4

ಅರೆನಗ್ನ ನೃತ್ಯ; ಬಾರ್‌ಗೆ ಬೀಗ

Published:
Updated:

ಬೆಂಗಳೂರು: ಪರಿಚಾರಕಿಯರಿಗೆ ಅರೆ ಬಟ್ಟೆ ತೊಡಿಸಿ ನೃತ್ಯ ಮಾಡಿಸುವ ಮೂಲಕ ಪರವಾನಗಿ ನಿಯಮ ಉಲ್ಲಂಘಿಸಿದ ಆರೋಪದಡಿ ರೆಸಿಡೆನ್ಸಿ ರಸ್ತೆಯ ‘ಟೈಮ್ಸ್ ಬಾರ್ ಅಂಡ್ ರೆಸ್ಟೋರಂಟ್’ ವ್ಯವಸ್ಥಾಪಕನನ್ನು ಬಂಧಿಸಿರುವ ಅಶೋಕನಗರ ಪೊಲೀಸರು, ಬಾರ್‌ಗೆ ಬೀಗವನ್ನೂ ಜಡಿದಿದ್ದಾರೆ.

‘ಬಾರ್‌ನಲ್ಲಿ ಪರಿಚಾರಕಿಯರು ಅಶ್ಲೀಲ ನೃತ್ಯ ಪ್ರದರ್ಶಿಸುತ್ತಿರುವ ಬಗ್ಗೆ ಸೋಮವಾರ ಬೆಳಿಗ್ಗೆ 10.30ರ ಸುಮಾರಿಗೆ ಠಾಣೆಗೆ ಮಾಹಿತಿ ಬಂತು. ಕೂಡಲೇ ಮಫ್ತಿಯಲ್ಲಿ ಸ್ಥಳಕ್ಕೆ ತೆರಳಿದ ಪಿಎಸ್ಐ ರಹೀಮ್ ನೇತೃತ್ವದ ತಂಡ, ಅಲ್ಲಿ ನಡೆಯುತ್ತಿದ್ದ ಕಾನೂನುಬಾಹಿರ ಚಟುವಟಿಕೆಗಳನ್ನು ಮೊಬೈಲ್ ಹಾಗೂ ಹ್ಯಾಂಡಿಕ್ಯಾಮ್‌ಗಳಲ್ಲಿ ಸೆರೆ ಹಿಡಿಯಿತು’ ಎಂದು ಅಧಿಕಾರಿಯೊಬ್ಬರು ‘ಪ್ರಜಾವಾಣಿ’ಗೆ ತಿಳಿಸಿದರು.

‘ಸಿ.ಸಿ ಟಿ.ವಿ ಕ್ಯಾಮೆರಾಗಳ ಡಿವಿಆರ್ ಪರಿಶೀಲಿಸಿದಾಗ, ಶನಿವಾರ ರಾತ್ರಿ ಸಹ 25 ರಿಂದ 30 ಪರಿಚಾರಕಿಯರು ಅರೆನಗ್ನರಾಗಿ ನೃತ್ಯ ಮಾಡಿರುವುದು ಗೊತ್ತಾಯಿತು. ಆ ದಿನ ರಾತ್ರಿ 12 ಗಂಟೆಯಿಂದ ಬೆಳಗಿನ ಜಾವ 3.30ರವರೆಗೂ ಇದೇ ರೀತಿ ವಹಿವಾಟು ನಡೆದಿತ್ತು. ಕೆಲ ಗ್ರಾಹಕರು ನರ್ತಕಿಯರ ಮೇಲೆ ನೋಟುಗಳನ್ನೂ ಎಸೆಯುತ್ತಿದ್ದರು’ ಎಂದು ಹೇಳಿದರು.

‘ಪರವಾನಗಿ ನಿಯಮ ಉಲ್ಲಂಘಿಸಿದ ಬಾರ್ ಮಾಲೀಕರು ಹಾಗೂ ಸಿಬ್ಬಂದಿ ವಿರುದ್ಧ ಕರ್ನಾಟಕ ಪೊಲೀಸ್ ಕಾಯ್ದೆ ಹಾಗೂ ಸಾರ್ವಜನಿಕ ಸ್ಥಳಗಳಲ್ಲಿ ಅಶ್ಲೀಲ ಚಟುವಟಿಕೆ ನಡೆಸಿದ (ಐಪಿಸಿ 294) ಆರೋಪದಡಿ ಎಫ್‌ಐಆರ್ ದಾಖಲಿಸಿದ್ದೇವೆ. ವ್ಯವಸ್ಥಾಪಕ ಮುರಳಿಯನ್ನು ಬಂಧಿಸಿ, ಬಾರ್ ವಹಿವಾಟು ಸ್ಥಗಿತಗೊಳಿಸಿದ್ದೇವೆ’ ಎಂದು ಅಧಿಕಾರಿಗಳು ಮಾಹಿತಿ ನೀಡಿದರು.

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 0

    Angry