ಹೊಳಲು ಶಾಲೆಯ ಕೀರ್ತಿ ಹರಡಿದ ‘ಮೂರ್ತಿ’

ಹರಪನಹಳ್ಳಿ ತಾಲ್ಲೂಕು ಚನ್ನಾಪುರ ತಾಂಡಾದ ಎಲ್.ಮೂರ್ತಿ, 2003ರಲ್ಲಿ ಶಿಕ್ಷಕರಾಗಿ ನೇಮಕಗೊಂಡು, 2016 ರಿಂದ ಹೊಳಲು ಶಾಲೆಯಲ್ಲಿ ಸೇವೆ ಸಲ್ಲಿಸುತ್ತಿದ್ದಾರೆ. ಜಾನಪದ ಗಾಯಕ, ಕ್ರೀಡಾಪಟು ಹಾಗೂ ಸಂಘಟಕರಾಗಿರುವ ಮೂರ್ತಿ, ಮಕ್ಕಳಲ್ಲಿ ಕ್ರೀಡೆ, ಸಾಂಸ್ಕೃತಿಕ ಅಭಿರುಚಿಯನ್ನು ಬೆಳೆಸುತ್ತಿದ್ದಾರೆ.

‘ನನ್ನ ಕೆಲಸ ಗುರುತಿಸಿ ಪ್ರಶಸ್ತಿಗೆ ಆಯ್ಕೆ ಮಾಡಿರುವುದು ಸಂತೋಷವಾಗಿದೆ. ಕಾರ್ಯತತ್ಪರತೆಯನ್ನು ಹೆಚ್ಚಿಸಲು ಈ ಪ್ರಶಸ್ತಿ ಮತ್ತಷ್ಟು ಪ್ರೇರಣೆ ನೀಡಿದೆ’ ಎಂದರು.

ಸೃಜನಶೀಲ ಶಿಕ್ಷಕ ಗಂಗಾಧರಗೆ ಪ್ರಶಸ್ತಿ ಗರಿ

ತಾಲ್ಲೂಕಿನ ಮಿರಾಕೊರನಹಳ್ಳಿ ಶರಣಬಸವೇಶ್ವರ ಸರ್ಕಾರಿ ಪ್ರೌಢಶಾಲೆಯ ಚಿತ್ರಕಲಾ ಶಿಕ್ಷಕ ಗಂಗಾಧರ ಕೃಷ್ಣಪ್ಪ ಹುಣಸಿಕಟ್ಟೆ ಅವರು ಚಿತ್ತಾರ ಕಲೆಯಿಂದ ಶಾಲೆಗೆ ವಿಭಿನ್ನ ರೂಪ ನೀಡಿದ್ದಾರೆ.

ಅವರ ಸೃಜನಾತ್ಮಕ ಚಟುವಟಿಕೆಗಳನ್ನು ಗುರುತಿಸಿ ಶಿಕ್ಷಣ ಇಲಾಖೆ ಪ್ರಶಸ್ತಿಗೆ ಆಯ್ಕೆ ಮಾಡಿದೆ.ಬೆಳಗಾವಿ ಜಿಲ್ಲೆ ಹುಕ್ಕೇರಿ ತಾಲ್ಲೂಕು ಕೇಸ್ತಿ ಗ್ರಾಮದ ಗಂಗಾಧರ ಅವರು 2008ರಲ್ಲಿ ಚಿತ್ರಕಲಾ ಶಿಕ್ಷಕರಾಗಿ ನೇಮಕಗೊಂಡು, ಪ್ರಸ್ತುತ ಮಿರಾಕೊರನಹಳ್ಳಿ ಸರ್ಕಾರಿ ಪ್ರೌಢಶಾಲೆಯಲ್ಲಿ ಸೇವೆ ಸಲ್ಲಿಸುತ್ತಿದ್ದಾರೆ.

ಎಸ್ಸೆಸ್ಸೆಲ್ಸಿ ವಿದ್ಯಾರ್ಥಿಗಳಿಗೆ ಸರಳ ವಿಧಾನದ ಮೂಲಕ ವಿಜ್ಞಾನದ ಚಿತ್ರಗಳನ್ನು ರಚಿಸುವುದನ್ನು ಕರಗತಗೊಳಿಸಿದ್ದಾರೆ. ಬುಡಕಟ್ಟು ಜನಾಂಗದ ಪ್ರಾಚೀನ ಚಿತ್ರಕಲೆಯಾಗಿರುವ ವರ್ಲಿ ಚಿತ್ರಗಳ ಮೂಲಕ ವಿದ್ಯಾರ್ಥಿಗಳ ಕಲಿಕಾಸಕ್ತಿ ಹೆಚ್ಚಿಸಿದ್ದಾರೆ. ಇವರ ಕಲಾ ಪ್ರೌಢಿಮೆಯನ್ನು ಗುರುತಿಸಿ ಶಿಕ್ಷಣ ಇಲಾಖೆ ಇವರನ್ನು ಚಿತ್ರ ಸಿರಿ ಪಠ್ಯ ವಿಷಯ ಸಂಪನ್ಮೂಲ ವ್ಯಕ್ತಿಯನ್ನಾಗಿ ಆಯ್ಕೆ ಮಾಡಿದೆ.

ಬಳ್ಳಾರಿಯ ಡಯಟ್ ಕಚೇರಿಯ ಗೋಡೆಗಳ ಮೇಲೆಯೂ ಇವರ ಕೈ ಚಳಕದಲ್ಲಿ ಮೂಡಿರುವ ವರ್ಲಿ ಚಿತ್ತಾರಗಳನ್ನು ಕಾಣಬಹುದು.
‘ನಾನು ಪ್ರಶಸ್ತಿ ನಿರೀಕ್ಷಿಸಿರಲಿಲ್ಲ. ಪ್ರಶಸ್ತಿಗೆ ಆಯ್ಕೆ ಮಾಡಿದ್ದಕ್ಕೆ ಸಂತಸವಾಗಿದೆ’ ಎಂದು ಶಿಕ್ಷಕ ಗಂಗಾಧರ ಹೇಳಿದರು.