ಲಾಲ್‌ಬಾಗ್‌ನಲ್ಲಿ ನಾಳೆಯಿಂದ ಸ್ವಾತಂತ್ರ್ಯೋತ್ಸವ ಫಲಪುಷ್ಪ ಪ್ರದರ್ಶನ

7
ಸ್ವಾಗತಕ್ಕೆ ಸಜ್ಜಾಗಿದೆ ‘ಇಂಡಿಯಾ ಗೇಟ್‌’

ಲಾಲ್‌ಬಾಗ್‌ನಲ್ಲಿ ನಾಳೆಯಿಂದ ಸ್ವಾತಂತ್ರ್ಯೋತ್ಸವ ಫಲಪುಷ್ಪ ಪ್ರದರ್ಶನ

Published:
Updated:

ಬೆಂಗಳೂರು: ಲಾಲ್‌ಬಾಗ್‌ನಲ್ಲಿ ಶನಿವಾರದಿಂದ ಇದೇ 15ರವರೆಗೆ ಸ್ವಾತಂತ್ರ್ಯೋತ್ಸವ ಫಲಪುಷ್ಪ ಪ್ರದರ್ಶನ ನಡೆಯಲಿದ್ದು, ‘ಭಾರತೀಯ ಸೇನಾ ಪಡೆಗಳಿಗೆ ಪುಷ್ಪ ನಮನ’ ಈ ಸಲದ ಪ್ರಮುಖ ಆಕರ್ಷಣೆಯಾಗಿದೆ.

ಮೂರೂ ಸೇನಾ ಪಡೆಗಳ ಬಗ್ಗೆ ಸಮಗ್ರ ನೋಟವನ್ನು ಕಟ್ಟಿಕೊಡಲು ತಂತ್ರಜ್ಞರು ಮತ್ತು ಕುಶಲಕರ್ಮಿಗಳು ಹಗಲಿರುಳು ಶ್ರಮಿಸುತ್ತಿದ್ದಾರೆ. ಭಾರತದ ಭೌಗೋಳಿಕ ವೈಶಿಷ್ಟ್ಯ ಮತ್ತು ಅಲ್ಲಿ ರಕ್ಷಣಾ ವ್ಯವಸ್ಥೆಯ ಕಾರ್ಯಾಚರಣೆಯನ್ನು ಬಿಂಬಿಸುವಂತೆ ಗಾಜಿನ ಮನೆಯನ್ನು ವಿನ್ಯಾಸ ಮಾಡಲಾಗುತ್ತಿದೆ.

 ಸಮುದ್ರ, ಮೈದಾನ ಪ್ರದೇಶ, ಮರುಭೂಮಿ ಮತ್ತು ಹಿಮಾಲಯ, ಸಿಯಾಚಿನ್‌ ಪ್ರದೇಶಗಳನ್ನು ಹೂವು, ಥರ್ಮೋಕೋಲ್‌, ಮರಳು, ಮಣ್ಣು ಮುಂತಾದ ಸಾಮಗ್ರಿಗಳನ್ನು ಬಳಸಿ ವಿನ್ಯಾಸ ಮಾಡಲಾಗುತ್ತಿದೆ.

ಗಾಜಿನ ಮನೆಯ ಒಳಭಾಗ, ಹೊರಭಾಗದಲ್ಲಿ ಸೇನಾ ಪಡೆ ಮತ್ತು ರಕ್ಷಣಾ ವ್ಯವಸ್ಥೆಗೆ ಸಂಬಂಧಿಸಿದ ಯುದ್ಧ ಸಾಮಗ್ರಿಗಳ ಮಾದರಿಗಳನ್ನೂ ಭತ್ತದ ಹುಲ್ಲು, ಥರ್ಮೋಕೋಲ್‌ ಮತ್ತು ಹೂವುಗಳಿಂದ ನಿರ್ಮಿಸಲಾಗುತ್ತಿದೆ.

‘ಎಲ್ಲಾ ವಿನ್ಯಾಸಗಳಿಗೆ 1.20 ಲಕ್ಷ ಹೂವುಗಳನ್ನು ಬಳಸಲಾಗುವುದು. ಪ್ರತಿ ನಾಲ್ಕು ದಿನಗಳಿಗೊಮ್ಮೆ ಹೂವುಗಳನ್ನು ಬದಲಾಯಿಸಲಾಗುವುದು. ಪ್ರದರ್ಶನದಲ್ಲಿ ಕನಿಷ್ಠ 7 ಲಕ್ಷ ಜನ ಪಾಲ್ಗೊಳ್ಳುವ ನಿರೀಕ್ಷೆ ಇದೆ’ ಎಂದು ತೋಟಗಾರಿಕಾ ಇಲಾಖೆಯ ನಿರ್ದೇಶಕ ವೈ.ಎಸ್. ಪಾಟೀಲ ಮಾಹಿತಿ ನೀಡಿದರು.

‘ಗಾಜಿನ ಮನೆಯ ಒಳಾಂಗಣದಲ್ಲಿ ಹೂವುಗಳು ಬಾಡದಂತೆ ಕಾಪಾಡುವ ಇಸ್ರೇಲ್‌ ತಂತ್ರಜ್ಞಾನ ಆಧಾರಿತ ಮಂಜಿನ ಸಿಂಚನ ಮಾಡಲಾಗುತ್ತದೆ’ ಎಂದು ಇಲಾಖೆಯ ಜಂಟಿ ನಿರ್ದೇಶಕ ಡಾ. ಎಂ. ಜಗದೀಶ್‌, ‘ಬ್ಯಾಂಡ್‌ ಸ್ಟ್ಯಾಂಡ್‌ನಲ್ಲಿ ಬಿಎಸ್‌ಎಫ್‌ ಮತ್ತು ಎಂಇಜಿ ಬ್ಯಾಂಡ್‌ಗಳ ಸಂಗೀತ ಈ ಸಲವೂ ಇರಲಿದೆ’ ಎಂದು ಹೇಳಿದರು. ‌

‘ಗಾಜಿನ ಮನೆಯ ಪ್ರವೇಶದ್ವಾರದ ಬಳಿ ಇಸ್ರೊ ನಿರ್ಮಿತ ಉಪಗ್ರಹ ಉಡಾವಣೆ ವಾಹನ ಮಾದರಿಗಳು ಹಾಗೂ ಯುದ್ಧ ಕ್ಷಿಪಣಿಗಳ ಮಾದರಿಗಳನ್ನು ಇಡಲಾಗುವುದು’ ಎಂದು ತಿಳಿಸಿದರು.

ಪಾರ್ಕಿಂಗ್‌ಗೆ ವಿಶೇಷ ವ್ಯವಸ್ಥೆ: ಲಾಲ್‌ಬಾಗ್‌ನ ನಾಲ್ಕೂ ಪ್ರವೇಶ ದ್ವಾರಗಳಲ್ಲಿ ವಾಹನ ಪ್ರವೇಶಕ್ಕೆ ನಿರ್ಬಂಧ ವಿಧಿಸಲಾಗಿದೆ. ಶಾಲಾ ಬಸ್‌ಗಳು, ವೃದ್ಧರು ಮತ್ತು ಅಂಗವಿಕಲರ ವಾಹನಗಳಿಗೆ ಮಾತ್ರ ಡಬಲ್‌ ರೋಡ್‌ ದ್ವಾರದಿಂದ ಪ್ರವೇಶ ಕಲ್ಪಿಸಲಾಗಿದೆ.  

ಬರುವ ವಾಹನಗಳನ್ನು ಮಯೂರ ರೆಸ್ಟೋರೆಂಟ್‌ ಬಳಿಯ ಬಿಬಿಎಂಪಿಯ ವಾಹನ ಪಾರ್ಕಿಂಗ್‌ ಕಾಂಪ್ಲೆಕ್ಸ್‌ನಲ್ಲಿಯೇಪಾರ್ಕಿಂಗ್‌ ಮಾಡಬೇಕು. ಪಶ್ಚಿಮ ದ್ವಾರ ಮತ್ತು ಅಲ್‌–ಅಮೀನ್‌ ಕಾಲೇಜು ಮೈದಾನದಲ್ಲಿ ದ್ವಿಚಕ್ರ ವಾಹನಗಳಿಗೆ ಮಾತ್ರ ಪಾರ್ಕಿಂಗ್‌ಗೆ ಅವಕಾಶ ಇದೆ.

ಮೆಟ್ರೊ ಬಳಸಲು ಮನವಿ: ‘ಲಾಲ್‌ಬಾಗ್‌ ಪಶ್ಚಿಮ ದ್ವಾರದ ಬಳಿ ಮೆಟ್ರೊ ರೈಲು ನಿಲ್ದಾಣ ಇದೆ. ಸಾರ್ವಜನಿಕರು ಮೆಟ್ರೊ ರೈಲು ಬಳಸಿ ಸಂಚಾರ ದಟ್ಟಣೆ, ಪಾರ್ಕಿಂಗ್‌ ಸಮಸ್ಯೆಗೆ ಪರಿಹಾರ ಕಂಡುಕೊಳ್ಳಬೇಕು’ ಎಂದು ಎಸಿಪಿ ಎಚ್.ಕೃಷ್ಣಮೂರ್ತಿ ಮನವಿ ಮಾಡಿದರು.

‘ಇಂಡಿಯಾ ಗೇಟ್‌’ನಲ್ಲಿ ಚಾಲನೆ

ಹೊಸದಿಲ್ಲಿಯ ಇಂಡಿಯಾ ಗೇಟ್‌ ಬಳಿಯಿರುವ ‘ಅಮರ್‌ ಜವಾನ್‌ ಜ್ಯೋತಿ’ ಯುದ್ಧ ಸ್ಮಾರಕದ ಮಾದರಿಯನ್ನು ಗಾಜಿನ ಮನೆಯ ಪ್ರವೇಶದ್ವಾರದ ಬಳಿ ನಿರ್ಮಿಸಲಾಗಿದೆ. ಆಗಸ್ಟ್‌ 4ರ ಬೆಳಿಗ್ಗೆ 10ಕ್ಕೆ ಮುಖ್ಯಮಂತ್ರಿ ಎಚ್‌.ಡಿ. ಕುಮಾರಸ್ವಾಮಿ ಪ್ರದರ್ಶನಕ್ಕೆ ಚಾಲನೆ ನೀಡಲಿದ್ದಾರೆ.

ಒಣಹೂವುಗಳ ಪ್ರದರ್ಶನ, ಸ್ಪರ್ಧೆ

ಇಕೆಬಾನ, ಥಾಯ್‌ ಪುಷ್ಪ ಜೋಡಣೆ ಕಲೆ, ತರಕಾರಿ ಕೆತ್ತನೆ, ಪುಷ್ಪಭಾರತಿ, ಬೊನ್ಸಾಯ್‌, ಹೂವಿನ ಜೋಡಣೆ, ಜಾನೂರು ಒಣಹೂವಿನ ಜೋಡಣೆ ಕಲೆಗಳ ಸ್ಪರ್ಧೆ ಮತ್ತು ಪ್ರದರ್ಶನ ಈ ಬಾರಿಯೂ ಇರಲಿದೆ.

ಡಾ. ಎಚ್.ಎಂ. ಮರಿಗೌಡ ಸ್ಮಾರಕ ಭವನದಲ್ಲಿ ಎಂದಿನಂತೆ ನಡೆಯುವ ಈ ಪ್ರದರ್ಶನಕ್ಕೆ ಸಚಿವೆ ಜಯಮಾಲಾ ಆಗಸ್ಟ್‌ 4ರ ಮಧ್ಯಾಹ್ನ ಚಾಲನೆ ನೀಡಲಿದ್ದಾರೆ. ಈ ಸ್ಪರ್ಧೆಗಳಲ್ಲಿ ವಿಜೇತರಿಗೆ ಬಹುಮಾನ ವಿತರಣೆ ಕಾರ್ಯಕ್ರಮ 13ರಂದು ನಡೆಯಲಿದೆ.

ಭದ್ರತೆಗೆ ಹೆಚ್ಚಿನ ಒತ್ತು

ಭದ್ರತೆಗೆ 150 ಸಿಬ್ಬಂದಿಯನ್ನು ನಿಯೋಜನೆ ಮಾಡಲಾಗಿದ್ದು, ಲಾಲ್‌ಬಾಗ್‌ನ ವಿವಿಧ ಭಾಗಗಳಲ್ಲಿ 100 ಸಿ.ಸಿ.ಟಿ.ವಿ. ಕ್ಯಾಮೆರಾಗಳನ್ನು ಅಳವಡಿಸಲಾಗಿದೆ. ಕಳೆದ ವರ್ಷ ಒಂದೇ ದಿನದಲ್ಲಿ 40 ಮೊಬೈಲ್‌ಗಳನ್ನು ಕಳ್ಳತನ ಮಾಡಿದ್ದ ಕಳ್ಳನನ್ನು ಸಿ.ಸಿ.ಟಿ.ವಿ. ಕ್ಯಾಮೆರಾ ನೆರವಿನಿಂದ ಪತ್ತೆ ಹಚ್ಚಲಾಗಿತ್ತು.  

ವಾರಾಂತ್ಯದ ಭೇಟಿ ತಪ್ಪಿಸಿ: ಆಗಸ್ಟ್‌ 4ರಿಂದ 15ರವರೆಗೆ ಒಟ್ಟು 12 ದಿನಗಳ ಪ್ರದರ್ಶನದಲ್ಲಿ ನಾಲ್ಕು ವಾರದ ರಜೆಗಳು ಬರುತ್ತವೆ. ಈ ರಜಾ ದಿನಗಳು ಮತ್ತು ವಿಶೇಷವಾಗಿ ಕೊನೆಯ ದಿನ ಅತ್ಯಧಿಕ ಜನಸಂದಣಿ ಇರುತ್ತದೆ. ವಾರದ ಮೊದಲ ಐದು ದಿನಗಳಲ್ಲಿ ಬಂದರೆ ಪ್ರದರ್ಶನವನ್ನು ವಿವರವಾಗಿ ನೋಡಬಹುದು.  ಪ್ರತಿದಿನ ಬೆಳಿಗ್ಗೆ 9ರಿಂದ ಸಂಜೆ 6ರವರೆಗೆ ಪ್ರವೇಶಕ್ಕೆ ಅವಕಾಶ. ಆದರೆ ರಾತ್ರಿ 7ಕ್ಕೆ ವಿದ್ಯುದ್ದೀಪ ಸಂಪರ್ಕವನ್ನು ಕಡಿತಗೊಳಿಸುವ ಕಾರಣ ಸಂಜೆ 5ರೊಳಗೆ ಗಾಜಿನಮನೆ ಪ್ರವೇಶಿಸುವುದು ಸೂಕ್ತ.

ಪ್ಲಾಸ್ಟಿಕ್‌ ನಿಷೇಧ: ಪ್ರದರ್ಶನದ ವೇಳೆ ಲಾಲ್‌ಬಾಗ್‌ನಲ್ಲಿ ಪ್ಲಾಸ್ಟಿಕ್‌ ನಿಷೇಧ ಜಾರಿಯಲ್ಲಿರುತ್ತದೆ. ಅಲ್ಲದೆ, ನಾಲ್ಕೂ ಪ್ರವೇಶ ದ್ವಾರಗಳ ಬಳಿ ‘ಕ್ಲಾಕ್‌ ರೂಮ್‌’ಗಳಲ್ಲಿ ಲಗೇಜು ಇರಿಸಲು ಅವಕಾಶವಿರುತ್ತದೆ.

ಪ್ರವೇಶ ಶುಲ್ಕ ಹೀಗಿದೆ

* ವಿದ್ಯಾರ್ಥಿಗಳು ಮತ್ತು ಶಾಲಾ ಬಸ್‌ಗಳಿಗೆ ಪ್ರವೇಶ ಉಚಿತ

* ದೊಡ್ಡವರಿಗೆ ₹ 70

* 12 ವರ್ಷದೊಳಗಿನ ಮಕ್ಕಳಿಗೆ ₹20

ಈ ಬಾರಿ 87 ಬಗೆಯ ಹೂಗಳ ಬಳಕೆ

* 12 ದಿನಗಳ ಪ್ರದರ್ಶನದಲ್ಲಿ ಮೂರು ಬಾರಿ ಹೂಗಳ ಬದಲಾವಣೆ

* ಐದು ಕಡೆ ಸ್ತನ್ಯಪಾನ ಕೊಠಡಿ

* ಆಂಬುಲೆನ್ಸ್‌ ಮತ್ತು ಮಿನಿ ಆಸ್ಪತ್ರೆ ಸೌಲಭ್ಯ

ಬರಹ ಇಷ್ಟವಾಯಿತೆ?

  • 15

    Happy
  • 0

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !