7
‘ರಾಮ, ಕೃಷ್ಣ, ಗಣಪತಿ ಇವರಾರೂ ಬ್ರಾಹ್ಮಣರಲ್ಲ’

ಹಿಂದುತ್ವ ಜಾತಿ ಗುರುತಿಸುವುದಿಲ್ಲ:ಅನಂತಕುಮಾರ್ ಹೆಗಡೆ

Published:
Updated:
ಹಿಂದುತ್ವ ಜಾತಿ ಗುರುತಿಸುವುದಿಲ್ಲ:ಅನಂತಕುಮಾರ್ ಹೆಗಡೆ

ಬೆಂಗಳೂರು: ‘ರಾಮ, ಕೃಷ್ಣ, ಗಣಪತಿ, ಸುಬ್ರಹ್ಮಣ್ಯ, ವ್ಯಾಸ, ವಾಲ್ಮೀಕಿ ಇವರಾರೂ ಬ್ರಾಹ್ಮಣರಲ್ಲ. ಜಾತಿಯಿಂದ ಗೌರವ ಕೊಡುವುದು ಹಿಂದುತ್ವ

ವಾದಿಗಳ ಸ್ವಭಾವವಲ್ಲ’ ಎಂದು ಕೇಂದ್ರ ಸಚಿವ ಅನಂತಕುಮಾರ್ ಹೆಗಡೆ ಅಭಿಪ್ರಾಯಪಟ್ಟರು.

ನಗರದಲ್ಲಿ ‘ಸಮೃದ್ಧ ಸಾಹಿತ್ಯ’ ಆಯೋಜಿಸಿದ್ದ ವಿನಾಯಕ ದಾಮೋದರ ಸಾವರ್ಕರ್‌ ಅವರ ‘ಹಿಂದುತ್ವ’ ಅನುವಾದಿತ ಕೃತಿ ಬಿಡುಗಡೆ ಮಾಡಿ ಅವರು ಮಾತನಾಡಿದರು.

‘ಶ್ರೇಷ್ಠ ವಿಚಾರಗಳನ್ನು ಯಾರೇ ಹೇಳಿದರೂ ಹಿಂದೂಗಳು ನಾವು ಒಪ್ಪಿಕೊಂಡಿದ್ದೇವೆ. ಸತ್ಯವನ್ನು ಒಪ್ಪಿಕೊಳ್ಳುವ ಸ್ವಭಾವ ಹಿಂದುತ್ವ. ಇದೊಂದು ಆಚರಣೆ

ಯಲ್ಲ, ಸಂಪ್ರದಾಯವಲ್ಲ. ಆದರೆ, ಹಿಂದುತ್ವವನ್ನು ಅರ್ಥ ಮಾಡಿಸುವ ಸನ್ನಿವೇಶ ಈ ದೇಶದಲ್ಲಿಬರಬಾರದು’ ಎಂದು ಅವರು ಹೇಳಿದರು.

‘ನಮ್ಮ ಮೂರ್ಖ ಬುದ್ಧಿಜೀವಿಗಳಿಗೆ ಇದು ಅರ್ಥವಾಗುವುದಿಲ್ಲ. ಮನುಸ್ಮೃತಿಯನ್ನು ಮೊಟ್ಟ ಮೊದಲ ಸಂವಿಧಾನ ಎನ್ನುವುದನ್ನು ಅವರು ಒಪ್ಪಿಕೊಳ್ಳುವುದೇ ಇಲ್ಲ. ವಿದೇಶಿ ಬಂಡವಾಳಕ್ಕೆ ಮಾರಿಕೊಂಡಿರುವ ಬುದ್ಧಿಜೀವಿಗಳು ಹಿಂದುತ್ವವನ್ನು ಕುಗ್ಗಿಸುವ ಪ್ರಯತ್ನ ಮಾಡುತ್ತಿದ್ದಾರೆ. ಅದನ್ನು ನಾವು ಖಂಡಿಸಬೇಕಿದೆ’ ಎಂದರು.

‘ಮುಸಲ್ಮಾನರು, ಕೈಸ್ತರು ತಮ್ಮ ಧರ್ಮಗಳನ್ನು ಹೇಳಿಕೊಂಡಾಗ ಖುಷಿಯಾಗುತ್ತದೆ. ಯಾಕೆಂದರೆ, ಅವರಿಗೆ ಅವರ ರಕ್ತದ ಪರಿಚಯವಿದೆ. ಆದರೆ, ನಮಗೆ ಮಾತ್ರ ನಮ್ಮ ಅಪ್ಪನ ಪರಿಚಯವಿಲ್ಲ ಏಕೆಂದರೆ ನಾವು ಜಾತ್ಯತೀತರು. ನನಗೇನಾದರೂ ಅಪ್ಪನ ಪರಿಚಯಇದೆ ಎಂದರೆ ನಾವು ದೇಶದ್ರೋಹಿಗಳು, ರಾಷ್ಟ್ರದೋಹಿಗಳು. ಹೀಗೆ ಬುದ್ಧಿಜೀವಿಗಳು ಮಾನದಂಡವನ್ನು ನಿರ್ಧರಿಸಿಬಿಟ್ಟಿದ್ದಾರೆ’ ಎಂದು ಟೀಕಿಸಿದರು.

ಚುನಾವಣೆಯ ಕಾಲ್ಚೆಂಡಲ್ಲ: ‘ಹಿಂದುತ್ವ ಎನ್ನುವುದು ಯಾವುದೇ ಕಾರಣಕ್ಕೂ ರಾಜಕಾರಣದ ದಾಳವಲ್ಲ. ಇದೊಂದು ಚುನಾವಣೆಯ ತಂತ್ರದ ವಿಷಯವಲ್ಲ. ದೇವಸ್ಥಾನಕ್ಕೆ ಹೋಗಿ ಕಾಯಿ ಒಡೆಯುವುದು, ಹಣೆಗೆ ಕುಂಕುಮ ಇಡುವುದೇ ಹಿಂದುತ್ವ ಎನಿಸಿಕೊಂಡಿದ್ದರೆ ನಾವು ಸಣ್ಣವರಾಗುತ್ತಿದ್ದೆವು’ ಎಂದು ಹೇಳಿದರು.

‘ಹಿಂದುತ್ವವನ್ನು ಹಲವರು ನಾನಾ ರೀತಿಯಲ್ಲಿ ವ್ಯಾಖ್ಯಾನಿಸಿದ್ದಾರೆ. ಅದೇನೆ ಇದ್ದರೂ ಹಿಂದುತ್ವ ಎನ್ನುವುದು ಜಗತ್ತಿನ ಅದ್ಭುತ ಜೀವನ ಶೈಲಿ ಎನ್ನುವುದೇ ಸತ್ಯ’ ಎಂದೂ ಹೇಳಿದರು.

ಅಂಕಣಕಾರ ರೋಹಿತ್‌ ಚರ್ಕತೀರ್ಥ, ‘ಸ್ವಾತಂತ್ರ್ಯದ ನಂತರ ಅಯೋಗ್ಯರಿಗೆ ದೇಶವನ್ನು ಕೊಡುವ ಬದಲು ಸಾವರ್ಕರ್‌ ಅವರ ಚಿಂತನೆ ಇರುವವರಿಗೆ ದೇಶ ನೀಡಿದ್ದರೆ, ನಾವು ಬಹಳ ಹಿಂದೆಯೇ ಉದ್ಧಾರ ಆಗುತ್ತಿದ್ದೆವು. ನಮ್ಮನ್ನು, ನಮ್ಮ ದೇಶ, ಧರ್ಮವನ್ನು ಉಳಿಸಿಕೊಳ್ಳುವುದಕ್ಕೆ ಹಿಂಸೆ ಖಂಡಿತ

ಬೇಕು. ಇದನ್ನೇ ಸಾವರ್ಕರ್‌ ಪ್ರತಿಪಾದಿಸಿದ್ದರು’ ಎಂದರು.

‘ಎಡಪಂಥೀಯ ಬುದ್ಧಿಜೀವಿಗಳು ಸಾವರ್ಕರ್‌ ಅವರನ್ನು ಮೂಲದಲ್ಲಿ ಓದಿಲ್ಲ. ಕೇವಲ ಅವರ ಬಗ್ಗೆ ಬೇರೆಯವರು ವ್ಯಾಖ್ಯಾನಿಸಿರುವುದನ್ನೇ ತಿಳಿದುಕೊಂಡು ಮಾತನಾಡುತ್ತಾರೆ. ಜಾತ್ಯತೀತ, ಸರ್ವಧರ್ಮ ಸಹಿಷ್ಣುತೆ ಎನ್ನುವುದೇ ಹುಸಿವಾದ. ಅನೇಕ ವರ್ಷಗಳಿಂದ ಪಠ್ಯಗಳ ಮೂಲಕ ನಮಗೆ ತುರುಕುವ ಕೆಲಸ ಮಾಡಿದ್ದಾರೆ’ ಎಂದು ದೂರಿದರು.

ಕೃತಿಯನ್ನು ಲೇಖಕ ಜಿ.ಬಿ. ಹರೀಶ್‌ ಅನುವಾದ ಮಾಡಿದ್ದಾರೆ. ಪುಸ್ತಕದ ಬೆಲೆ ₹ 110. ಆನ್‌ಲೈನ್‌ನಲ್ಲಿ ಈಗಾಗಲೇ 1,500 ಪುಸ್ತಕಗಳು ಮಾರಾಟವಾಗಿದ್ದು, ಬಿಡುಗಡೆಗೂ ಮುನ್ನವೇ ಎರಡನೇ ಮುದ್ರಣ ಕಂಡಿದೆ.

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 1

    Angry