‘ಪರಿಸರಸ್ನೇಹಿ ಗಣಪ’ನ ಆರಾಧನೆಗೆ ಹೆಚ್ಚಿದ ಒಲವು

7
* ಬಕೆಟ್‌ ನೀರಿನಲ್ಲಿ ಮೂರ್ತಿ ವಿಸರ್ಜನೆ ಮಾಡಿದ ಭಕ್ತರು * ಪಾಲಿಕೆ ಕೊಳಗಳಲ್ಲಿ ವಿಗ್ರಹ ವಿಸರ್ಜನೆ ಗಣನೀಯ ಇಳಿಕೆ

‘ಪರಿಸರಸ್ನೇಹಿ ಗಣಪ’ನ ಆರಾಧನೆಗೆ ಹೆಚ್ಚಿದ ಒಲವು

Published:
Updated:
Deccan Herald

ಬೆಂಗಳೂರು: ನಗರದಲ್ಲಿ ಈ ವರ್ಷ ಬಿಬಿಎಂಪಿ ವತಿಯಿಂದ ವ್ಯವಸ್ಥೆಗೊಳಿಸಲಾದ ತಾತ್ಕಾಲಿಕ ಕಲ್ಯಾಣಿ ಹಾಗೂ ಕೆರೆಗಳಲ್ಲಿ ಗಣೇಶ ಮೂರ್ತಿ ವಿಸರ್ಜನೆ ಮಾಡುವ ಪ್ರಮಾಣದಲ್ಲಿ ಗಣನೀಯ ಇಳಿಕೆ ಕಂಡು ಬಂದಿದೆ.

ಪೂಜಿಸಿದ ಮೂರ್ತಿಯನ್ನು ಮನೆಯಲ್ಲೇ ಬಕೆಟ್‌ನಲ್ಲಿ ನೀರು ತುಂಬಿಸಿ ವಿಸರ್ಜನೆ ಮಾಡುವ ಬಗ್ಗೆ ಜನರಲ್ಲಿ ಒಲವು ಹೆಚ್ಚಿರುವುದೇ ಇದಕ್ಕೆ ಕಾರಣ ಎನ್ನುತ್ತಾರೆ ಪಾಲಿಕೆಯ ಘನತ್ಯಾಜ್ಯ ನಿರ್ವಹಣೆ ವಿಭಾಗದ ಅಧಿಕಾರಿಗಳು.

ಈ ಬಾರಿಯ ಗಣೇಶ ಚತುರ್ಥಿ ಹಬ್ಬವನ್ನು ಪರಿಸರ ಸ್ನೇಹಿಯಾಗಿ ಆಚರಿಸುವ ಬಗ್ಗೆ ಸಾಕಷ್ಟು ಜಾಗೃತಿ ಮೂಡಿಸಲಾಗಿತ್ತು. ಅನೇಕ ಸ್ವಯಂ ಸೇವಾಸಂಸ್ಥೆಗಳು ಹಾಗೂ ಸ್ವಯಂಸೇವಕರು ಅಪಾರ್ಟ್‌ಮೆಂಟ್‌ ಸಮುಚ್ಚಯಗಳಿಗೆ, ಶಾಲಾ ಕಾಲೇಜುಗಳಿಗೆ ತೆರಳಿ ಪ್ಲಾಸ್ಟರ್‌ ಆಫ್‌ ಪ್ಯಾರಿಸ್‌ನಿಂದ (ಪಿಒಪಿ) ತಯಾರಿಸಿದ, ಹಾಗೂ ರಾಸಾಯನಿಕ ಬಣ್ಣಗಳನ್ನು ಬಳಸಿದ ಗಣೇಶ ಮೂರ್ತಿಗಳನ್ನು ಬಳಸದಂತೆ ತಿಳಿ ಹೇಳಿದ್ದರು.

‘ಮಣ್ಣಿನಿಂದ ತಯಾರಿಸಿದ ಪುಟ್ಟ ಮೂರ್ತಿಯನ್ನು ಪೂಜೆಗ ಬಳಸಿ ಅದನ್ನು ಮನೆಯಲ್ಲೇ ವಿಸರ್ಜನೆ ಮಾಡುವಂತೆಯೂ ಸಲಹೆ ನೀಡಿದ್ದರು. ಗಿಡಗಳ ಬೀಜಗಳನ್ನು ಹುದುಗಿಸಿರುವ ಮಣ್ಣಿನ ಮೂರ್ತಿಯನ್ನು ಬಳಸುವಂತೆಯೂ ಕಿವಿಮಾತು ಹೇಳಿದ್ದರು. ಮನೆಯ ಬಳಿ ಗಿಡ ಬೆಳೆಸಲು ಜಾಗ ಹೊಂದಿರುವ ಅನೇಕರು ಇಂಥ ಗಣೇಶನನ್ನೇ ಪೂಜೆಗೆ ಬಳಸಿದ್ದಾರೆ. ಹಾಗಾಗಿ ಈ ಬಾರಿ ಪಾಲಿಕೆ ವ್ಯವಸ್ಥೆ ಮಾಡಿದ ಕಲ್ಯಾಣಿ ಹಾಗೂ ತಾತ್ಕಾಲಿಕ ಟ್ಯಾಂಕರ್‌ಗಳಲ್ಲಿ ಮೂರ್ತಿಗಳ ವಿಸರ್ಜನೆ ಕಡಿಮೆ ಆಗಿದೆ’ ಎಂದು ಹೆಸರು ಬಹಿರಂಗಪಡಿಸಲು ಇಚ್ಛಿಸದ ಪಾಲಿಕೆಯ ಅಧಿಕಾರಿಯೊಬ್ಬರು ‘ಪ್ರಜಾವಾಣಿ’ಗೆ ತಿಳಿಸಿದರು.

ಮನೆಯಲ್ಲಿ ಪೂಜಿಸಿದ ಮಣ್ಣಿನ ಗಣೇಶ ಮೂರ್ತಿಯನ್ನು ಬಕೆಟ್‌ನಲ್ಲಿ ನೀರು ತುಂಬಿಸಿ ವಿಸರ್ಜನೆ ಮಾಡುವ ಪರಿಪಾಠ ವರ್ಷದಿಂದ ವರ್ಷಕ್ಕೆ ಹೆಚ್ಚುತ್ತಿದೆ ಎಂದರು ಕನಕಪುರ ರಸ್ತೆಯ ಶ್ರೀರಾಮ್‌ ಸುರಭಿ ಅಪಾರ್ಟ್‌ಮೆಂಟ್‌ ಸಮುಚ್ಚಯದ ನಿವಾಸಿ ಪಿ.ಶಾರದಾ ಕುಮಾರಿ.

‘ನಾಲ್ಕೈದು ವರ್ಷಗಳಿಂದ ಮಣ್ಣಿನ ಮೂರ್ತಿಯನ್ನು ಮಾತ್ರ ಪೂಜಿಸುತ್ತೇವೆ. ನಾವು ವಾಸವಿರುವ ಅಪಾರ್ಟ್‌ಮೆಂಟ್‌ ಸಮುಚ್ಚಯದಲ್ಲಿ ಸುಮಾರು 500 ಫ್ಲ್ಯಾಟ್‌ಗಳಿವೆ. ಪೂಜಿಸಿದ ಮಣ್ಣಿನ ಗಣೇಶ ಮೂರ್ತಿಯನ್ನು ಮನೆಯಲ್ಲೇ ವಿಸರ್ಜನೆ ಮಾಡುವ ಬಗ್ಗೆ ಈ ಬಾರಿ ಇಲ್ಲಿನ ನಿವಾಸಿಗಳಿಗೆ ತಿಳಿವಳಿಕೆ ಮೂಡಿಸಿದ್ದೆವು’ ಎಂದು ಶಾರದಾ ತಿಳಿಸಿದರು.

‘ಪೂಜೆಗೆ ನಾವು ಆಲಂಕಾರಿಕ ವಸ್ತುಗಳನ್ನು ಆದಷ್ಟು ಕಡಿಮೆ ಪ್ರಮಾಣದಲ್ಲಿ ಬಳಸುತ್ತೇವೆ. ಹೆಚ್ಚು ಹೂವನ್ನೂ ಉಪಯೋಗಿಸುವುದಿಲ್ಲ. ಅದರ ತ್ಯಾಜ್ಯವನ್ನು ಸಾವಯವ ಗೊಬ್ಬರ ತಯಾರಿಸಲು ಬಳಸುತ್ತೇವೆ. ನಮ್ಮ ಅಪಾರ್ಟ್‌ಮೆಂಟ್‌ ಸಮುಚ್ಚಯದ ಬಹುತೇಕ ನಿವಾಸಿಗಳು ಈ ವರ್ಷ ಇದೇ ವಿಧಾನ ಅನುಸರಿಸಿದ್ದಾರೆ’ ಎಂದರು.

‘ಗಣೇಶ ಚತುರ್ಥಿ ಸಂದರ್ಭದಲ್ಲಿ ನಾವು ನಾಲ್ಕೈದು ಮಂದಿ ಸೇರಿಕೊಂಡು ಅನೇಕ ಅಪಾರ್ಟ್‌ಮೆಂಟ್‌ಗಳಿಗೆ ತೆರಳಿ ಮಣ್ಣಿನ ಗಣೇಶ ಮೂರ್ತಿಯಯನ್ನೇ ಪೂಜಿಸುವಂತೆ ಪ್ರೇರೇಪಿಸುತ್ತಿದ್ದೇವೆ. ಮನೆಯಲ್ಲೇ ಸುಲಭವಾಗಿ ಮೂರ್ತಿಗಳನ್ನು ತಯಾರಿಸುವ ವಿಧಾನವನ್ನೂ ಕಲಿಸಿಕೊಡುತ್ತೇವೆ. ಈ ಬಾರಿ ಅನೇಕ ಅಪಾರ್ಟ್‌ಮೆಂಟ್‌ನವರು ನಮ್ಮನ್ನು ಆಹ್ವಾನಿಸಿದ್ದರು. ವರ್ಷದಿಂದ ವರ್ಷಕ್ಕೆ ನಮ್ಮ ಪ್ರಯತ್ನಕ್ಕೆ ಉತ್ತಮ ಫಲಿತಾಂಶ ಸಿಗುತ್ತಿದೆ’ ಎಂದು ಹೇಳಿದರು ಸಿ.ವಿ.ರಾಮನ್‌ನಗರದ ಗುರುಮೂರ್ತಾಚಾರ್‌.

‘ಪಿಒಪಿ ಗಣೇಶ ಬಳಸದಂತೆ ಈ ಬಾರಿ ನಾವು ಸಾಕಷ್ಟು ಪ್ರಚಾರ ಮಾಡಿದ್ದೇವೆ. ನಾವು ದಂಡನೆಯ ಅಸ್ತ್ರ ಬಳಸುವುದಕ್ಕಿಂತ ಹೆಚ್ಚಾಗಿ ಮನವೊಲಿಕೆ ತಂತ್ರಕ್ಕೆ ಮೊರೆ ಹೋಗಿದ್ದೆವು. ನಮ್ಮ ತಂತ್ರ ಫಲಿಸಿದೆ. ಕಳೆದ ವರ್ಷಕ್ಕೆ ಹೋಲಿಸಿದರೆ ಈ ಬಾರಿ ಪಿಒಪಿ ಮೂರ್ತಿಗಳ ಬಳಕೆಯೂ ಬಹಳಷ್ಟು ಕಡಿಮೆ ಆಗಿದೆ. ಇದು ಸಂಪೂರ್ಣ ನಿಲ್ಲಬೇಕೆಂಬುದು ನಮ್ಮ ಆಶಯ’ ಎಂದು ಪಾಲಿಕೆ ಆಯುಕ್ತ ಎನ್‌.ಮಂಜುನಾಥ ಪ್ರಸಾದ್‌ ತಿಳಿಸಿದರು.

ಮಣ್ಣಿನ ಗಣಪನಿಗೆ ಚಿಣ್ಣರ ರಾಯಭಾರ’

‘ರಾಸಾಯನಿಕ ಬಣ್ಣಗಳನ್ನು ಬಳಸಿ ತಯಾರಿಸಿದ ಗಣೇಶ ಮೂರ್ತಿಗಳ ಬಳಕೆಯಿಂದ ಆಗುವ ದುಷ್ಪರಿಣಾಮಗಳ ಬಗ್ಗೆ ನಾನು ಅನೇಕ ಶಾಲೆಗಳಿಗೆ ತೆರಳಿ ವಿದ್ಯಾರ್ಥಿಗಳಲ್ಲಿ ಜಾಗೃತಿ ಮೂಡಿಸಿದ್ದೆ. ಮನೆಯಲ್ಲಿ ಮಣ್ಣಿನ ಗಣೇಶನನ್ನು ಮಾತ್ರ ಪೂಜಿಸುವಂತೆ ಪೋಷಕರನ್ನು ಒತ್ತಾಯಿಸುವುದಾಗಿ ಅನೇಕ ವಿದ್ಯಾರ್ಥಿಗಳು ಭರವಸೆ ನೀಡಿದ್ದರು. ನನ್ನಂತಹ ಅನೇಕ ಸ್ವಯಂಸೇವಕರು ಇದೇ ರೀತಿ ತಿಳಿವಳಿಕೆ ಮೂಡಿಸಿದ್ದಾರೆ. ನಮ್ಮ ಪ್ರಯತ್ನದಿಂದ ಅನೇಕರು ಈ ಬಾರಿ ಮಣ್ಣಿನ ಗಣೇಶ ಮೂರ್ತಿಗಳನ್ನೇ ಬಳಸಿದ್ದಾರೆ’ ಎಂದು ಹೇಳಿದರು ಶ್ರೀನಿವಾಸನಗರದ ಬ್ಯಾಂಕ್‌ ಕಾಲೊನಿ ನಿವಾಸಿ ಬಿ.ಕೆ.ರಾಮಕುಮಾರ್‌.

‘ಯಾವುದೇ ಸಕಾರಾತ್ಮಕ ಬದಲಾವಣೆ ಬಗ್ಗೆ ಹಿರಿಯರನ್ನು ಮನವರಿಕೆ ಮಾಡುವುದು ಕಷ್ಟ. ಅದಕ್ಕಾಗಿ ನಾನು ವಿದ್ಯಾರ್ಥಿಗಳಲ್ಲಿ ಈ ಬಗ್ಗೆ ಅರಿವು ಮೂಡಿಸಲು ಪ್ರಯತ್ನಿಸಿದ್ದೇನೆ. ಅವರಲ್ಲಿ ಪರಿಸರ ಕಾಳಜಿ ಬೆಳೆದರೆ ಇಡೀ ಅವರ ಇಡೀ ಪೀಳಿಗೆ, ಹಿಂದಿನವರು ಮಾಡಿದ ತಪ್ಪನ್ನು ಮತ್ತೆ ಮಾಡುವುದಿಲ್ಲ’ ಎಂದರು.

ಬರಹ ಇಷ್ಟವಾಯಿತೆ?

  • 2

    Happy
  • 0

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !