ಬೆಂಗಳೂರು | ‘ಪಫ್ಸ್’ ಗಲಾಟೆ: ಬೇಕರಿಗೆ ನುಗ್ಗಿದ್ದವರ ಬಂಧನ

‘ಆಟೊ ಚಾಲಕರಾದ ಬಸವರಾಜ್ (33) ಹಾಗೂ ಭರತ್ (25) ಬಂಧಿತರು. ಕೃತ್ಯದಲ್ಲಿ ಭಾಗಿಯಾಗಿದ್ದ ಇನ್ನಿಬ್ಬರು ಆರೋಪಿಗಳು ತಲೆಮರೆಸಿಕೊಂಡಿದ್ದಾರೆ’ ಎಂದು ಪೊಲೀಸರು ಹೇಳಿದರು.

‘ಆರೋಪಿಯೊಬ್ಬ ಇತ್ತೀಚೆಗೆ ಬೇಕರಿಗೆ ಹೋಗಿದ್ದ. ಪಫ್ಸ್ ಖರೀದಿ ವಿಚಾರವಾಗಿ ಮಾಲೀಕನ ಜೊತೆ ಗಲಾಟೆ ಮಾಡಿದ್ದ. ಪರಿಸ್ಥಿತಿ ವಿಕೋಪಕ್ಕೆ ತಿರುಗಿತ್ತು. ಆರೋಪಿ ಹಾಗೂ ಮಾಲೀಕ, ಪರಸ್ಪರ ಬೈದಾಡಿಕೊಂಡಿದ್ದರು.’

‘ಕೋಪದಲ್ಲಿ ಹೊರಟು ಹೋಗಿದ್ದ ಆರೋಪಿ, ಆಗಸ್ಟ್ 16ರಂದು ತನ್ನ ಸ್ನೇಹಿತರ ಜೊತೆ ಬೇಕರಿಗೆ ಬಂದು ಗಲಾಟೆ ಮಾಡಿದ್ದ. ಎಲ್ಲ ಆರೋಪಿಗಳು ಸೇರಿ, ಬೇಕರಿ ಮಾಲೀಕ ಚಂದ್ರಶೇಖರ್ ಅವರನ್ನು ಅವಾಚ್ಯ ಶಬ್ದಗಳಿಂದ ನಿಂದಿಸಿ ಜೀವ ಬೆದರಿಕೆಯೊಡ್ಡಿದ್ದರು. ಬೇಕರಿ ವಸ್ತುಗಳನ್ನು ಚಿಲ್ಲಾಪಿಲ್ಲಿ ಮಾಡಿದ್ದರು. ಕಬ್ಬಿಣದ ರಾಡ್‌ನಿಂದ ಬೇಕರಿ ಗಾಜಿನ ವಸ್ತುಗಳನ್ನು ಒಡೆದಿದ್ದರು’ ಎಂದು ತಿಳಿಸಿದರು.