ಇಲ್ಲಿ ಕುಡಿಯುವ ನೀರು, ವಿದ್ಯುತ್‌ ಕಣ್ಣಾಮುಚ್ಚಾಲೆ!

7
ಕಾವೇರಿ ನೀರಿನ ಕೊಳವೆ ಅಳವಡಿಕೆಯಿಂದ ಬೆನ್ನಿಗಾನಹಳ್ಳಿ ಪ್ರದೇಶದಲ್ಲಿ ಹೆಚ್ಚಿದ ಸಮಸ್ಯೆ

ಇಲ್ಲಿ ಕುಡಿಯುವ ನೀರು, ವಿದ್ಯುತ್‌ ಕಣ್ಣಾಮುಚ್ಚಾಲೆ!

Published:
Updated:
Deccan Herald

ಬೆಂಗಳೂರು: ‘ವಾರಕ್ಕೆ ನಾಲ್ಕೈದು ದಿನಗಳಿಂದ ಕುಡಿಯಲು ನೀರಿಲ್ಲ. ವಿದ್ಯುತ್‌ ಕಣ್ಣಾಮುಚ್ಚಾಲೆ ನಿಂತಿಲ್ಲ. ಮನೆಗಳ ಮುಂಭಾಗ ನೀರು ನಿಂತಿದ್ದರಿಂದ ಓಡಾಡಲು ಅವಕಾಶವಿಲ್ಲ...’–ಹೀಗೆ ತಮ್ಮ ಸಮಸ್ಯೆಗಳನ್ನು ಬಿಚ್ಚಿ
ಟ್ಟಿದ್ದು, ಕಸ್ತೂರಿನಗರದ ಬೆನ್ನಿಗಾನಹಳ್ಳಿ ವಾರ್ಡ್‌ನ ಸಾರ್ವಜನಿಕರು.

ಜಲಮಂಡಳಿ ಇಲಾಖೆಯು ರಿಂಗ್‌ ರೋಡ್‌ನಿಂದ ಒಎಂಬಿಆರ್‌ ಲೇಔಟ್‌ ವಾಟರ್‌ ಟ್ಯಾಂಕ್‌ವರೆಗೆ ನೀರು ಪೂರೈಕೆಯ ಕೊಳವೆ ಅಳವಡಿಸುತ್ತಿದೆ. ಕಸ್ತೂರಿನಗರದ ಮುಖ್ಯರಸ್ತೆಯ ಬೆನ್ನಿಗಾನಹಳ್ಳಿಯ 2ನೇ ಮತ್ತು 3ನೇ ಕ್ರಾಸ್‌ ಮಾರ್ಗ ಮಧ್ಯೆ ಕಾಮಗಾರಿ ಪ್ರಗತಿಯಲ್ಲಿದೆ. ಕಾಮಗಾರಿ ಆಮೆಗತಿಯಲ್ಲಿ ಸಾಗಿರುವುದರಿಂದ ನಿವಾಸಿಗಳು ಸಮಸ್ಯೆ ಎದುರಿಸುತ್ತಿದ್ದಾರೆ.

‘ಜಲಮಂಡಳಿ ಇಲಾಖೆಯಿಂದ ನೀರಿನ ಕೊಳವೆ ಅಳವಡಿಕೆ ಕಾಮಗಾರಿಯನ್ನು ಲಕ್ಷ್ಮೀ ಸಿವಿಲ್ ಎಂಜಿನಿಯರ್ ಕನ್‌ಸ್ಟ್ರಕ್ಷನ್‌ ಎಂಬ ಕಂಪನಿ ಗುತ್ತಿಗೆ ಪಡೆದಿದೆ. ದೊಡ್ಡ ದೊಡ್ಡ ಪೈಪ್‌ಗಳನ್ನು ಅಳವಡಿಸಲಾಗುತ್ತಿದ್ದು, ಈ ಕಾಮಗಾರಿಯ ಭರದಲ್ಲಿ ಮನೆಗಳಿಗೆ ಸಂಪರ್ಕ ಕಲ್ಪಿಸಿರುವ ಕುಡಿಯುವ ನೀರಿನ ಪೈಪ್‌ಲೈನ್‌ಗಳು ಒಡೆದು ಹೋಗಿವೆ. ವಿದ್ಯುತ್‌ ಕೇಬಲ್‌ಗಳು ಸಹ ತುಂಡರಿಸಿವೆ’ ಎನ್ನುತ್ತಾರೆ ನಿವಾಸಿಗಳು.

‘ವಾರ್ಡ್‌ನ ಎಡಬದಿ ಮತ್ತು ಬಲಬದಿಯ ಹಲವು ಮನೆಗಳಿಗೆ ಪ್ರಸ್ತುತ ವಾರಕ್ಕೊಮ್ಮೆ ನಾಲ್ಕರಿಂದ ಐದು ದಿನ ಮಾತ್ರ ನೀರು ಪೂರೈಸಲಾಗುತ್ತಿದೆ. ಇದರಿಂದ ಜನರು ತೊಂದರೆ ಅನುಭವಿಸುವಂತಾಗಿದೆ.‌ ಅದೇ ರೀತಿ ಪೈಪ್‌ ಒಡೆದು ಹೋದಾಗ ಕುಡಿ
ಯುವ ನೀರೆಲ್ಲಾ ರಸ್ತೆಗೆ ಹರಿದು ಪೋಲಾಗುತ್ತಿದೆ. ಮನೆಗಳ ಮುಂದೆ ನೀರು ನಿಂತು ಕೆಸರು ಗದ್ದೆಯಂತಾಗಿದೆ’ ಎಂದು ಸ್ಥಳೀಯ ನಿವಾಸಿ ಶಿವಶಂಕರ್ ಆಕ್ರೋಶ ವ್ಯಕ್ತಪಡಿಸುತ್ತಾರೆ.

‘ಮನೆಗಳಿಗೆ ವಿದ್ಯುತ್ ಕೇಬಲ್‌ಗಳ ಸಂಪರ್ಕ ಕಡಿತವಾಗಿದ್ದು, ಕಾಮಗಾರಿಯಿಂದ ವೈರ್‌ಗಳು ಕಿತ್ತು ಹೋಗುತ್ತಿವೆ. ಒಮ್ಮೆ ಸರಿಪಡಿಸುತ್ತಾರೆ.‌ ಇನ್ನೊಮ್ಮೆ ಅದರ ಗೋಜಿಗೆ ಹೋಗುತ್ತಿಲ್ಲ. ದಿನಕ್ಕೆ ಮೂರರಿಂದ ನಾಲ್ಕು ಗಂಟೆ ಮಾತ್ರ ವಿದ್ಯುತ್‌ ಬರುತ್ತಿದೆ. ಕಳ್ಳರು ಹೆಚ್ಚಾಗಿದ್ದು, ರಾತ್ರಿ ವೇಳೆ ವಿದ್ಯುತ್‌ ವ್ಯತ್ಯಯ ಉಂಟಾದರೆ ಹೇಗೆ’ ಎಂದು ಪ್ರಶ್ನಿಸುತ್ತಾರೆ.

‘ಕಾಮಗಾರಿಯಿಂದ ಅಂಗಡಿಯಲ್ಲಿ ದೂಳು ಹರಡಿಕೊಳ್ಳುತ್ತಿದೆ. ವ್ಯಾಪಾರ ಕೂಡ ಕಡಿಮೆ ಆಗಿದೆ. ಕೆಲಸ ನಿಧಾನಗತಿಯಲ್ಲಿ ಸಾಗುತ್ತಿದೆ’ ಎಂದು ನೋವು ತೋಡಿಕೊಳ್ಳುತ್ತಾರೆ ಬಡಾವಣೆಯಲ್ಲಿ ಅಂಗಡಿ ಹಾಕಿರುವ ವ್ಯಾಪಾರಿಯೊಬ್ಬರು.‌‌‌‌ ‘ನೀರಿನ ಕೊಳವೆ ಅಳವಡಿಕೆ ಕಾರ್ಯವನ್ನು 15 ದಿನಗಳ ಹಿಂದೆ ಜಲಮಂಡಳಿ ಆರಂಭಿಸಿತ್ತು. ಕಾಮಗಾರಿ ನಿಧಾನಗತಿಯಲ್ಲಿ ನಡೆದಿರುವುದರಿಂದ ತೊಂದರೆ ಅನುಭವಿಸುವಂತಾಗಿದೆ. ಜಲಮಂಡಳಿ ಹೆಚ್ಚು ಜಾಗ್ರತೆ ವಹಿಸಿ ಕೆಲಸ ಮಾಡಿಸಬೇಕು ಮತ್ತು ಶೀಘ್ರ ಪೂರ್ಣಗೊಳಿಸಬೇಕು’ ಎಂದು ಸ್ಥಳೀಯರು ಒತ್ತಾಯಿಸುತ್ತಾರೆ.

 

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !