ಹರಪನಹಳ್ಳಿ | ಹಸಿರೀಕರಣಕ್ಕೆ 9 ಲಕ್ಷ ಸಸಿ ಸಿದ್ಧ

ಕಳೆದ ವಾರದಿಂದ ತಾಲ್ಲೂಕಿನಾದ್ಯಂತ ಉತ್ತಮ ಮಳೆಯಾಗುತ್ತಿದೆ. ಏರುತ್ತಿದ್ದ ತಾಪಮಾನದಿಂದ ಬಿಸಿಯಾಗಿದ್ದ ಭೂಮಿ ತಂಪಾಗುತ್ತಿದೆ. ಹಾಗಾಗಿ ಸಸಿಗಳ ವಿತರಣೆ ಮತ್ತು ಅರಣ್ಯ ಸಂಪತ್ತು ಹೆಚ್ಚಿಸಲು ಇಲಾಖೆ ಭರದ ಸಿದ್ಧತೆ ಕೈಗೊಂಡಿದೆ.

ಪ್ರಾದೇಶಿಕ ಅರಣ್ಯ ವಿಭಾಗದಿಂದ ಕಣಿವಿಹಳ್ಳಿ ನರ್ಸರಿಯಲ್ಲಿ 7 ಲಕ್ಷ ಸಸಿಗಳು, ಸಾಮಾಜಿಕ ಅರಣ್ಯ ವಿಭಾಗದಿಂದ ದ್ಯಾಪ
ನಾಯಕನಹಳ್ಳಿ ನರ್ಸರಿಯಲ್ಲಿ 2 ಲಕ್ಷ ಸಸಿಗಳನ್ನು ಪೋಷಿಸಲಾಗುತ್ತಿದೆ. ವಿವಿಧೆಡೆ ಉತ್ತಮ ಮಳೆ ಆಗುತ್ತಿರುವ ಹಿನ್ನೆಲೆಯಲ್ಲಿ ಭೂಮಿಯಲ್ಲಿ ತೇವಾಂಶ ಹೆಚ್ಚಳವಾಗಿದೆ. ಮೇ ತಿಂಗಳ ಅಂತ್ಯಕ್ಕೆ ಸಸಿಗಳ ನಾಟಿ ಮತ್ತು ವಿತರಣೆಗೆ ಇಲಾಖೆಗಳು ಸಿದ್ಧತೆ ಆರಂಭಿಸಿವೆ. ಇಲಾಖೆಯ ಎಲ್ಲ ಹಂತದ ಸಿಬ್ಬಂದಿ, ಅಧಿಕಾರಿಗಳ ಸಸಿಗಳ ಪೋಷಣೆಗೆ ವೇಳಾಪಟ್ಟಿ ತಯಾರಿಸಿ ಸರದಿಯಲ್ಲಿ ಕೆಲಸ ಮಾಡುತ್ತಿದ್ದಾರೆ.

ಮಲೆನಾಡಿನ ಅನುಭವ ನೀಡುವ ಕಣಿವಿಹಳ್ಳಿ ನರ್ಸರಿಯಲ್ಲಿ ಬೇವು– 5,990 ಸಸಿ, ಹೊಂಗೆ 10,7312, ತಪಸಿ-15,906. ಕಮರ-1,92,278, ಬಸರಿ-5,431, ಅರಳಿ-796, ಆಲ-530, ನೇರಳೆ-5,717, ಅತ್ತಿ-6,366, ಸೀತಾಫಲ-41,376, ಸಿಮಾರೂಬ-45,000, ಬಸವನಪಾದ-1,984, ಶ್ರೀಗಂಧ-25,032, ಹುಣಸೆ-9,394, ಸಿಹಿ ಹುಣಸೆ-256, ಗೋಣಿ-755, ಸೋಮೆ-3,000, ಬೆಳವಲು-1,728, ಬಾದಾಮಿ-992, ನೆಲ್ಲಿ-11,397, ರಕ್ತಚಂದನ-10,500, ಹೊಳೆಮತ್ತಿ-5,428, ಕಕ್ಕೆ-2,576, ಬಿದಿರು-4,072, ಕರಿಬೇವು-1,676, ತಾರೆ-2,276, ಉದಯ-1,56,020, ಮುತ್ತುಗ-6,000, ಅಂಟವಾಳ-8,550, ಬೀಟೆ-9,344, ನಿಂಬೆ-1,000 ಮತ್ತು ಸಂಪಿಗೆ-3,000 ಸಸಿ ಒಳಗೊಂಡು ಒಟ್ಟು, 7,00,588 ಸಸಿಗಳನ್ನು ಬೆಳೆಸಲಾಗಿದೆ ಎನ್ನುತ್ತಾರೆ ವಲಯ ಅರಣ್ಯಾಧಿಕಾರಿ ಡಿ.ಭರತ್.

ಕಣಿವಿಹಳ್ಳಿ ನರ್ಸರಿಗೆ ಒಬ್ಬ ಸಹಾಯಕ ವಲಯ ಅರಣ್ಯಾಧಿಕಾರಿಯನ್ನು ನೇಮಿಸಲಾಗಿದೆ. ಇಲ್ಲಿ ತಯಾರಾದ ಸಸಿಗಳನ್ನು ಮೇ ಅಂತ್ಯಕ್ಕೆ ಚೆಕ್‍ ಲೀಸ್ಟ್‌ ತಯಾರಿಸಲಾಗುವುದು ಎಂದು
ಅವರು ತಿಳಿಸಿದರು.

ಸಾಮಾಜಿಕ ಅರಣ್ಯ ವಿಭಾಗವು ವಿವಿಧ ಜಾತಿಯ 2 ಲಕ್ಷ ಸಸಿಗಳನ್ನು ಪಾಲನೆ ಮಾಡುತ್ತಿದೆ. ಜೂನ್ ಮೊದಲ ವಾರದಲ್ಲಿ ಸಸಿಗಳನ್ನು ವಿತರಿಸಲಾಗುವುದು ಎಂದು ಸಾಮಾಜಿಕ ಅರಣ್ಯಾಧಿಕಾರಿ ಕಾಂತೇಶ್ ತಿಳಿಸಿದರು.

*
ಸಾರ್ವಜನಿಕರಿಗೆ ಕಡಿಮೆ ಪ್ರಮಾಣದಲ್ಲಿ ವಿತರಿಸಲಾಗುವುದು. ಉಳಿದ ಸಸಿಗಳನ್ನು ಅರಣ್ಯ ಭೂಮಿಯ ಖಾಲಿ ಪ್ರದೇಶದಲ್ಲಿ ಅರಣ್ಯೀಕರಣ ಮಾಡುವ ಉದ್ದೇಶ ಇದೆ.
-ಡಿ.ಭರತ್, ವಲಯ ಅರಣ್ಯಾಧಿಕಾರಿ