ಬೆಂಗಳೂರು: ಬೆಂಗಳೂರಿನ ಜುವೆಲ್ಲರ್ಸ್ ಅಸೋಸಿಯೇಷನ್ (ಜೆಎಬಿ) ವತಿಯಿಂದ ರಾಜ್ಯದಲ್ಲಿ 3ನೇ ಆವೃತ್ತಿಯ 45 ದಿನಗಳ ರಾಜ್ಯ ಮಟ್ಟದ ‘ಮೆಗಾ ಶಾಪಿಂಗ್ ಫೆಸ್ಟಿವಲ್’ ಅಕ್ಟೋಬರ್ 3ರಿಂದ ನವೆಂಬರ್ 16ರ ವರೆಗೆ ಹಮ್ಮಿಕೊಳ್ಳಲಾಗಿದೆ.
ಈ ‘ಫೆಸ್ಟಿವಲ್’ನಲ್ಲಿ ಚಿನ್ನ ಖರೀದಿಸಿದ ಅದೃಷ್ಟವಂತರಿಗೆ ಒಂದು ಕೆ.ಜಿ. ಚಿನ್ನ ಗೆಲ್ಲಲು ಅವಕಾಶವಿದೆ ಎಂದು ನಟಿ ರಚಿತಾರಾಮ್, ವಿಧಾನ ಪರಿಷತ್ ಸದಸ್ಯ ಟಿ.ಎ. ಶರವಣ, ಜೆಎಬಿ ಅಧ್ಯಕ್ಷ ಚೇತನ್ ಕುಮಾರ್ ಮೆಹ್ತಾ, ಫೆಸ್ಟಿವಲ್ ಅಧ್ಯಕ್ಷ ಸುರೇಶ್ ಕುಮಾರ್ ಘಾನ ಶುಕ್ರವಾರ ಸುದ್ದಿಗೋಷ್ಠಿಯಲ್ಲಿ ಮಾಹಿತಿ ನೀಡಿದರು.
ದುಬೈಯಲ್ಲಿ ಪ್ರತಿವರ್ಷ ಗೋಲ್ಡ್ ಫೆಸ್ಟಿವಲ್ ನಡೆಯುತ್ತಿದೆ. ಅದನ್ನು ಮೀರಿಸುವ ರೀತಿಯಲ್ಲಿ ಬೆಂಗಳೂರು ಗೋಲ್ಡ್ ಫೆಸ್ಟಿವಲ್ ನಡೆಯಲಿದೆ. ಆಭರಣ ಮಳಿಗೆಗಳಲ್ಲಿ ಖರೀದಿಸಿದರೆ ಕೂಪನ್ ನೀಡಲಾಗುತ್ತದೆ. ಲಕ್ಕಿ ಡ್ರಾ ಮೂಲಕ ವಿಜೇತರನ್ನು ಆಯ್ಕೆ ಮಾಡಲಾಗುತ್ತದೆ. ಪ್ರಥಮ ಬಹುಮಾನ 1 ಕೆ.ಜಿ. ಚಿನ್ನ ಮತ್ತು 2ನೇ ಬಹುಮಾನ 100ಕೆ.ಜಿ.ಬೆಳ್ಳಿ ಹಾಗೂ 3ನೇ ಬಹುಮಾನ ಹ್ಯುಂಡೈ ಐ-10 ಕಾರು ಸಿಗಲಿದೆ ಎಂದು ತಿಳಿಸಿದರು.
ನೋಂದಣಿ, ಕೂಪನ್ ಹಂಚಿಕೆ ಮತ್ತು ಡ್ರಾ ಪ್ರಕ್ರಿಯೆಯನ್ನು ಸಂಪೂರ್ಣವಾಗಿ ಡಿಜಿಟಲೀಕರಣ ಗೊಳಿಸಲಾಗಿದೆ. ಒಟ್ಟು ಚಿನ್ನದ ಬಹುಮಾನಗಳು 3.5 ಕೆ.ಜಿ., ಬೆಳ್ಳಿ ಬಹುಮಾನಗಳು 100 ಕೆ.ಜಿ. ಇರಲಿವೆ. ಬಹುಮಾನಗಳ ಮೌಲ್ಯ ₹ 3 ಕೋಟಿ ಇರಲಿದೆ ಎಂದು ಹೇಳಿದರು.
