ಸಗಟು ಕಸವನ್ನು ಆವರಣದಲ್ಲೇ ಸಂಸ್ಕರಿಸುವುದಕ್ಕೆ ಒಪ್ಪಿಗೆ: ಬಿಬಿಎಂಪಿ ಸುತ್ತೋಲೆ

100ಕ್ಕೂ ಹೆಚ್ಚು ಮನೆಗಳನ್ನು ಹೊಂದಿರುವ ಅಪಾರ್ಟ್‌ಮೆಂಟ್ ಸಮುಚ್ಚಯಗಳು, ನಿತ್ಯ 100 ಕೆ.ಜಿ.ಗೂ ಅಧಿಕ ಕಸ ಉತ್ಪಾದಿಸುವವರು, 5000 ಚ.ಮೀ.ಗೂ ಹೆಚ್ಚು ವಿಸ್ತೀರ್ಣದ ಮಾಲ್‌ಗಳು, ಪಂಚತಾರಾ ಹೋಟೆಲ್‌ಗಳು, ಐಟಿ– ಟೆಕ್ ಪಾರ್ಕ್‌ಗಳು, ಬಹು ರಾಷ್ಟ್ರೀಯ ಕಂಪನಿಗಳು, ಪ್ರವೇಶ ನಿಯಂತ್ರಿತ ಗೃಹಸಮುಚ್ಚಯ ಸಮುದಾಯಗಳು (ಗೇಟೆಡ್‌ ಕಮ್ಯುನಿಟಿ), ಕಲ್ಯಾಣ ಮಂಟಪಗಳು, ಸರ್ಕಾರಿ ಕಚೇರಿಗಳು ತಮ್ಮಲ್ಲಿ ಉತ್ಪತ್ತಿಯಾಗುವ ಕಸವನ್ನು ತಮ್ಮ ಆವರಣದಲ್ಲಿಯೇ ಸಂಸ್ಕರಿಸಿ ವಿಲೇವಾರಿ ಮಾಡಲು ಕ್ರಮವಹಿಸುವಂತೆ ಬಿಬಿಎಂಪಿ ಸೂಚಿಸಿದೆ.

ಮಾನ್ಯತೆ ಪಡೆದ ಸೇವಾದಾರರ ಮೂಲಕ ಕಟ್ಟಡದ ಆವರಣದಲ್ಲಿ ಲಭ್ಯ ಇರುವ ಸ್ಥಳವನ್ನು ಬಳಸಿಕೊಂಡು ಕಸವನ್ನು ಬಯೋಮೀಥನೈಜೇಷನ್‌ ಮಾಡಬಹುದು ಅಥವಾ ಸಂಸ್ಕರಿಸಿ ಸಾವಯವ ಗೊಬ್ಬರ ತಯಾರಿಸಬಹುದು. ನೈರ್ಮಲ್ಯ ತ್ಯಾಜ್ಯ ಸಂಗ್ರಹಿಸಿ, ಅದನ್ನು ಮಾಲಿನ್ಯ ನಿಯಂತ್ರಣ ಮಂಡಳಿಯಿಂದ ಮಾನ್ಯತೆ ಪಡೆದ ಸಂಸ್ಥೆಗೆ ನೀಡುವ ಮೂಲಕ ವಿಲೇವಾರಿ ಮಾಡಬಹುದು. ಒಣ ಕಸವನ್ನು ಪಾಲಿಕೆಯ ಒಣ ಕಸ ಸಂಗ್ರಹ ಕೇಂದ್ರಗಳಿಗೆ ಅಥವಾ ನೋಂದಾಯಿತ ಸಗಟು ಕಸ ಸೇವಾದಾರರಿಗೆ ನೀಡಬಹುದು ಎಂದು ಬಿಬಿಎಂಪಿ ಹೇಳಿದೆ.