲ’ ಎಂದರು.

‘ಸಚಿವ ಡಿ.ಕೆ.ಶಿವಕುಮಾರ ಅವರನ್ನು ಜಾರಿ ನಿರ್ದೇಶನಾಲಯದ ಅಧಿಕಾರಿಗಳು ಬಂಧಿಸುತ್ತಾರೆ ಎಂಬ ಪ್ರಸ್ತಾಪಕ್ಕೂ ಬಿಜೆಪಿಗೂ ಯಾವುದೇ ಸಂಬಂಧವಿಲ್ಲ. ಇಲಾಖೆಯ ತನ್ನ ಕೆಲಸ ಮಾಡುತ್ತಿದೆ. ಸಂವಿಧಾನದಲ್ಲಿ ಆಯಾ ಇಲಾಖೆಗಳಿಗೆ ಕರ್ತವ್ಯ ನಿರ್ವಹಣೆಗೆ ಕಾನೂನಿನ ಚೌಕಟ್ಟು ಇದೆ. ಆ ಚೌಕಟ್ಟಿನೊಳಗೆ ಇಲಾಖೆಗಳು ಕರ್ತವ್ಯ ನಿರ್ವಹಿಸುತ್ತಿವೆ. ಅದರಲ್ಲಿ ಬಿಜೆಪಿ ಹಸ್ತಕ್ಷೇಪ ಮಾಡುವುದಿಲ್ಲ’ ಎಂದರು.

 

ಕೇಂದ್ರ ಬಜೆಟ್ 2021 ಪೂರ್ಣ ಮಾಹಿತಿ ಇಲ್ಲಿದೆ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.

ಈ ವಿಭಾಗದಿಂದ ಇನ್ನಷ್ಟು