ಕಸಮುಕ್ತ ಗ್ರಾಮ: ಪಂಚಾಯಿತಿ ಸದಸ್ಯರ ಪಣ

‘ಸೋಲದೇವನಹಳ್ಳಿ ಗ್ರಾಮವು ವಿಶ್ವಮಟ್ಟದಲ್ಲಿ ಗುರುತಿಸಿಕೊಂಡಿದೆ. ವಿಶ್ವದ ನಾನಾ ಭಾಗಗಳಿಂದ ವಿದ್ಯಾರ್ಥಿಗಳು ಅಚಾರ್ಯ ಕಾಲೇಜಿಗೆ ವ್ಯಾಸಂಗಕ್ಕೆ ಬರುತ್ತಾರೆ. ಅವರಲ್ಲಿ ಬಹುತೇಕ ವಿದ್ಯಾರ್ಥಿಗಳು ಸೋಲದೇವನಹಳ್ಳಿ ಗ್ರಾಮದಲ್ಲಿರುವ ಪಿ.ಜಿ.ಗಳಲ್ಲಿ ಉಳಿದುಕೊಳ್ಳುತ್ತಾರೆ. ಗ್ರಾಮದಲ್ಲಿನ ಕಸ ಕಂಡು ಬೇಸರ ವ್ಯಕ್ತಪಡಿಸುತ್ತಾರೆ. ಗ್ರಾಮವನ್ನು ಕಸಮುಕ್ತಗೊಳಿಸಲು ಆದ್ಯತೆ ನೀಡಲಾಗುವುದು’ ಎಂದು ವಾರ್ಡ್‌ ಸಂಖ್ಯೆ 1ರ ಸದಸ್ಯ ಬಿ.ಚಾಂದ್ ಪಾಷ ಹೇಳಿದರು.

‘ಕಸಘಟ್ಟಪುರ ಗ್ರಾಮ ಪಂಚಾಯಿತಿಗೆ ಸೋಲದೇವನಹಳ್ಳಿ ಗ್ರಾಮದಿಂದ ಹೆಚ್ಚಿನ ವರಮಾನ ಸಿಗುತ್ತಿದೆ. ಗ್ರಾಮವನ್ನು ಕಸಮುಕ್ತಗೊಳಿಸಲು ನಿರ್ಧರಿಸಿದ್ದು, ಈ ಬಗ್ಗೆ ಯೋಜನೆಯನ್ನೂ ರೂಪಿಸುತ್ತೇವೆ’ ಎಂದರು.

‘ಒಣ ಮತ್ತು ಹಸಿ ಕಸವನ್ನು ಬೇರ್ಪಡಿಸಿ ಕಸವನ್ನು ವಿಲೇವಾರಿ ಮಾಡಲು ವಾಹನವೊಂದರ ವ್ಯವಸ್ಥೆ ಮಾಡಿಕೊಳ್ಳುತ್ತಿದ್ದೇವೆ. ಪ್ರತಿ ಮನೆಗಳಿಂದ ಕಸವನ್ನು ಸಂಗ್ರಹಿಸಲಾಗುತ್ತದೆ. ತ್ಯಾಜ್ಯ ವಿಲೇವಾರಿ ಘಟಕವನ್ನು ಸ್ಥಾಪಿಸಲು ಜಾಗವನ್ನು ಗುರುತಿಸುತ್ತಿದ್ದೇವೆ. ಅಧ್ಯಕ್ಷರ ಆಯ್ಕೆಯಾದ ಕೂಡಲೇ, ಕಸಮುಕ್ತ ಗ್ರಾಮ ಯೋಜನೆಗೆ ಚಾಲನೆ ನೀಡಲಾಗುವುದು’ ಎಂದು ಎರಡನೇ ಬಾರಿ ಆಯ್ಕೆಯಾಗಿರುವ ಜಿ.ಸಂಧ್ಯಾ ತಿಳಿಸಿದರು.

ನೂತನ ಸದಸ್ಯರಾದ ಲಕ್ಷ್ಮಮ್ಮ, ಜಬೀನ್ ತಾಜ್, ಟಿ.ವೆಂಕಟೇಶ್ ಮೂರ್ತಿ ಕೂಡ ಈ ಕಸ ಮುಕ್ತ ಗ್ರಾಮ ಯೋಜನೆಗೆ ಕೈ ಜೋಡಿಸಿದ್ದಾರೆ.