ಮಂಗಳವಾರ, ನವೆಂಬರ್ 12, 2019
19 °C
ಶೋಭಾ ಡೆವಲಪರ್ಸ್ ಮಾಲೀಕನ ವಿರುದ್ಧ ಎಫ್‌ಐಆರ್

ಕಟ್ಟಡ ಕಾರ್ಮಿಕ ಸಾವು: ಶೋಭಾ ಡೆವಲಪರ್ಸ್ ಮಾಲೀಕನ ವಿರುದ್ಧ ಎಫ್‌ಐಆರ್‌

Published:
Updated:

ಬೆಂಗಳೂರು: ಚರ್ಚ್‌ಸ್ಟ್ರೀಟ್‌ನಲ್ಲಿ ನಿರ್ಮಿಸಲಾಗುತ್ತಿರುವ ಶೋಭಾ ಡೆವಲಪರ್ಸ್ ಕಟ್ಟಡದಲ್ಲಿ 30 ಅಡಿ ಎತ್ತರದಿಂದ ಬಿದ್ದು ಕಾರ್ಮಿಕ ರಾಮ್‌ ಸಿಕಿಲ್ ಮಂಡಲ್ (29) ಎಂಬುವರು ಮೃತಪಟ್ಟಿದ್ದಾರೆ.

‘ಅ. 29ರಂದು ನಡೆದಿರುವ ಘಟನೆ ಸಂಬಂಧ ಕಟ್ಟಡದ ಎಲೆಕ್ಟ್ರಿಷಿಯನ್ ನಿಗಮ್ ನಂದನಾಯಕ್ ದೂರು ನೀಡಿದ್ದಾರೆ. ನಿರ್ಲಕ್ಷ್ಯ ಆರೋಪದಡಿ ಶೋಭಾ ಡೆವಲಪರ್ಸ್ ಮಾಲೀಕ, ಕಟ್ಟಡದ ಮ್ಯಾನೇಜರ್ ಅನಿಲ್ ಹಾಗೂ ಎಲೆಕ್ಟ್ರಿಷಿಯನ್ ವಿಭಾಗದ ಮುಖ್ಯಸ್ಥ ರಾಮ್ ಕುಮಾರ್ ತಂಗವೇಲು ವಿರು‌ದ್ಧ ಎಫ್‌ಐಆರ್‌ ದಾಖಲಿಸಿಕೊಳ್ಳಲಾಗಿದೆ’ ಎಂದು ಪೊಲೀಸರು ಹೇಳಿದರು. 

‘ಮೃತ ರಾಮ್, ಶೋಭಾ ಡೆವಲಪರ್ಸ್‌ನ ಎಲೆಕ್ಟ್ರಿಷಿಯನ್ ವಿಭಾಗದಲ್ಲಿ ಎರಡು ವರ್ಷಗಳಿಂದ ಸಹಾಯಕರಾಗಿ ಕೆಲಸ ಮಾಡುತ್ತಿದ್ದರು. ಚರ್ಚ್‌ಸ್ಟ್ರೀಟ್‌ನಲ್ಲಿ ನಿರ್ಮಿಸಲಾಗುತ್ತಿರುವ ಕಟ್ಟಡದಲ್ಲಿ ದೀಪಗಳನ್ನು ಅಳವಡಿಸುತ್ತಿದ್ದಾಗಲೇ ಈ ಅವಘಡ ಸಂಭವಿಸಿದೆ’ ಎಂದು ತಿಳಿಸಿದರು.

‘ಎಲೆಕ್ಟ್ರಿಷಿಯನ್ ನಿಗಮ್ ನಂದನಾಯಕ್ ಹಾಗೂ ಇತರರು ಕೆಳಗೆ ನಿಂತಿದ್ದರು. ಸಣ್ಣ ಗಾತ್ರದ ಕ್ರೇನ್‌ ಬಕೆಟ್‌ನಲ್ಲಿ ಮೇಲಕ್ಕೆ ಹೋಗಿದ್ದ ಕಾರ್ಮಿಕ ರಾಮ್, ದೀಪಗಳನ್ನು ಅಳವಡಿಸುತ್ತಿದ್ದರು. ಅದೇ ವೇಳೆ ಬಕೆಟ್‌ ಕತ್ತರಿಸಿತ್ತು. ಅದರ ಸಮೇತವೇ ರಾಮ್ ಬಿದ್ದಿದ್ದರು’ ಎಂದು ಪೊಲೀಸರು ಹೇಳಿದರು.

ಪ್ರತಿಕ್ರಿಯಿಸಿ (+)