ಹೊಸ ವರ್ಷ: ರಾತ್ರಿ 1.30ರವರೆಗೆ ಮೆಟ್ರೊ ಸೇವೆ

‘ಸೋಮವಾರ ರಾತ್ರಿ 11 ಗಂಟೆಯ ಬಳಿಕ 1.30ರವರೆಗೆ ಪ್ರತಿ 15 ನಿಮಿಷಗಳಿಗೊಂದು ಮೆಟ್ರೊ ಲಭ್ಯ ಇರುತ್ತದೆ. ಮೆಜೆಸ್ಟಿಕ್‌ನ ನಾಡಪ್ರಭು ಕೆಂಪೇಗೌಡ ನಿಲ್ದಾಣದಿಂದ ಅಂದು ರಾತ್ರಿ 2 ಗಂಟೆಗೆ ಕೊನೆಯ ರೈಲುಗಳು ಹೊರಡಲಿವೆ’ ಎಂದು ಬಿಎಂಆರ್‌ಸಿಎಲ್‌ ವ್ಯವಸ್ಥಾಪಕ ನಿರ್ದೇಶಕ ಅಜಯ್‌ ಸೇಠ್‌ ತಿಳಿಸಿದರು.

‘ವಿಸ್ತರಿಸಿದ ಅವಧಿಯಲ್ಲಿ ಅಂದು ಕಬ್ಬನ್‌ ಉದ್ಯಾನ ಮತ್ತು ಎಂ.ಜಿ.ರಸ್ತೆ ನಿಲ್ದಾಣಗಳಲ್ಲಿ ಟೋಕನ್‌ಗಳ ಬದಲು ₹ 50ರ ಟಿಕೆಟ್‌ (ಕಾಗದದ್ದು) ಮಾತ್ರ ನೀಡಲಾಗುತ್ತದೆ. ಈ ಕಾಗದದ ಟಿಕೆಟ್‌ ಖರೀದಿಸಿದವರು ಯಾವುದೇ ನಿಲ್ದಾಣಕ್ಕೂ ಪ್ರಯಾಣಿಸಬಹುದು. ಎಂ.ಜಿ.ರಸ್ತೆ ಹಾಗೂ ಕಬ್ಬನ್‌ ರಸ್ತೆಯಿಂದ ಪ್ರಯಾಣಿಸಲು ಯಾವುದೇ ನಿಲ್ದಾಣದಿಂದಲೂ ರಾತ್ರಿ 8ರ ಬಳಿಕ ಕಾಗದದ ಟಿಕೆಟ್‌ ಖರೀದಿಸಬಹುದು. ನಿಲ್ದಾಣಗಳಲ್ಲಿ ನೂಕುನುಗ್ಗಲು ತಪ್ಪಿಸಲು ಈ ವ್ಯವಸ್ಥೆ ಕಲ್ಪಿಸಲಾಗಿದೆ’ ಎಂದರು.

‘ಸ್ಮಾರ್ಟ್‌ ಕಾರ್ಡ್‌ ಹೊಂದಿರುವ ಪ್ರಯಾಣಿಕರು ವಿಸ್ತರಿಸಿದ ಅವಧಿಯಲ್ಲೂ ಎಂದಿನಂತೆಯೇ ಪ್ರಯಾಣಿಸಬಹುದು. ಅವರಿಗೆ ಸಾಮಾನ್ಯ ದರವೇ ಅನ್ವಯವಾಗುತ್ತದೆ’ ಎಂದರು.

ಇದನ್ನೂ ಓದಿ...
ಎಂ.ಜಿ ರಸ್ತೆ–ಟ್ರಿನಿಟಿ ನಡುವೆ ಚಲಿಸುವುದಿಲ್ಲ ಮೆಟ್ರೊ