ದುರುಪಯೋಗ ಆಗದಿರಲಿ ಆರೋಗ್ಯ ಮಾಹಿತಿ

ಇನ್ನೊಂದು ಘಟನೆ: ಮದುವೆ–ಊಟದಲ್ಲಿ ಗಂಡ ಸ್ನೇಹಿತರೊಂದಿಗೆ ಪಕ್ಕದ ಸರದಿಯಲ್ಲಿ ಕುಳಿತು ಊಟ ಮಾಡುತ್ತಿದ್ದಾನೆ. ಚಿರೋಟಿ ಅತ್ತಿಂದ ಬಂತು. ಇತ್ತ ಕುಳಿತಿದ್ದ ಹೆಂಡತಿ ಗಂಡನನ್ನು ತೋರಿಸಿ ‘ರೀ ಭಟ್ಟರೇ ಅವರಿಗೆ ಚಿರೋಟಿ ಹಾಕಬೇಡಿ, ಅವರಿಗೆ ಸಿಕ್ಕಾಬಟ್ಟೆ ಸಕ್ಕರೆ ಕಾಯಿಲೆ ಇದೆ’ ಎಂದು ಇಡೀ ಛತ್ರಕ್ಕೆ ಕೇಳುವಂತೆ ಕೂಗಿದಳು. ಆಕೆಯ ಕಾಳಜಿಯೇನೋ ಸರಿ. ಆದರೆ ಆಕೆಗೇ ತಿಳಿಯದೆ ಆಕೆಯ ಗಂಡನ ಕಾಯಿಲೆ ಸಾರ್ವಜನಿಕ ಮಾಹಿತಿಯಾಯಿತು.

ನಮ್ಮವರ ಬಗ್ಗೆ ಹೀಗೊಂದು ಮೂದಲಿಕೆ ಇದೆ, ‘ತಿನ್ನುವುದು ಕದ್ದು ಮುಚ್ಚಿ; ಶೌಚಾಲಯಕ್ಕೆ ಬಟಾ ಬಯಲು’ ಎಂದು. ನಮ್ಮ ಆರೋಗ್ಯ ಮಾಹಿತಿ ನಮಗೂ ಮತ್ತು ನಮ್ಮ ವೈದ್ಯರಿಗೂ ಮಾತ್ರ ಇರಬೇಕಾದ ಖಾಸಗಿ ಮಾಹಿತಿ. ಕುಟುಂಬದವರಲ್ಲಿ ತಿಳಿಸಬೇಕಾಗಬಹುದು. ಆದರೆ ಕಂಡ ಕಂಡವರಿಗೆ ಹೇಳಿಕೊಂಡು ಒದ್ದಾಡಬೇಕಿಲ್ಲ. ನಮ್ಮ ಮಾಹಿತಿ ಇತರರಿಗೆ ಹಾಸ್ಯವಾಗಬಹುದು. ನಾವು ಮಾನಸಿಕ ರೋಗಿಗಳನ್ನು ಕಾಣುವ ರೀತಿ ನಮಗೆ ಗೊತ್ತಿದೆ. ಮ್ಯಾಕ್ಯವೆಲಿ ಇಂತಹ ವಿಚಾರದಲ್ಲಿ ಹೀಗೆ ಎಚ್ಚರಿಸುತ್ತಾನೆ: ‘Treat every friend as potential enemy and every enemy as potential friend’ (ಪ್ರತಿಯೊಬ್ಬ ಸ್ನೇಹಿತನನ್ನೂ ಪ್ರಬಲ ಶತ್ರುವಿನಂತೆ ಎಣಿಸು ಹಾಗೂ ಪ್ರತಿಯೊಬ್ಬ ಶತ್ರುವನ್ನೂ ಪ್ರಬಲ ಸ್ನೇಹಿತನಂತೆ ಎಣಿಸು). ಇದು ಸ್ವಲ್ಪ ಸಿನಿಕತನದಿಂದ ಕೂಡಿದ್ದರೂ ಸತ್ಯಕ್ಕೆ ಬಹಳ ದೂರವಿಲ್ಲ ಎನ್ನಬಹುದು.

ಇತ್ತ ನಮ್ಮ ಆರೋಗ್ಯ ಮಾಹಿತಿಯನ್ನು ದೊಡ್ಡ ವ್ಯಾಪಾರವನ್ನಾಗಿ ಮಾಡಿಕೊಂಡಿರುವ ದಂಧೆ ನಮ್ಮ ಕಣ್ಣ ಮುಂದೆಯೇ ಇದೆ. ಆರೋಗ್ಯ ಮಾಹಿತಿಯನ್ನು ವಿಮ ಕಂಪನಿಗಳಿಗೆ ಮಾರಾಟ ಮಾಡಲಾಗುತ್ತಿದೆ. ಅಲ್ಲದೇ ರೋಗಿಯನ್ನು ಬಳಸಿಕೊಳ್ಳಬಹುದಾದ ಗ್ರಾಹಕನನ್ನಾಗಿ ಮಾರ್ಪಡಿಸುವ ಮಾಹಿತಿಯನ್ನು ಮಾರಿಕೊಳ್ಳಲಾಗುತ್ತಿದೆ. ಈ ಮಾಹಿತಿಯನ್ನು ಉಪಯೋಗಿಸಿಕೊಂಡು ‘ವಿಮೆ ನಿರಾಕರಣೆ’ ನಡೆಯುತ್ತಿದೆ. ವಿಮೆ ಕಂಪನಿಗಳು ಅತ್ಯಂತ ಕಷ್ಟ–ಕಾರ್ಪಣ್ಯದಲ್ಲಿರುವವರಿಗೆ ಸಹಾಯಹಸ್ತವನ್ನು ನೀಡುವುದಿಲ್ಲ. ಊದಾಹರಣೆಗೆ ಆನುವಂಶಿಕ ಕಾಯಿಲೆಗಳಿಗೆ ವಿಮೆ ನೀಡುವುದಿಲ್ಲ. ಇತ್ತೀಚೆಗೆ ಹೈಕೋರ್ಟ್ ಇದರ ವಿರುದ್ಧ ತೀರ್ಪು ನೀಡಿರುವುದರಿಂದ ಇದು ಸರಿಹೋಗಬಹುದೇನೋ?

ಅಂಗಾಂಗಗಳ ಕಸಿ ಮಾಡಿದವರಿಗೆ ವಿಮೆ ಅತ್ಯಂತ ಅವಶ್ಯಕ. ಆದರೆ ಅವರಿಗೆ ವಿಮೆ ಇಲ್ಲ. ಅರವತ್ತು ವರ್ಷ ಮೀರಿದರೆ ಅತ್ಯಂತ ಹೆಚ್ಚು ವಿಮೆ ಖರ್ಚು ಬರುತ್ತದೆ. 70ಸಾವಿರದಿಂದ ಒಂದು ಲಕ್ಷ ವಾರ್ಷಿಕ ವಿಮೆ ಕಟ್ಟಬೇಕಾಗುತ್ತದೆ. ಇದು ಸುಮಾರು ನಮ್ಮ ದೇಶದ ಸರಾಸರಿ ವಾರ್ಷಿಕ ವರಮಾನ!

ಸರ್ಕಾರ ಈಗ ಆರೋಗ್ಯ ಮಾಹಿತಿ ಮಾರಾಟ ಮಾಡದಂತೆ ಹೊಸ ಕಾನೂನನ್ನು ತರುವತ್ತ ಆದೇಶ ಹೊರಡಿಸಿದೆ. ಈ ರೀತಿ ಕದ್ದು ಮಾಹಿತಿ ಮಾರಿದರೆ ಐದು ವರ್ಷ ಜೈಲು ಎನ್ನುತ್ತದೆ ಈ ಆರೋಗ್ಯಸೇವೆಯಲ್ಲಿ ಡಿಜಿಟಲ್ ಮಾಹಿತಿಯ ಭದ್ರತೆ ಖಾಯಿದೆ. (DISHA - Digital Information Security in Healthcare Act) ಈಗ ಕೇಂದ್ರ ಆರೋಗ್ಯ ಸಚಿವಾಲಯ ಕರಡುಪ್ರತಿಯನ್ನು ಹೊರತಂದಿದೆ. ನಮ್ಮ ಮಾಹಿತಿ ನಮಗೆ ತಿಳಿಯದೆ ನಮ್ಮ ವಿರುದ್ಧವೇ ಕೆಲಸ ಮಾಡಬಹುದು. ಇದು ಆಸ್ಪತ್ರೆಗಳಲ್ಲಿ, ನೌಕರಿ ಕೊಡುವವರು, ಸರ್ಕಾರ ಕೂಡ ದುರುಪಯೋಗ ಮಾಡಿಕೊಳ್ಳುವ ಸಾಧ್ಯತೆ ಇದೆ.

It is a thin line between secrecy, privacy and profiteering. ಇನ್ನೊಂದು ರೀತಿಯಲ್ಲಿ ನಮ್ಮ ಮಾಹಿತಿ ತಿಳಿದು ನಮಗೆ ಪ್ರವಾಹರೂಪದಲ್ಲಿ ಬರುವ ಬಿಟ್ಟಿ ಸಲಹೆ–ಸೂಚನೆಗಳಿಂದಲೂ ತಪ್ಪಿಸಿಕೊಳ್ಳಬಹುದು.

ಈ ರೇಸಿನಲ್ಲಿ ಹೆಚ್ಚಾಗಿರುವುದು, ಯಾತ್ರೆಗೆ ಹೋಗಲು ಸೂಚಿಸುವ ಪಟ್ಟಿ, ಚಕ್ಕೆಬೇರು ಕಷಾಯದ ಸಲಹೆ, ಗಂಜಲ-ಗೋಮೂತ್ರದ ಸಲಹೆ, ಜೋತಿಷ್ಯ, ನಾಡೀಶಾಸ್ತ್ರದ ಸೂಚನೆಗಳು, ಹರಕೆ–ಕಾಣಿಕೆಗಳ ಸಲಹೆ. ಸಲಹೆ ಕೊಟ್ಟು ಸುಮ್ಮನಿರುವವರಲ್ಲ ಇವರು.

ಪರ್ಯಾಯಮಾರ್ಗಗಳೆಲ್ಲವೂ ಸರಿಯಲ್ಲವೆಂದಲ್ಲ. ಬೇಡದ, ಕೇಳದ, ತಿಳಿಯದೇ ಪುಕ್ಕಟೆ ಸಲಹೆ ಕೊಡುವುದರಲ್ಲಿ ಒಬ್ಬರಿಗಿಂತ ಒಬ್ಬರು ನಿಪುಣರು.