ಬೆಂಗಳೂರು: ಜಯನಗರದ ಮನೆಯೊಂದರ ಮೇಲೆ ದಾಳಿ ನಡೆಸಿದ ಆದಾಯ ಗುಪ್ತಚರ ನಿರ್ದೇಶನಾಲಯದ (ಡಿಆರ್‌ಐ) ಅಧಿಕಾರಿಗಳು, ₹13 ಲಕ್ಷ ಮೌಲ್ಯದ ನಿಷೇಧಿತ ಸೌಂದರ್ಯ ವರ್ಧಕವನ್ನು ಜಪ್ತಿ ಮಾಡಿದ್ದಾರೆ.
ಚರ್ಮದ ಬಣ್ಣ ಬಿಳುಪು ಮಾಡುವ ಉದ್ದೇಶಕ್ಕಾಗಿ ನಗರದ ಬ್ಯೂಟಿಪಾರ್ಲರ್‌ಗಳಲ್ಲಿ ‘ಸ್ಕಿನ್ ವೈಟ್ನಿಂಗ್ ಪೌಡರ್’ ಹೆಸರಿನ ಸೌಂದರ್ಯ ವರ್ಧಕವನ್ನು ಬಳಸಲಾಗುತ್ತಿತ್ತು. ಇದು ಅಪಾಯಕಾರಿ ಪುಡಿ. ಆ ಬಗ್ಗೆ ಮಾಹಿತಿ ಬರುತ್ತಿದ್ದಂತೆ ದಾಳಿ ಮಾಡಿ ನಾಲ್ವರನ್ನು ವಶಕ್ಕೆ ಪಡೆದು ವಿಚಾರಣೆ ನಡೆಸುತ್ತಿದ್ದೇವೆ ಎಂದು ಡಿಆರ್‌ಐ ಮೂಲಗಳು ತಿಳಿಸಿವೆ.
ಈ ವರ್ಧಕವನ್ನು ಚೀನಾ, ಮಲೇಷ್ಯಾದಿಂದ ಸಮುದ್ರದ ಮಾರ್ಗವಾಗಿ ಭಾರತಕ್ಕೆ ಅಕ್ರಮವಾಗಿ ಆಮದು ಮಾಡಿಕೊಳ್ಳಲಾಗುತ್ತಿತ್ತು. ವಾಹನಗಳ ಮೂಲಕ ಬೆಂಗಳೂರಿಗೆ ತರಲಾಗಿತ್ತು. ನಗರದ ಬ್ಯೂಟಿ ಪಾರ್ಲರ್‌ಗಳಿಗೆ ಈ ಪುಡಿಯನ್ನು ಸರಬರಾಜು ಮಾಡಲಾಗುತ್ತಿತ್ತು. ಇತ್ತೀಚೆಗೆ ಆಹಾರದ ಪುಡಿ ಸೋಗಿನಲ್ಲಿ ಪ್ಯಾಕ್‌ ಮಾಡಿದ್ದ 100 ಬಾಟಲ್‌ಗಳಲ್ಲಿ ಈ ಸೌಂದರ್ಯ ವರ್ಧಕವನ್ನು ತರಿಸಲಾಗಿತ್ತು. ಅವುಗಳೆಲ್ಲವನ್ನೂ ಜಪ್ತಿ ಮಾಡಿದ್ದೇವೆ ಎಂದರು.
ಪುಡಿ ಮಾರಾಟ ಜಾಲ ಹಲವು ವರ್ಷಗಳಿಂದ ರಾಜ್ಯದಲ್ಲಿ ಸಕ್ರಿಯವಾಗಿದೆ. ಬೆಂಗಳೂರಿನ ಬಹುಪಾಲು ಬ್ಯೂಟಿಪಾರ್ಲರ್‌ಗಳಲ್ಲಿ ಇದನ್ನು ಬಳಸುತ್ತಿರುವ ಮಾಹಿತಿ ಇದೆ. ಇದರಲ್ಲಿ ಮತ್ತಷ್ಟು ಮಂದಿ ಶಾಮೀಲಾಗಿರುವ ಶಂಕೆಯೂ ಇರುವುದಾಗಿ ಮೂಲಗಳು ಹೇಳಿವೆ.
