ಬೆಂಗಳೂರು ಮೆಟ್ರೊ: ಹಸಿರು ಮಾರ್ಗದಲ್ಲಿ ಸಂಚಾರ ಆರಂಭ

ಯಲಚೇನಹಳ್ಳಿ ಮೆಟ್ರೊ ನಿಲ್ದಾಣದಿಂದ ಬುಧವಾರ ಬೆಳಿಗ್ಗೆ 8ಗಂಟೆಗೆ ಮೊದಲ ರೈಲು ನಾಗಸಂದ್ರಕ್ಕೆ ಸಾಗಿತು. ಈ ಮಾರ್ಗದಲ್ಲಿಯೂ ಪ್ರಯಾಣಿಕರ ಸಂಖ್ಯೆ ಬೆರಳೆಣಿಕೆಯಷ್ಟಿತ್ತು. ಬೆಳಿಗ್ಗೆ 11ರವರೆಗೆ ರೈಲುಗಳು ಸಂಚರಿಸಿದವು. ಬುಧವಾರ 96 ಬಾರಿ ಈ ಮಾರ್ಗದಲ್ಲಿ ರೈಲುಗಳು ಸಂಚರಿಸಲಿವೆ.

ನೇರಳೆ ಮಾರ್ಗದಲ್ಲಿ ಮೊದಲ ದಿನ 91 ಬಾರಿ ಸಂಚರಿಸಿದ್ದ ರೈಲುಗಳಲ್ಲಿ, 3,770 ಪ್ರಯಾಣಿಕರು ಸಂಚರಿಸಿದ್ದರು. ಈಗ ಹಸಿರು ಮತ್ತು ನೇರಳೆ ಮಾರ್ಗಗಳೆರಡರಲ್ಲೂ ಸಂಚಾರ ಆರಂಭವಾಗಿರುವುದರಿಂದ ಪ್ರಯಾಣಿಕರ ಸಂಖ್ಯೆ ಸ್ವಲ್ಪ ಹೆಚ್ಚುವ ಸಾಧ್ಯತೆ ಇದೆ.

ದಟ್ಟಣೆ ಮತ್ತು ಮಾನವ ಸಂಪರ್ಕ ತಡೆಗಟ್ಟುವ ಉದ್ದೇಶದಿಂದ ನಿಲ್ದಾಣಗಳಲ್ಲಿ ಟೋಕನ್‌ ವಿತರಿಸುತ್ತಿಲ್ಲ. ಹೊಸ ಸ್ಮಾರ್ಟ್‌ಕಾರ್ಡ್‌ ಪಡೆದು ಅಥವಾ ಹಳೆಯ ಸ್ಮಾರ್ಟ್‌ಕಾರ್ಡ್‌ ರಿಚಾರ್ಜ್‌ ಮಾಡಿ ಮೆಟ್ರೊ ರೈಲಿನಲ್ಲಿ ಪ್ರಯಾಣಿಸಬಹುದಾಗಿದೆ.

ಸದ್ಯ ಬೆಳಿಗ್ಗೆ 3 ತಾಸು ಮತ್ತು ಸಂಜೆ ಮೂರು ಗಂಟೆ ಮಾತ್ರ ರೈಲುಗಳು ಸಂಚರಿಸಲಿವೆ. ಸೆ.11ರಿಂದ ಎರಡೂ ಮಾರ್ಗದಲ್ಲಿ ಬೆಳಿಗ್ಗೆ 7ರಿಂದ ರಾತ್ರಿ 9ರವರೆಗೆ ರೈಲುಗಳ ಸೇವೆ ಲಭ್ಯವಾಗಲಿದೆ.