ಸಾಮಾಜಿಕ ಜಾಲತಾಣಗಳ ಬಳಕೆ ಹೆಚ್ಚಾದಂತೆಲ್ಲಾ ಪ್ರೀತಿ, ಪ್ರೇಮದ ಅರ್ಥವೇ ಬದಲಾಗಿದೆ. ‘ಹಾಯ್‌’ ಎಂದು ಮೆಸೆಂಜರ್‌ನಲ್ಲಿ ಭೇಟಿಯಾಗುತ್ತಿರುವ ಪ್ರೇಮಿಗಳು, ‘ಬಾಯ್‌’ ಎಂದು ವಾಟ್ಸ್‌ ಆ್ಯಪ್‌ನಲ್ಲಿ ಬ್ರೇಕ್‌ಅಪ್ ಹೇಳುತ್ತಿದ್ದಾರೆ.
ಬೇರಾಗುವುದನ್ನು ಬೇಸರವೆಂದು ಭಾವಿಸದೇ ಮೋಜಿನ ಕೂಟಗಳನ್ನು ಏರ್ಪಡಿಸಿ ಸಂಭ್ರಮ ವ್ಯಕ್ತಪಡಿಸುತ್ತಿದ್ದಾರೆ. ಆದರೆ ಇದೇ ಖುಷಿಯಲ್ಲಿ, ಮಾಜಿ ಪ್ರೇಯಸಿ/ಪ್ರಿಯಕರನೊಂದಿಗೆ ಹಂಚಿಕೊಂಡ ಹಲವು ವೈಯಕ್ತಿಕ ಮಾಹಿತಿಗಳ ಬಗ್ಗೆ ಮರೆತು ತೊಂದರೆಗಳನ್ನು ತಂದುಕೊಳ್ಳುತ್ತಿದ್ದಾರೆ ಎಂದು ಸೈಬರ್ ತಜ್ಞರು ಎಚ್ಚರಿಸುತ್ತಿದ್ದಾರೆ. ಅವರು ನಡೆಸಿರುವ ಸಮೀಕ್ಷೆಯಲ್ಲಿ ಬಹಿರಂಗವಾದ ಬ್ರೇಕಪ್‌ ವಿಷಯಗಳ ಬಗೆಗಿನ ಕೆಲವು ಸಂಗತಿಗಳು.
* 26% ಪ್ರಿಯಕರ ಕಳುಹಿಸಿದ ಸಿಹಿಮುತ್ತುಗಳ ಸಂದೇಶಗಳು, ಪ್ರೇಯಸಿ ಕಳುಹಿಸಿದ ಚೆಂದದ ಫೋಟೊಗಳು, ಇಬ್ಬರ ನಡುವೆ ನಡೆದ ರೊಮ್ಯಾಂಟಿಕ್ ಇ–ಸಂಭಾಷಣೆಗಳನ್ನು ತಮ್ಮ ಮೊಬೈಲ್‌ಫೋನ್‌ಗಳಲ್ಲೇ ಸಂಗ್ರಹಿಸಿ ಇಟ್ಟುಕೊಳ್ಳುತ್ತಿರುವವರ ಪ್ರಮಾಣ. ಇವರಲ್ಲಿ ಶೇ 14ರಷ್ಟು ಮಂದಿ ಖಾಸಗಿ ಸಂದೇಶಗಳನ್ನು ಪ್ರೀತಿಯ ಗುರುತು ಎಂಬಂತೆ ಬಚ್ಚಿಟ್ಟುಕೊಳ್ಳುತ್ತಿದ್ದರೆ, ಶೇ 12ರಷ್ಟು ಮಂದಿ ಪ್ರೇಯಸಿಯ ಮಾದಕ ಫೋಟೊಗಳನ್ನು ಉಳಿಸಿಕೊಳ್ಳುತ್ತಿದ್ದಾರೆ. ಇನ್ನು ಶೇ 11ರಷ್ಟು ಮಂದಿ ವಿಡಿಯೊಗಳನ್ನೂ ಡಿಲಿಟ್ ಮಾಡುವುದೇ ಇಲ್ಲ.
* 78% ಪ್ರೀತಿಯ ಬಲೆಗೆ ಬಿದ್ದ ಕೂಡಲೇ ಸಂಗಾತಿಯೊಂದಿಗೆ ಸಾಮಾಜಿಕ ಜಾಲತಾಣ ಖಾತೆಗಳ ರಹಸ್ಯಪದಗಳನ್ನು (ಪಾಸ್‌ವರ್ಡ್‌), ಎಟಿಎಂ ಪಿನ್‌ಗಳನ್ನು ಹಂಚಿಕೊಳ್ಳುತ್ತಿರುವವರ ಪ್ರಮಾಣ. ಪ್ರೀತಿಯಲ್ಲಿ ಗುಟ್ಟು ಎಂಬುದು ಇರಬಾರದು ಎಂದು ಭಾವಿಸಿದವರು ಇವರು!
* 10% ಬೇರಾದ ನಂತರವೂ ಮಾಜಿ ಸಂಗಾತಿಯ ಕ್ರೆಡಿಟ್‌ ಕಾರ್ಡ್‌, ಡೆಬಿಟ್‌ ಕಾರ್ಡ್‌, ನೆಟ್ ಬ್ಯಾಂಕಿಂಗ್‌ ಮಾಹಿತಿಯನ್ನು ಬಳಸಿಕೊಂಡು ಷಾಪಿಂಗ್‌ ಮಾಡುತ್ತಿರುವವರ ಪ್ರಮಾಣ. ಬೇರ್ಪಟ್ಟ ರೋಷ ಮರೆಯಲು ಸಂಗಾತಿಯ ಕಿಸೆಗೆ ಬೆಂಕಿ ಇಟ್ಟು ತಮ್ಮ ಒಡಲಾಳದ ಉರಿಯನ್ನು ಈ ಮೂಲಕ ತಣಿಸಿಕೊಳ್ಳುತ್ತಾರೆ.
* 12% ಮಾಜಿ ಪ್ರೇಯಸಿ/ಪ್ರಿಯಕರನ ಬಗ್ಗೆ ತಮಗೆ ತಿಳಿದಿರುವ ಮಾಹಿತಿಯನ್ನು ಬಳಸಿಕೊಂಡು ಅವರ ಗೌರವಕ್ಕೆ ಧಕ್ಕೆ ತರಲು ಹವಣಿಸುತ್ತಿರುವವರ ಪ್ರಮಾಣ ಇದು. ಅವಕಾಶ ಸಿಕ್ಕಾಗಲೆಲ್ಲಾ ಮಾಜಿ ಗರ್ಲ್‌ಫ್ರೆಂಡ್‌/ ಬಾಯ್‌ಫ್ರೆಂಡ್ ಬಳಸುತ್ತಿರುವ ಮೊಬೈಲ್‌ಫೋನ್‌, ಟ್ಯಾಬ್, ಕಂಪ್ಯೂಟರ್‌ ಪರದೆ (ಸ್ಕ್ರೀನ್‌ ಸೇವರ್‌) ಮೇಲೆ ತಮ್ಮ ಪ್ರತಾಪ ತೋರಿಸುತ್ತಾ, ಅವನ್ನು ಹಾಳುಮಾಡುವವರೆಗೆ ವಿರಮಿಸಬಾರದೆಂದು ಪಣ ತೊಟ್ಟವರು ಇವರು.
* 55% ಪ್ರಿಯಕರನಿಗೆ ಗುಡ್‌ಬೈ ಹೇಳಿದ ನಂತರ, ಆತ ಕಳುಹಿಸಿದ ಸಂದೇಶಗಳನ್ನು ಕಸದಬುಟ್ಟಿಗೆ (ಡಿಲಿಟ್) ಎಸೆಯುತ್ತಿರುವ ಮಹಿಳೆಯರ ಪ್ರಮಾಣ. ಆದರೆ ಶೇ 49ರಷ್ಟು ಮಂದಿ ಪುರುಷರು ಮಾತ್ರ ಮಾಜಿ ಪ್ರೇಯಸಿಯ ಸಂದೇಶಗಳನ್ನು ಡಿಲೀಟ್‌ ಮಾಡುತ್ತಿದ್ದಾರೆ.
* 56% ಪ್ರಿಯಕರನಿಂದ ದೂರವಾದ ನಂತರ, ಮಾಜಿ ಪ್ರಿಯಕರನ ನೆನಪಾಗಿ ಉಳಿದಿರುವ ಫೋಟೊಗಳು, ವಿಡಿಯೊಗಳನ್ನು ಡಿಲಿಟ್ ಮಾಡುತ್ತಿರುವ ಮಹಿಳೆಯರ ಪ್ರಮಾಣ. ಇದರಲ್ಲೂ ಪುರುಷರು ಹಿಂದೆ ಬಿದ್ದಿದ್ದು, ಶೇ 48ರಷ್ಟು ಮಂದಿ ಮಾತ್ರ ಈ ಕೆಲಸ ಮಾಡುತ್ತಿದ್ದಾರೆ. ಉಳಿದವರು ಭದ್ರವಾಗಿ ಬಚ್ಚಿಡುತ್ತಾರೆ.
* 21% ಬೇರಾದ ನಂತರವೂ ಮಾಜಿ ಸಂಗಾತಿಯ ಸಾಮಾಜಿಕ ಜಾಲತಾಣಗಳ ಖಾತೆಗಳ ಪಾಸ್‌ವರ್ಡ್‌ಗಳನ್ನು ಬಳಸಿ ಅವರ ಖಾತೆಗಳನ್ನು ಜಾಲಾಡುತ್ತಿರುವವರ ಪ್ರಮಾಣ. ನನ್ನಿಂದ ಬೇರಾದ ನಂತರ ಮತ್ತೊಬ್ಬರೊಂದಿಗೆ ಸಂಪರ್ಕ ಸಾಧಿಸಿದ್ದಾರೇನೋ ಎಂಬ ಭಯ, ಅನುಮಾನ ಇದಕ್ಕೆ ಪ್ರೇರಣೆ ನೀಡುತ್ತಿದೆ.
* 12% ಬೇರ್ಪಟ್ಟ ನಂತರ ಮಾಜಿ ಪ್ರೇಯಸಿ/ಪ್ರಿಯಕರನ ವಿರುದ್ಧ ಸೇಡು ತೀರಿಸಿಕೊಳ್ಳಲು, ಅವರ ಖಾಸಗಿ ಸಮಾಚಾರವನ್ನು ಬಹಿರಂಗಪಡಿಸುತ್ತಿರುವವ ಪ್ರಮಾಣ. ಶೇ 17ರಷ್ಟು ಪ್ರಿಯಕರರು ಈ ಕೆಲಸ ಮಾಡುತ್ತಿದ್ದರೆ, ಶೇ 7ರಷ್ಟು ಪ್ರೇಯಸಿಯರು ಮಾಜಿ ಪ್ರಿಯಕರನ ಮಾನ ಹರಾಜು ಹಾಕುತ್ತಾರೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.