ಭಾನುವಾರ, ನವೆಂಬರ್ 17, 2019
23 °C

ಕನ್ನಡಿಗ ವೈದ್ಯನಿಗೆ ಜಾಗತಿಕ ಗೌರವ

Published:
Updated:
Prajavani

ಬೆಂಗಳೂರು: ಕನ್ನಡಿಗ, ಕಾಸರಗೋಡಿನ ಇನ್‌ಸ್ಟಿಟ್ಯೂಟ್‌ ಆಫ್‌ ಡೆರ್ಮಟಾಲಜಿಯ (ಐಎಡಿ) ಮುಖ್ಯ ಚರ್ಮರೋಗ ತಜ್ಞ ಡಾ.ಎಸ್‌.ಆರ್‌. ನರಹರಿ ಅವರಿಗೆ ಲಂಡನ್ನಿನಲ್ಲಿ ನಡೆಯಲಿರುವ ವಿಲಿಯಮ್‌ ಓಸ್ಲರ್‌ ಶತಮಾನೋತ್ಸವ ಸ್ಮರಣೆ ಕಾರ್ಯಕ್ರಮದ ಉದ್ಘಾಟನಾ ಭಾಷಣ ಮಾಡುವ ಅವಕಾಶ ಒದಗಿಬಂದಿದೆ. ಇದೇ ಭಾನುವಾರ ಅವರು ಲಂಡನ್‌ಗೆ ತೆರಳಲಿದ್ದಾರೆ.

ಸಂಯೋಜಿತ ಔಷಧಿಗಳ ಪ್ರತಿಪಾದಕರಾಗಿದ್ದ ಓಸ್ಲರ್‌, ವೈದ್ಯಕೀಯ ವಿದ್ಯಾರ್ಥಿಗಳನ್ನು ಕೇವಲ ಬೋಧನಾ ಕೋಣೆಯಲ್ಲಿ ಕೂರಿಸದೆ ಮೊದಲ ಬಾರಿಗೆ ರೋಗಿಗಳ ಬಳಿಗೆ (ಬೆಡ್‌ಸೈಡ್‌) ಕರೆದೊಯ್ದು ಪ್ರಾಯೋಗಿಕ ತರಬೇತಿ ನೀಡುವ ಪದ್ಧತಿಯನ್ನು ಆರಂಭಿಸಿದವರು. ಅವರನ್ನು ಆಧುನಿಕ ಔಷಧ ವಿಜ್ಞಾನದ ಪಿತಾಮಹ ಎಂದೇ ಕರೆಯಲಾಗುತ್ತದೆ.

ಆನೆಕಾಲು ಕಾಯಿಲೆಗೆ ಸಂಯೋಜಿತ ಔಷಧಿಯನ್ನು ಯಶಸ್ವಿಯಾಗಿ ಸಂಶೋಧಿಸಿದ ಡಾ. ನರಹರಿ ಅವರ ಸಾಧನೆಯನ್ನು ಅರಿತ ಓಸ್ಲರ್‌ ಶತಮಾನೋತ್ಸವ ಸ್ಮರಣೆ ಕಾರ್ಯಕ್ರಮದ ಸಂಘಟಕರು, ಅವರನ್ನೇ ಉದ್ಘಾಟನಾ ಭಾಷಣಕ್ಕೆ ಆಹ್ವಾನಿಸಿ ಗೌರವಿಸಿದ್ದಾರೆ. ಬಿಲ್‌ ಗೇಟ್ಸ್‌ ಫೌಂಡೇಷನ್‌ ಸಹ ಡಾ. ನರಹರಿ ಅವರ ಸಾಧನೆಯನ್ನು ಗುರುತಿಸಿದ್ದು, ಜಗತ್ತಿನ ಬೇರೆ ಭಾಗಗಳಲ್ಲೂ ಆನೆಕಾಲು ರೋಗದ ಸಂಯೋಜಿತ ಔಷಧಿ ದೊರೆಯುವಂತಾಗಲು ಅಗತ್ಯ ಸಹಕಾರ ನೀಡುವುದಾಗಿ ಭರವಸೆ ನೀಡಿದೆ.

ಕೇಂದ್ರ ಆರೋಗ್ಯ ಸಚಿವ ಹರ್ಷವರ್ಧನ್‌ ಅವರು ಡ್ರಗ್‌ ಥೆರಪಿ ಯಶಸ್ಸಿನ ವಿಷಯವನ್ನು ಹಂಚಿಕೊಂಡು ಗುರುವಾರ ಮಾಡಿದ ಟ್ವೀಟ್‌ನಲ್ಲಿ ತಾವು ಡಾ. ನರಹರಿ ಅವರೊಟ್ಟಿಗೆ ಇರುವ ಚಿತ್ರವನ್ನು ಹಾಕಿಕೊಂಡಿದ್ದರು.

ಪ್ರತಿಕ್ರಿಯಿಸಿ (+)