6
11 ಎಕರೆ ಜಮೀನು ಖಾಸಗಿ ವ್ಯಕ್ತಿಗಳಿಗೆ ವರ್ಗಾವಣೆ ಮಾಡಿಕೊಡುವಂತೆ ಹೈಕೋರ್ಟ್‌ ಆದೇಶ

ಪಟ್ಟಂದೂರು ಅಗ್ರಹಾರ ಕೆರೆಗೆ ಕುತ್ತು...!

Published:
Updated:
ಪಟ್ಟಂದೂರು ಅಗ್ರಹಾರ ಕೆರೆಗೆ ಕುತ್ತು...!

ಬೆಂಗಳೂರು: ಸಿವಿಲ್‌ ಕೋರ್ಟ್ ಆದೇಶದ ಅನುಸಾರ ಪಟ್ಟಂದೂರು ಕೆರೆಗೆ ಸೇರಿದ 11 ಎಕರೆ ಜಮೀನನ್ನು ಖಾಸಗಿ ವ್ಯಕ್ತಿಗಳ ಹೆಸರಿಗೆ ವರ್ಗಾವಣೆ ಮಾಡಿಕೊಡಬೇಕೆಂಬ ಆದೇಶದ ಬಗ್ಗೆ ಸುಪ್ರೀಂ ಕೋರ್ಟ್ ವಕೀಲ ಕೆ.ವಿ.ಧನಂಜಯ ತೀವ್ರ ಆಕ್ಷೇಪ ವ್ಯಕ್ತಪಡಿಸಿದ್ದಾರೆ.

ಈ ಕುರಿತಂತೆ  ಜೂ.2ರಂದು ಸಾಮಾಜಿಕ ಜಾಲತಾಣದಲ್ಲಿ ಸವಿವರ ಆಕ್ಷೇಪವನ್ನು ಪೋಸ್ಟ್ ಮಾಡಿರುವ ಅವರು, ‘ನನ್ನ ಈ ಮನವಿ ಪ್ರಧಾನಿ ನರೇಂದ್ರ ಮೋದಿ ಹಾಗೂ ನವದೆಹಲಿಯಲ್ಲಿರುವ ವಿಶ್ವಸಂಸ್ಥೆ ಕಚೇರಿಗೂ ತಲುಪಿದೆ’ ಎಂದು ‘ಪ್ರಜಾವಾಣಿ’ಗೆ ತಿಳಿಸಿದ್ದಾರೆ.

‘ಈ ಕುರಿತ ಪ್ರಕರಣದಲ್ಲಿ ಅರ್ಜಿದಾರರು ಹೈಕೋರ್ಟ್‌ ಹಾದಿ ತಪ್ಪಿಸುವ ಪ್ರಯತ್ನ ಮಾಡಿದ್ದಾರೆ. ಸಿವಿಲ್‌ ಕೋರ್ಟ್ ಡಿಕ್ರಿಯನ್ನು ಅಧಿಕಾರಿಗಳು ಪಾಲಿಸಿಲ್ಲ ಎಂದು ಹೈಕೋರ್ಟ್‌ನಲ್ಲಿ ಸಿವಿಲ್ ನ್ಯಾಯಾಂಗ ನಿಂದನೆ ಮೊಕದ್ದಮೆ ದಾಖಲಿಸುವ ಮೂಲಕ ಖಾಸಗಿ ವ್ಯಕ್ತಿಗಳು ಸಾವಿರ ವರ್ಷಗಳಷ್ಟು ಹಳೆಯದಾದ ಪ್ರಾಚೀನ ಕೆರೆ ಪ್ರದೇಶವನ್ನು ಕೈವಶ ಮಾಡಿಕೊಳ್ಳಲು ಮುಂದಾಗಿರುವುದು ಆತಂಕದ ವಿಷಯ’ ಎಂದಿದ್ದಾರೆ.

ಈ ಮಾತಿಗೆ ದನಿಗೂಡಿಸುವ ಹೆಚ್ಚುವರಿ ಅಡ್ವೊಕೇಟ್‌ ಜನರಲ್ ಎ.ಜಿ.ಶಿವಣ್ಣ, ‘ಇಂತಹ ಪ್ರಕರಣಗಳಲ್ಲಿ ಸರ್ಕಾರಿ ಅಧಿಕಾರಿಗಳ ವೈಫಲ್ಯ ಎದ್ದು ಕಾಣುತ್ತದೆ. ಸಿವಿಲ್‌ ಪ್ರಕರಣಗಳಲ್ಲಿ ಮೇಲಿನ ಕೋರ್ಟ್‌ಗಳಿಗೆ ಅವಧಿ ಮೀರಿದ ಮೇಲೆ ಮೇಲ್ಮನವಿ ಸಲ್ಲಿಸುವುದರಿಂದ ಅಧೀನ ನ್ಯಾಯಾಲಯಗಳ ಆದೇಶವೇ ಊರ್ಜಿತಗೊಳ್ಳುವ ಸಾಧ್ಯತೆ ಹೆಚ್ಚಾಗಿರುತ್ತದೆ. ಇದರಿಂದಾಗಿ ಬಹಳಷ್ಟು ಪ್ರಕರಣಗಳಲ್ಲಿ ಸರ್ಕಾರಕ್ಕೆ ಹಿನ್ನಡೆಯಾಗಿ ಕೋಟ್ಯಂತರ ರೂಪಾಯಿ ಮೌಲ್ಯದ ಸ್ಥಿರಾಸ್ತಿಗಳು ಖಾಸಗಿಯವರ ಪಾಲಾಗುತ್ತಿವೆ’ ಎಂದು ಬೇಸರ ವ್ಯಕ್ತಪಡಿಸುತ್ತಾರೆ.

‘ಹೈಕೋರ್ಟ್‌ನಲ್ಲಿನ ರಿಟ್‌ ಅರ್ಜಿಗಳ ಆದೇಶ ಹಾಗೂ ಹೈಕೋರ್ಟ್‌ಗೆ ಬರೆದುಕೊಟ್ಟ ಮುಚ್ಚಳಿಕೆ ಅನುಸರಿಸದೇ ಹೋದ ಪ್ರಕರಣಗಳು ಮಾತ್ರ ಹೈಕೋರ್ಟ್‌ ಮುಂದೆ ತರಬಹುದಾದ ನ್ಯಾಯಾಂಗ ನಿಂದನೆ ಪ್ರಕರಣ ಎನಿಸಿಕೊಳ್ಳುತ್ತವೆ. ಆದರೆ, ಸಿವಿಲ್ ಕೋರ್ಟ್‌ ವ್ಯಾಪ್ತಿಗೆ ಹೋದಂತಹ ಆಸ್ತಿ ವ್ಯಾಜ್ಯಗಳನ್ನು ಅಲ್ಲೇ ತೀರ್ಮಾನ ಮಾಡಬೇಕು. ಅದರ ಅನುಷ್ಠಾನಕ್ಕೆ (ಎಕ್ಸಿಕ್ಯೂಷನ್‌) ಹೈಕೋರ್ಟ್‌ ಮೊರೆ ಹೋಗಲು ಬರುವುದಿಲ್ಲ. ಆಸ್ತಿ ವ್ಯಾಜ್ಯಗಳ ಆದೇಶ ಅನುಷ್ಠಾನ ಆಗದೇ ಇದ್ದರೆ ಅದು ಹೈಕೋರ್ಟ್‌ ವ್ಯಾಪ್ತಿಗೆ ಬರುವುದಿಲ್ಲ. ಅದು ಪುನಃ ಸಿವಿಲ್‌ ಕೋರ್ಟ್‌ಗೆ ಹೋಗಬೇಕು’ ಎನ್ನುತ್ತಾರೆ ಅವರು.

ಪಟ್ಟಂದೂರು ಅಗ್ರಹಾರ ಗ್ರಾಮದ ಸರ್ವೇ ನಂ.54ರಲ್ಲಿ 11 ಎಕರೆ 20 ಗುಂಟೆ ಜಮೀನನ್ನು ಅರ್ಜಿದಾರರ ಹೆಸರಿಗೆ ನೀಡುವಂತೆ ಸಿವಿಲ್‌ ಕೋರ್ಟ್‌ ನೀಡಿರುವ ಡಿಕ್ರಿ ಪಾಲಿಸುತ್ತಿಲ್ಲ ಎಂದು ವೈಟ್‌ಫೀಲ್ಡ್‌ ನಿವಾಸಿ 86 ವರ್ಷದ ಎ.ಶಕುಂತಲಾ, ಡಿ.ಎಂ.ಪದ್ಮನಾಭ, ಎಂ.ಪ್ರೇಮಕುಮಾರಿ, ಎಂ.ಮೋಹನಸುಂದರ್, ಎಂ.ರಾಜಶೇಖರ ಮತ್ತು ಎಂ.ಚಂದ್ರಶೇಖರ ಸಲ್ಲಿಸಿರುವ ನ್ಯಾಯಾಂಗ ನಿಂದನಾ ಅರ್ಜಿ ವಿಚಾರಣೆ ನಡೆಸಿರುವ ನ್ಯಾಯಮೂರ್ತಿ ಬಿ.ಎಸ್‌.ಪಾಟೀಲ (2018ರ ಮೇ 31ರಂದು ನಿವೃತ್ತಿ ಹೊಂದಿದ್ದಾರೆ) ಹಾಗೂ ನ್ಯಾಯಮೂರ್ತಿ ಆರ್.ಎಸ್.ಚೌಹಾಣ್ ಅವರಿದ್ದ ವಿಭಾಗೀಯ ನ್ಯಾಯಪೀಠ ಕಳೆದ ತಿಂಗಳ 30ರಂದು ವಿಚಾರಣೆ ನಡೆಸಿತ್ತು.

ಅಂದು ವಿಚಾರಣೆ ನಡೆಸಿ ಆದೇಶ ನೀಡಿರುವ ನ್ಯಾಯಪೀಠ, ‘ಮೂರು ದಿನದೊಳಗೆ ಅರ್ಜಿದಾರರ ಹೆಸರಿಗೆ ಪಹಣಿಯಲ್ಲಿ ಹಿಡುವಳಿ ಜಮೀನಿನ ವಿಸ್ತೀರ್ಣವನ್ನು ಗುರುತಿಸಿ ದಾಖಲೆ ನೀಡಿ. ಇಲ್ಲವಾದಲ್ಲಿ ಪ್ರತಿವಾದಿಗಳ ವಿರುದ್ಧ ನ್ಯಾಯಾಂಗ ನಿಂದನೆ ಪ್ರಕ್ರಿಯೆ ಆರಂಭಿಸಬೇಕಾಗುತ್ತದೆ’ ಎಂದು ಎಚ್ಚರಿಸಿರುವುದು ದುರದೃಷ್ಟಕರ’ ಎಂದು ಧನಂಜಯ ಹೇಳಿದ್ದಾರೆ.

ಈ ಅರ್ಜಿಯ ವಿಚಾರಣೆ ಪುನಃ ಇದೇ 5ರಂದು ನ್ಯಾಯಮೂರ್ತಿ ಆರ್.ಎಸ್.ಚೌಹಾಣ್ ಹಾಗೂ ಎಚ್‌.ಟಿ.ನರೇಂದ್ರ ಪ್ರಸಾದ್‌ ಅವರನ್ನು ಒಳಗೊಂಡ ವಿಭಾಗೀಯ ನ್ಯಾಯಪೀಠದ ಮುಂದೆ ವಿಚಾರಣೆಗೆ ಬರಲಿದೆ.

ಅಂದು, ಕಂದಾಯ ಇಲಾಖೆ ಪ್ರಧಾನ ಕಾರ್ಯದರ್ಶಿ, ಬೆಂಗಳೂರು ನಗರ ಜಿಲ್ಲೆ ವಿಶೇಷ ಜಿಲ್ಲಾಧಿಕಾರಿ ಮತ್ತು ಬೆಂಗಳೂರು ಪೂರ್ವ ತಹಶೀಲ್ದಾರ್‌ ಕೋರ್ಟ್‌ನಲ್ಲಿ ಖುದ್ದು ಹಾಜರಿರಬೇಕು ಎಂದೂ ಆದೇಶಿಸಲಾಗಿದೆ.

**

ತಕ್ಷಣಕ್ಕೆ ಬದಲಾಯಿಸಲು ಸಾಧ್ಯವಿಲ್ಲ...

‘ಸರ್ವೇ ನಂ 54ರ ಪ್ರದೇಶವು 1859ರ ಸರ್ಕಾರಿ ದಾಖಲೆಗಳಲ್ಲಿ ಹಾಗೂ ಬಿ.ಖರಾಬ್‌ ಜಮೀನು ಎಂದೇ ಗುರುತಿಸಲಾಗಿದೆ. ಹಾಗಾಗಿ ಬಿ.ಖರಾಬ್ ಜಮೀನನ್ನು ಈಗ, ಹಿಡುವಳಿ ಜಮೀನು ಎಂದು ಪರಿವರ್ತಿಸಲು ಸರ್ಕಾರದಿಂದ ಪ್ರತ್ಯೇಕ ಆದೇಶದ ಅಗತ್ಯವಿದೆ’ ಎಂಬುದು ಅಧಿಕಾರಿಗಳ ಪ್ರತಿಪಾದನೆ.

ಈ ಕುರಿತಂತೆ ಕಂದಾಯ ಇಲಾಖೆ ಪರವಾಗಿ ಕೋರ್ಟ್‌ಗೆ ಸಲ್ಲಿಸಲಾಗಿರುವ ಪ್ರಮಾಣ ಪತ್ರದಲ್ಲಿ, ‘ಕಂಪ್ಯೂಟರ್‌ನಲ್ಲಿ ರೂಪುಗೊಂಡಿರುವ ಚಾಲ್ತಿ ವ್ಯವಸ್ಥೆ

ಯನ್ನು ತಕ್ಷಣ ಅಥವಾ ಹೇಗೆ ಬೇಕೊ ಹಾಗೆ ಬದಲಾಯಿಸಲು ಸಾಧ್ಯವಿಲ್ಲ. ಭೂಮಿ ತಂತ್ರಾಂಶವು ಬಿ.ಖರಾಬ್‌ ಜಮೀನನ್ನು ಹಿಡುವಳಿ ಭೂಮಿ ಎಂದು ಪರಿವರ್ತಿಸಿಕೊಳ್ಳುವುದಿಲ್ಲ. ಇದಕ್ಕೆ ಸಾಕಷ್ಟು ಸಮಯ ಹಿಡಿಯುತ್ತದೆ’ ಎಂದು ತಿಳಿಸಲಾಗಿದೆ.

**

‘ಹೈಕೋರ್ಟ್‌ ಆದೇಶ ಕಳವಳಕಾರಿ’

‘ತಂತ್ರಾಂಶದಲ್ಲಿ ಯಾವುದೇ ಒಂದು ಜಮೀನನ್ನು ಒಂದು ಬಾರಿ ಸಾರ್ವಜನಿಕ ಆಸ್ತಿ ಎಂದು ನಮೂದು ಮಾಡಿದ ಮೇಲೆ ಅದನ್ನು ಬದಲಾಯಿಸುವುದು ಎಷ್ಟು ಸರಿ’ ಎಂದು ಧನಂಜಯ ಪ್ರಶ್ನಿಸುತ್ತಾರೆ.

ಭ್ರಷ್ಟಾಚಾರ ತಡೆಗಟ್ಟುವ ನಿಟ್ಟಿನಲ್ಲಿಯೇ ರೂಪುಗೊಂಡಿರುವ ತಂತ್ರಾಂಶವಿದು. ಇದನ್ನೇ ಬದಿಗೊತ್ತಿ ಕೈಯಲ್ಲಿ ಬರೆದುಕೊಡಿ ಎಂದು ಹೇಳಿದರೆ ಅದು ಭ್ರಷ್ಟಾಚಾರವನ್ನು ಪುಸಲಾಯಿಸಿದಂತಲ್ಲವೇ. ಈ ದಿಸೆಯಲ್ಲಿ ಹೈಕೋರ್ಟ್‌ ಆದೇಶ ನಿಜಕ್ಕೂ ಕಳವಳಕಾರಿ’ ಎಂದು ಅವರು ಹೇಳುತ್ತಾರೆ.

**

ಮುಂದೊಂದು ದಿನ ಖಾಸಗಿಯವರು ವಿಧಾನಸೌಧ, ಪಾರ್ಲಿಮೆಂಟ್‌, ಸುಪ್ರೀಂ ಕೋರ್ಟ್‌ ಕಟ್ಟಡಗಳನ್ನೂ ನಮ್ಮ ಹೆಸರಿಗೆ ಬದಲಾಯಿಸಿಕೊಡಿ ಎಂದು ಕೋರ್ಟ್‌ ಮೆಟ್ಟಿಲೇರಿದರೆ ಆಶ್ಚರ್ಯವಿಲ್ಲ...! 

–ಕೆ.ವಿ.ಧನಂಜಯ, ಸುಪ್ರೀಂ ಕೋರ್ಟ್‌ ವಕೀಲ

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 0

    Angry