ಹೊಸಪೇಟೆ: ವಾರದ ನಂತರ ಇಲ್ಲಿನ ತುಂಗಭದ್ರಾ ಜಲಾಶಯದ ಒಳಹರಿವು ಭಾನುವಾರ ಏರಿಕೆಯಾಗಿದೆ.
1,633 ಅಡಿ ಸಂಗ್ರಹ ಸಾಮರ್ಥ್ಯದ ಅಣೆಕಟ್ಟೆಯಲ್ಲಿ ಸದ್ಯ 1,605.24 ಅಡಿ ನೀರಿನ ಸಂಗ್ರಹವಿದೆ. ಭಾನುವಾರ 17,138 ಕ್ಯುಸೆಕ್‌ ಒಳಹರಿವು, 289 ಕ್ಯುಸೆಕ್‌ ಹೊರಹರಿವು ದಾಖಲಾಗಿದೆ. ಶನಿವಾರ 6,153 ಕ್ಯುಸೆಕ್‌, ಶುಕ್ರವಾರ 6,662 ಕ್ಯುಸೆಕ್‌ ಒಳಹರಿವು ದಾಖಲಾಗಿತ್ತು.
ಹೋದ ಭಾನುವಾರದಿಂದ ಒಳಹರಿವು ಸತತವಾಗಿ ಕಡಿಮೆಯಾಗುತ್ತ ಬಂದಿತ್ತು. ಶುಕ್ರವಾರ ಏರಿಕೆ ಕಂಡಿದ್ದ ನೀರಿನ ಒಳಹರಿವು, ಶನಿವಾರ ಪುನಃ ತಗ್ಗಿತ್ತು. ಭಾನುವಾರ ಏಕಾಏಕಿ ಪುನಃ ಹೆಚ್ಚಳ ಕಂಡಿದೆ.
‘ಕೆಲವು ದಿನಗಳಿಂದ ಜಲಾನಯನ ಪ್ರದೇಶದಲ್ಲಿ ಉತ್ತಮ ಮಳೆಯಾಗುತ್ತಿದ್ದು, ಒಳಹರಿವು ಹೆಚ್ಚಾಗಿದೆ. ಸೋಮವಾರ ಮತ್ತಷ್ಟು ಏರಿಕೆ ಆಗಬಹುದು’ ಎಂದು ತುಂಗಭದ್ರಾ ಜಲಾಶಯ ಆಡಳಿತ ಮಂಡಳಿ ಮೂಲಗಳು ‘ಪ್ರಜಾವಾಣಿ’ಗೆ ತಿಳಿಸಿವೆ.
