ನಿರುದ್ಯೋಗವೇ ಜನಾಂದೋಲನ ಅಸ್ತ್ರ

7
‘ಸ್ವರಾಜ್‌ ಇಂಡಿಯಾ’ ಪಕ್ಷದ ಎರಡು ದಿನಗಳ ಕಾರ್ಯಾಗಾರಕ್ಕೆ ತೆರೆ; ಮುಖಂಡ ವಾಸು ಹೇಳಿಕೆ

ನಿರುದ್ಯೋಗವೇ ಜನಾಂದೋಲನ ಅಸ್ತ್ರ

Published:
Updated:
Deccan Herald

ಹೊಸಪೇಟೆ: ತಾಲ್ಲೂಕಿನ ಹಂಪಿ ಶಿವರಾಮ ಅವಧೂತರ ಮಠದಲ್ಲಿ ‘ಸ್ವರಾಜ್‌ ಇಂಡಿಯಾ’ ಪಕ್ಷದಿಂದ ಹಮ್ಮಿಕೊಂಡಿದ್ದ ‘ಹೊಸ ರಾಜಕಾರಣಕ್ಕೆ ಹೊಸನಡಿಗೆ, ಹೊಸಮುಖ’ ಕುರಿತ ಎರಡು ದಿನಗಳ ಅಧ್ಯಯನ ಶಿಬಿರಕ್ಕೆ ಭಾನುವಾರ ತೆರೆ ಬಿತ್ತು.

ಮುಖಂಡ ವಾಸು ಮಾತನಾಡಿ, ‘ದೇಶದಲ್ಲಿ ನಿರುದ್ಯೋಗ ಪೆಡಂಭೂತವಾಗಿ ಕಾಡುತ್ತಿದೆ. ವರ್ಷದಿಂದ ವರ್ಷಕ್ಕೆ ದೊಡ್ಡ ಸಮಸ್ಯೆಯಾಗುತ್ತಿದೆ. ದೇಶದ ಜನಸಂಖ್ಯೆಯಲ್ಲಿ ಶೇ 65ರಷ್ಟಿರುವ ಯುವಕರ ಪೈಕಿ ಹೆಚ್ಚಿನವರು ನಿರುದ್ಯೋಗಿಗಳಿದ್ದಾರೆ. ಈ ವಿಷಯವನ್ನು ಇಟ್ಟುಕೊಂಡು ದೇಶದಾದ್ಯಂತ ಚಳವಳಿ ನಡೆಸುವ ಅಗತ್ಯವಿದೆ’ ಎಂದು ಹೇಳಿದರು.

‘2009ರಿಂದ ನಿರುದ್ಯೋಗ ಸಮಸ್ಯೆ ದೊಡ್ಡ ಸ್ವರೂಪ ಪಡೆದುಕೊಳ್ಳುತ್ತಿದೆ. 2014ನೇ ಸಾಲಿನಲ್ಲಿ ಶೇ 4ರಷ್ಟು ಉದ್ಯೋಗ ಸೃಷ್ಟಿ ಆಗುತ್ತಿದ್ದವು. ಈಗ ಅದು –0.4ಕ್ಕೆ ಕುಸಿದಿದೆ. ಉದ್ಯೋಗಗಳು ಹೆಚ್ಚಾಗುವುದರ ಬದಲು ಕಡಿಮೆಯಾಗಿವೆ. ಇದಕ್ಕೆ ಎಲ್ಲ ರಾಜಕೀಯ ಪಕ್ಷಗಳು ಕಾರಣ. ಇಂದಿಗೂ ದೇಶದಲ್ಲಿ ಹೆಚ್ಚಿನ ಜನ ಕೃಷಿ ಕ್ಷೇತ್ರವನ್ನು ಅವಲಂಬಿಸಿದ್ದಾರೆ. ಆದರೆ, ಅದು ಲಾಭದಾಯಕ ಹಾಗೂ ಪ್ರತಿಷ್ಠೆಯ ಕೆಲಸವಾಗಿ ಬದಲಾಗಿಲ್ಲ. ಇದರಿಂದ ಯುವಕರು ಕೃಷಿಯಿಂದ ವಿಮುಖರಾಗುತ್ತಿದ್ದಾರೆ’ ಎಂದರು.

‘ದೇಶದಲ್ಲಿ ದೊಡ್ಡ ಪ್ರಮಾಣದಲ್ಲಿ ನಿರುದ್ಯೋಗದ ಸಮಸ್ಯೆಯಿದ್ದರೂ ಯುವಜನಾಂಗ ಅದಕ್ಕೆ ಸರಿಯಾಗಿ ಪ್ರತಿಕ್ರಿಯಿಸುತ್ತಿಲ್ಲ. ಅದರ ಬಗ್ಗೆ ಯುವಕರಿಗೆ ತಿಳಿಸಿಕೊಡಬೇಕು. ಜತೆಗೆ ಉದ್ಯೋಗಗಳನ್ನು ಹೇಗೆ ಸೃಷ್ಟಿಸಬೇಕು ಎಂಬುದನ್ನು ತಿಳಿಸಿಕೊಟ್ಟು, ಯುವಕರನ್ನು ಆಂದೋಲನದ ಭಾಗ ಮಾಡಿಕೊಂಡರೆ ‘ಸ್ವರಾಜ್‌ ಇಂಡಿಯಾ’ ಪಕ್ಷ ‘ಆಮ್‌ ಆದ್ಮಿ ಪಕ್ಷ’ (ಎ.ಎ.ಪಿ.) ಭ್ರಷ್ಟಾಚಾರದ ವಿರುದ್ಧ ಹೋರಾಟ ನಡೆಸಿ ಜನರ ಮನೆ ಮಾತಾಗಿರುವಂತೆ ಆಗುವ ಸಾಧ್ಯತೆಗಳು ಹೆಚ್ಚಿವೆ’ ಎಂದು ಹೇಳಿದರು.

ಪಕ್ಷದ ರಾಜ್ಯ ಸಮಿತಿ ಸದಸ್ಯ ದೊಡ್ಡಿಪಾಳ್ಯ ನರಸಿಂಹಮೂರ್ತಿ ಮಾತನಾಡಿ, ‘ಪಕ್ಷದ ಸಂಘಟನೆ ಜತೆ ಜತೆಗೆ ಹೋರಾಟ ಮುಂದುವರಿಯಬೇಕು. ಚಳವಳಿ ಪ್ರಧಾನವಾದ ರಾಜಕೀಯ ಮಾಡಿದರೆ ಮಾತ್ರ ಭವಿಷ್ಯವಿದೆ. ಈ ನಿಟ್ಟಿನಲ್ಲಿ ಗಂಭೀರ ಯೋಚನೆ ಮಾಡುವ ಅಗತ್ಯವಿದೆ’ ಎಂದರು.

ಇನ್ನೊಬ್ಬ ಮುಖಂಡ ನಂಜೇಗೌಡ ಮಾತನಾಡಿ, ‘ಯಾವುದೇ ಪಕ್ಷವಿರಲಿ ಅಲ್ಲಿ ವ್ಯಕ್ತಿಗಿಂತ ಸಂಘಟನೆ ಮುಖ್ಯವಾಗಬೇಕು. ಎ.ಎ.ಪಿ. ವ್ಯಕ್ತಿ ಕೇಂದ್ರೀತವಾದದ್ದರಿಂದಲೇ ಯೋಗೇಂದ್ರ ಯಾದವ್‌ ಅವರು ಆ ಪಕ್ಷ ತೊರೆದು ‘ಸ್ವರಾಜ್‌ ಇಂಡಿಯಾ’ ಕಟ್ಟಿದ್ದು. ಇಲ್ಲಿ ಆ ರೀತಿಯ ಬೆಳವಣಿಗೆಗಳು ಆಗದಂತೆ ಎಚ್ಚರ ವಹಿಸಬೇಕಿದೆ’ ಎಂದು ತಿಳಿಸಿದರು.

ರೈತ ಸಂಘದ ಕಾರ್ಯಾಧ್ಯಕ್ಷ ಜೆ.ಎಂ. ವೀರಸಂಗಯ್ಯ, ಜಿಲ್ಲಾ ಅಧ್ಯಕ್ಷ ಗೋಣಿ ಬಸಪ್ಪ, ಮುಕಂಡರಾದ ರಾಜೇಶ್‌, ಕಲೀಂ ಉಲ್ಲಾ, ಎ.ಕೆ. ಶರ್ಮಾ, ಪುಷ್ಪಾ ಇದ್ದರು.

Tags: 

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !