ಬಿಬಿಎಂಪಿ ವಲಯ ಆಯುಕ್ತರ ಕಚೇರಿಯಲ್ಲಿ ಅವ್ಯವಸ್ಥೆ; ಕರ್ತವ್ಯ ನಿರ್ವಹಣೆಯೇ ಕಷ್ಟ!

ಸಂದರ್ಶಕರು ಕುಳಿತುಕೊಳ್ಳುವ ಆಸನಗಳು ಮುರಿದಿವೆ. ಶೌಚಾಲಯವೂ ಅವ್ಯವಸ್ಥೆಯಾಗಿದೆ. ಕಿಟಕಿ ಗಾಜುಗಳು ಒಡೆದಿರುವುದರಿಂದ ಮಳೆ ಬಂದಾಗ ಇರಿಚಲು(ಹನಿಗಳು) ಕೊಠಡಿ ಒಳಕ್ಕೆ ಬರುತ್ತವೆ. ಜೋರಾಗಿ ಗಾಳಿ ಬೀಸಿದರೆ ಟೇಬಲ್‌ ಮೇಲಿದ್ದ ಹಾಳೆಗಳು ಹಾರಿ ಹೋಗುತ್ತವೆ. ಕೆಲಸ ನಿರ್ವಹಿಸುವುದೂ ಕಷ್ಟ. ಎಲೆಕ್ಟ್ರಾನಿಕ್ಸ್ ಉಪಕರಣಗಳು ಮತ್ತು ಗಣಕಯಂತ್ರಗಳ ಮೇಲೆ ನೀರು ಬಿದ್ದು ಹಾಳಾಗುತ್ತವೆ. ಕೊಠಡಿಯೊಳಗೆ ನೀರು ತುಂಬಿಕೊಂಡರೆ, ಅದನ್ನು ಹೊರ ಹಾಕುವುದು ಕಷ್ಟದ ಕೆಲಸ ಎಂದು ಕಚೇರಿ ಸಿಬ್ಬಂದಿ ಬೇಸರ ವ್ಯಕ್ತಪಡಿಸುತ್ತಾರೆ.

ಒಡೆದಿರುವ ಕಿಟಕಿಗಳಿಗೆ ಪ್ಲಾಸ್ಟಿಕ್ ಚೀಲ, ರಟ್ಟುಗಳನ್ನು ಇಟ್ಟು, ಮಳೆ ನೀರು ಬರದಂತೆ ಸಿಬ್ಬಂದಿ ತಡೆಯುತ್ತಿದ್ದಾರೆ. ಕಿಟಕಿಗಳನ್ನು ಮುಚ್ಚದಿದ್ದರೆ ಫೈಲ್‌ಗಳು, ಗಣಕಯಂತ್ರಗಳು ಮಳೆ ನೀರಿನಲ್ಲಿ ತೋಯ್ದು ಹಾಳಾಗುತ್ತವೆ ಎಂಬುದು ಅವರ ಆತಂಕ. ‌

ವಲಯ ಆಯುಕ್ತರ ಕಚೇರಿಯಲ್ಲಿ ಕಂದಾಯ, ನಗರ ಯೋಜನೆ, ಕಲ್ಯಾಣ ಶಾಖೆ, ಆರೋಗ್ಯ, ಮುಖ್ಯ ಎಂಜಿನಿಯರ್ ಕಚೇರಿಗಳಿವೆ. ಎಲ್ಲ ಕಿಟಕಿಗಳಿಗೆ ಚೀಲ ಕಟ್ಟಿಕೊಂಡು ಕೆಲಸ ನಿರ್ವಹಿಸುವ ಪರಿಸ್ಥಿತಿ ಬಂದಿದೆ ಎಂದು ಹೆಸರು ಹೇಳಲು ಇಚ್ಛಿಸದ ಅಧಿಕಾರಿಯೊಬ್ಬರು ಅಳಲು ತೋಡಿಕೊಂಡರು.