ಮಳೆಯಲ್ಲೇ ದೇಶಭಕ್ತಿಯ ಪರಾಕಾಷ್ಠೆ

7
ಹೊಸಪೇಟೆಯಲ್ಲಿ ವರ್ಷಧಾರೆಯಲ್ಲಿ ಸಾಂಸ್ಕೃತಿಕ ಕಾರ್ಯಕ್ರಮ ನಡೆಸಿಕೊಟ್ಟ ಚಿಣ್ಣರು; ಆಕರ್ಷಕ ಪಥ ಸಂಚಲನ

ಮಳೆಯಲ್ಲೇ ದೇಶಭಕ್ತಿಯ ಪರಾಕಾಷ್ಠೆ

Published:
Updated:
Deccan Herald

ಹೊಸಪೇಟೆ: ಕಳೆದ ಐದು ದಿನಗಳಿಂದ ನಿರಂತರವಾಗಿ ಸುರಿಯುತ್ತಿರುವ ಮಳೆ ಸ್ವಾತಂತ್ರ್ಯ ದಿನವಾದ ಬುಧವಾರವಾದರೂ ಬಿಡುವು ಕೊಡಬಹುದು ಎಂದು ಜನ ಅಂದುಕೊಂಡಿದ್ದರು. ಆದರೆ, ಅವರ ನಿರೀಕ್ಷೆ ಸುಳ್ಳಾಗಿತ್ತು. ಬೆಳಿಗ್ಗೆಯಿಂದಲೇ ವರುಣದೇವ ಒಂದೇ ಸಮನೆ ಸುರಿಯುತ್ತಿದ್ದ. ಆದರೆ, ಶಾಲಾ–ಕಾಲೇಜಿನ ಮಕ್ಕಳು, ವಯಸ್ಕರು ಅದನ್ನು ಲೆಕ್ಕಿಸದೆ ಧ್ವಜಾರೋಹಣ ಕಾರ್ಯಕ್ರಮದಲ್ಲಿ ಪಾಲ್ಗೊಂಡು, ತ್ರಿವರ್ಣ ಧ್ವಜಕ್ಕೆ ಗೌರವ ಸೂಚಿಸಿ ಸುರಿವ ಮಳೆಯಲ್ಲೇ ದೇಶಭಕ್ತಿಯ ಪರಾಕಾಷ್ಠೆ ಮೆರೆದರು.

ಸ್ವಾತಂತ್ರ್ಯ ದಿನಾಚರಣೆ ಅಂಗವಾಗಿ ನಗರದ ಮುನ್ಸಿಪಲ್‌ ಮೈದಾನದಲ್ಲಿ ಬುಧವಾರ ಹಮ್ಮಿಕೊಂಡಿದ್ದ ಧ್ವಜಾರೋಹಣ ಕಾರ್ಯಕ್ರಮದಲ್ಲಿ ಕಂಡು ಬಂದ ದೃಶ್ಯಗಳಿವು.

ಎಡೆಬಿಡದೆ ಮಳೆ ಸುರಿಯುತ್ತಿದ್ದರೂ ಪೊಲೀಸರು, ಗೃಹರಕ್ಷಕ ಸಿಬ್ಬಂದಿ, ಎನ್‌.ಸಿ.ಸಿ. ಕೆಡೆಟ್‌ಗಳು ಹಾಗೂ ವಿವಿಧ ಶಾಲಾ, ಕಾಲೇಜಿನ ವಿದ್ಯಾರ್ಥಿಗಳು ಶಿಸ್ತು ಮೀರಲಿಲ್ಲ. ಸಂಯಮ ವಹಿಸಿದರು. ಸುರಿವ ಮಳೆಯಲ್ಲೇ ಸಾಂಸ್ಕೃತಿಕ ಕಾರ್ಯಕ್ರಮಗಳ ಮೂಲಕ ದೇಶದ ಸ್ವಾತಂತ್ರ್ಯಕ್ಕಾಗಿ ಮಡಿದ ಸ್ವಾತಂತ್ರ್ಯ ಸೇನಾನಿಗಳ ಹೋರಾಟವನ್ನು ಸ್ಮರಿಸಿ, ಅಲ್ಲಿದ್ದವರಲ್ಲಿ ರೋಮಾಂಚನ ಮೂಡಿಸಿದರು.

ಬೆಳಿಗ್ಗೆ 9ಕ್ಕೆ ತುಂತುರು ಮಳೆಯ ನಡುವೆ ಉಪವಿಭಾಗಾಧಿಕಾರಿ ಗಾರ್ಗಿ ಜೈನ್‌ ಅವರು ಧ್ವಜಾರೋಹಣ ನೆರವೇರಿಸಿದರು. ಗೌರವ ವಂದನೆ ಸ್ವೀಕರಿಸಿದರು. ನಂತರ ಕಮಾಂಡರ್‌ ಮೊಹಮ್ಮದ್‌ ಗೌಸ್‌ ನೇತೃತ್ವದಲ್ಲಿ 32 ತುಕಡಿಗಳಿಂದ ಆಕರ್ಷಕ ಪಥ ಸಂಚಲನ ನಡೆಯಿತು. ಸ್ಫೂರ್ತಿ ವೇದಿಕೆಯ ಕಾರ್ಯಕರ್ತರು ಹಂಪಿಯಿಂದ ತಂದ ಭುವನೇಶ್ವರಿ ತಾಯಿಯ ಜ್ಯೋತಿಯನ್ನು ಜೈನ್‌ ಅವರು ಬರಮಾಡಿಕೊಂಡು, ಅದನ್ನು ಮೈದಾನದಲ್ಲಿ ಬೆಳಗಿಸಿದರು.

ಬಳಿಕ ಮಾತನಾಡಿದ ಗಾರ್ಗಿ ಜೈನ್‌, ‘ಕಳೆದ 72 ವರ್ಷಗಳಲ್ಲಿ ಭಾರತ ಸಾಕಷ್ಟು ಪ್ರಗತಿ ಸಾಧಿಸಿದೆ. ಇನ್ನೂ ಸಾಧಿಸಬೇಕಾದದ್ದು ಬಹಳಷ್ಟಿದೆ. ಜ್ಞಾನದ ಜತೆ ಜತೆಎ ಸ್ವಚ್ಛತೆ ಕಡೆಗೂ ನಾವೆಲ್ಲರೂ ಗಮನ ಹರಿಸಬೇಕು. ‘ಸ್ವಚ್ಛ ಭಾರತ’ ಪರಿಕಲ್ಪನೆಯನ್ನು ಸಾಕಾರಗೊಳಿಸಲು ಎಲ್ಲರೂ ಶ್ರಮಿಸಬೇಕು’ ಎಂದು ಹೇಳಿದರು.

ಲಿಟ್ಲ್‌ ಫ್ಲವರ್‌ ಶಾಲೆಯ 150 ವಿದ್ಯಾರ್ಥಿಗಳು ‘ನನ್ನ ದೇಶ’ ಕಾರ್ಯಕ್ರಮ ನಡೆಸಿಕೊಟ್ಟರು. ತ್ರಿವರ್ಣ ಧ್ವಜ ಹೋಲುವ ಕೇಸರಿ, ಬಿಳಿ, ಹಸಿರು ಬಣ್ಣದ ವಸ್ತ್ರ ತೊಟ್ಟು ಚಿಣ್ಣರು ಕಾರ್ಯಕ್ರಮ ಪ್ರಸ್ತುತಪಡಿಸಿದರು. ಅದೇ ಶಾಲೆಯ ಮಕ್ಕಳು ‘ಸುರಪುರದ ವೆಂಕಟಪ್ಪ ನಾಯಕ’ ರೂಪಕ ಪ್ರದರ್ಶಿಸಿದರು. ಬ್ರಿಟಿಷರು ಹಾಗೂ ವೆಂಕಟಪ್ಪ ನಾಯಕನ ಸೇನೆ ಕಾದಾಡುವ ಸನ್ನಿವೇಶ ಥೇಟ್‌ ಯುದ್ಧಭೂಮಿಯನ್ನು ನೆನಪಿಸಿತು. ಈ ವೇಳೆ ಮಳೆ ಬಿರುಸಾಗಿ ಸುರಿಯಲು ಆರಂಭಿಸಿತು. ಆದರೆ, ಅದರಲ್ಲೇ ನೆನೆದುಕೊಂಡು ಕಾರ್ಯಕ್ರಮ ನೀಡಿದರು. ನರ್ಮದಾ ಶಾಲೆಯ ಮಕ್ಕಳು ‘ವಂದೇ ಮಾತರಂ’ ಗೀತೆ ನೃತ್ಯ ಮಾಡಿದರು.

ಎಸ್ಸೆಸ್ಸೆಲ್ಸಿಯಲ್ಲಿ ಅತಿ ಹೆಚ್ಚು ಅಂಕ ಗಳಿಸಿದ ಕಂಪ್ಲಿ ವಿದ್ಯಾಸಾಗರ ಶಾಲೆಯ ನಿಧಾ ಸಮ್ರಿನ್‌ ಅವರಿಗೆ ಪ್ರಶಸ್ತಿ ನೀಡಿ ಗೌರವಿಸಲಾಯಿತು. ಅದೇ ಶಾಲೆಯ ಲಕ್ಷ್ಮಿ, ನಗರದ ನಿವೇದಿತಾ ಶಾಲೆಯ ಅನನ್ಯ ಅವರನ್ನು ಸನ್ಮಾನಿಸಲಾಯಿತು. ಪವರ್‌ ಲಿಫ್ಟರ್‌ ದಯಾನಂದ ಕಿಚಿಡಿ ಅವರಿಗೆ ಪ್ರಮಾಣ ಪತ್ರ ನೀಡಿ ಗೌರವಿಸಲಾಯಿತು.

ನಗರಸಭೆ ಅಧ್ಯಕ್ಷ ಗುಜ್ಜಲ್‌ ನಿಂಗಪ್ಪ, ಪೌರಾಯುಕ್ತ ವಿ. ರಮೇಶ್‌, ತಹಶೀಲ್ದಾರ್‌ ಎಚ್‌. ವಿಶ್ವನಾಥ್‌, ಜಿಲ್ಲಾ ಪಂಚಾಯಿತಿ ಸದಸ್ಯೆ ಜಯಕುಮಾರಿ ಈಶ್ವರ್‌, ಪಿ.ಎಲ್‌.ಡಿ. ಬ್ಯಾಂಕ್‌ ಅಧ್ಯಕ್ಷ ಅಮಾಜಿ ಹೇಮಣ್ಣ, ತಾಲ್ಲೂಕು ಪಂಚಾಯಿತಿ ಕಾರ್ಯನಿರ್ವಾಹಕ ಅಧಿಕಾರಿ ಟಿ. ವೆಂಕೋಬಪ್ಪ, ಕ್ಷೇತ್ರ ಶಿಕ್ಷಣಾಧಿಕಾರಿ ಎಲ್‌.ಡಿ. ಜೋಶಿ ಇದ್ದರು.

ಪಟಗಿ ನಾರಾಯಣರಾವ್‌ ಶಿಕ್ಷಣ ಸಂಸ್ಥೆ: ಸಂಸ್ಥೆಯ ಬಸಮ್ಮ ಪದವಿ ಮತ್ತು ಪದವಿಪೂರ್ವ ಕಾಲೇಜಿನಲ್ಲಿ ನಿರ್ದೇಶಕ ವೀರಾಂಜನೇಯ ಧ್ವಜಾರೋಹಣ ಮಾಡಿದರು. ಉಪನ್ಯಾಸಕರಾದ ಗೋಪಾಲ್‌ರಾವ್‌, ಜಮೀಲ್‌ ಅಹಮ್ಮದ್‌, ಶ್ರೀದೇವಿ, ಹೇಮಾವತಿ, ಭಾರ್ಗವಿ, ಮಂಜುಳಾ, ಶ್ರುತಿ ಇದ್ದರು.
ಥಿಯೊಸಫಿಕಲ್‌ ಕಾಲೇಜು: ಆಡಳಿತ ಮಂಡಳಿ ಉಪಾಧ್ಯಕ್ಷ ಜಿ. ಭರಮಲಿಂಗನಗೌಡರು ಧ್ವಜಾರೋಹಣ ಮಾಡಿದರು. ಜಂಟಿ ಕಾರ್ಯದರ್ಶಿ ಅರಳಿಕೊಟ್ರಪ್ಪ, ಭೂಪಾಳ್‌ ಪ್ರಹ್ಲಾದ್‌, ಪ್ರಾಚಾರ್ಯೆ ಬಿ. ಮಂಜುಳಾ, ಭಾಗ್ಯಲಕ್ಷ್ಮಿ ಭರಾಡೆ, ಸುನಿತಾ, ಎನ್‌.ಎಸ್‌.ಎಸ್‌. ಅಧಿಕಾರಿ ಸಿ. ದಿನಮಣಿ ಇದ್ದರು.
ಆಶ್ರಯ ಕಾಲೊನಿ: ತಾಲ್ಲೂಕಿನ ಜಂಬುನಾಥಹಳ್ಳಿ ಸುಡುಗಾಡು ಸಿದ್ಧರ ಆಶ್ರಯ ಕಾಲೊನಿಯ 21ನೇ ವಾರ್ಡ್‌ನಲ್ಲಿ ಅಲೆಮಾರಿ ಸಮುದಾಯಗಳ ಶಾಲೆ ಆವರಣದಲ್ಲಿ ಸ್ವಾತಂತ್ರ್ಯ ದಿನ ಆಚರಿಸಲಾಯಿತು.
ಅಲೆಮಾರಿ ಗುಡಾರ ಗುಡಿಸಲು ನಿವಾಸಿ ಕಲ್ಯಾಣ ಸಂಘದ ಜಿಲ್ಲಾಧ್ಯಕ್ಷ ಸಣ್ಣ ಮಾರೆಪ್ಪ, ಸುಡುಗಾಡು ಸಿದ್ದರ ಸಮಾಜದ ಜಿಲ್ಲಾಧ್ಯಕ್ಷ ಕಲ್ಯಾಣ ಶೇಕಪ್ಪ, ಮುಖಂಡರಾದ ಕಿನ್ನೂರಿ ಶೇಕಪ್ಪ, ವಿರೂಪಾಕ್ಷಪ್ಪ ಇದ್ದರು.
ಹಂಪಿ ಕನ್ನಡ ವಿಶ್ವವಿದ್ಯಾಲಯ: ಕುಲಪತಿ ಪ್ರೊ. ಮಲ್ಲಿಕಾ ಎಸ್‌. ಘಂಟಿ ಅವರು ಧ್ವಜಾರೋಹಣ ನೆರವೇರಿಸಿದರು. ಬಳಿಕ ಎಸ್‌.ಸಿ.ಎಸ್‌.ಪಿ. ಹಾಗೂ ಟಿ.ಎಸ್‌.ಪಿ. ಅನುದಾನದ ಅಡಿಯಲ್ಲಿ ಪರಿಶಿಷ್ಟ ಜಾತಿ, ಪರಿಶಿಷ್ಟ ಪಂಗಡ ಹಾಗೂ ಹಿಂದುಳಿದ ವರ್ಗದವರಿಗೆ ಲ್ಯಾಪ್‌ಟಾಪ್‌ಗಳನ್ನು ವಿತರಿಸಿದರು. ಕುಲಸಚಿವ ಪಿ. ಮಹಾದೇವಯ್ಯ, ಡೀನ್‌ ಮಂಜುನಾಥ ಬೇವಿನಕಟ್ಟಿ, ಪ್ರಾಧ್ಯಾಪಕ ಸಿ. ಮಹದೇವ, ಎ. ವೆಂಕಟೇಶ ಇದ್ದರು.

ಬರಹ ಇಷ್ಟವಾಯಿತೆ?

  • 1

    Happy
  • 0

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !