ಬೆಂಗಳೂರು: ಅದೃಷ್ಟದ ಕಲ್ಲು ಎಂದು ಜನರನ್ನು ನಂಬಿಸಿ ಮಾರಲು ಮುಂದಾಗಿದ್ದ ಮೂವರು ಆರೋಪಿಗಳನ್ನು ಬ್ಯಾಡರಹಳ್ಳಿ ಪೊಲೀಸರು ಬಂಧಿಸಿದ್ದಾರೆ.
ಶ್ರೀನಿವಾಸ್, ತಿರುಪತಪ್ಪ ಹಾಗೂ ಹರೀಶ್ ಬಂಧಿತರು. ವೃತ್ತಿಯಲ್ಲಿ ಆಟೊ ಚಾಲಕರಾಗಿರುವ ಇವರಿಗೆ ಲಾಕ್ಡೌನ್ನಿಂದ ಸಂಪಾದನೆ ಕಡಿಮೆಯಾಗಿತ್ತು.
ಈ ವೇಳೆ ಆರ್.ಟಿ.ನಗರದ ಮನ್ಸೂರ್ ಎಂಬಾತನ ಪರಿಚಯವಾಗಿ, ಈ ಕೆಲಸಕ್ಕೆ ಇಳಿದಿದ್ದರು. ಎಲ್ಲಿಂದಲೋ ತಂದಿದ್ದ ಹಸಿರು ಬಣ್ಣದ ಒಂದು ಕೆ.ಜಿ.ಕಲ್ಲನ್ನು ₹1 ಕೋಟಿಗೆ ಮಾರಿದರೆ, ಪಾಲು ನೀಡುವುದಾಗಿ ಆತ ಆಮಿಷವೊಡ್ಡಿದ್ದ ಎಂದು ತಿಳಿದು ಬಂದಿದೆ.
ಆರೋಪಿಗಳ ಪೈಕಿ ಹರೀಶ್ ಎಂಬಾತನಿಗೆ ಕೊರೊನಾ ಸೋಂಕು ಇರುವುದರಿಂದ ಕೋವಿಡ್ ಕೇಂದ್ರಕ್ಕೆ ದಾಖಲಿಸಿದ್ದಾರೆ. ಪ್ರಕರಣ ದಾಖಲಿಸಿಕೊಂಡಿರುವ ಪೊಲೀಸರು ಆರೋಪಿ ಮನ್ಸೂರ್ ಗಾಗಿ ಹುಡುಕಾಟ ನಡೆಸುತ್ತಿದ್ದಾರೆ.