ಖಾಸಗಿ ಕೃಷಿ ಕಾಲೇಜು: ಅನುಮತಿಗೆ ವಿರೋಧ

7
ಕೃಷಿ ಮತ್ತು ತೋಟಗಾರಿಕೆ ವಿವಿ ವಿದ್ಯಾರ್ಥಿಗಳಿಂದ ಪ್ರತಿಭಟನೆ

ಖಾಸಗಿ ಕೃಷಿ ಕಾಲೇಜು: ಅನುಮತಿಗೆ ವಿರೋಧ

Published:
Updated:

ಬೆಂಗಳೂರು: ಕೃಷಿ ವಿಶ್ವವಿದ್ಯಾಲಯ ಕಾಯ್ದೆಗೆ ತಿದ್ದುಪಡಿ ತಂದು ಖಾಸಗಿ ಕೃಷಿ ಕಾಲೇಜು ಸ್ಥಾಪನೆಗೆ ಅನುಮತಿ ನೀಡುವುದನ್ನು ತಡೆಯಬೇಕು ಸೇರಿದಂತೆ ವಿವಿಧ ಬೇಡಿಕೆ ಈಡೇರಿಕೆಗೆ ಆಗ್ರಹಿಸಿ ರಾಜ್ಯದ ಕೃಷಿ ಮತ್ತು ತೋಟಗಾರಿಕೆ ವಿಶ್ವವಿದ್ಯಾಲಯಗಳ ವಿದ್ಯಾರ್ಥಿಗಳು ನಗರದಲ್ಲಿ ಮಂಗಳ ವಾರ ಪ್ರತಿಭಟನೆ ನಡೆಸಿದರು.

ಪುರಭವನ ಬಳಿ ಜಮಾಯಿಸಿದ ವಿದ್ಯಾರ್ಥಿಗಳು ಸ್ವಾತಂತ್ರ್ಯಉದ್ಯಾನದವರೆಗೆ ಮೆರವಣಿಗೆ ನಡೆಸಿದರು. ‘ರೈತರ ಮಕ್ಕಳಿಗೆ ಕಣ್ಣೀರು, ಖಾಸಗಿ ಸಂಸ್ಥೆಗಳಿಗೆ ಪನ್ನೀರು’, ‘ಖಾಸಗಿ ಶಿಕ್ಷಣ ಅಳಿಸಿ, ಕೃಷಿ ಶಿಕ್ಷಣ ಉಳಿಸಿ’, ‘ನ್ಯಾಯದ ಕಡೆ ನಡೆ ಇರಲಿ. ಅನ್ಯಾಯಕ್ಕೆ ತಡೆ ಇರಲಿ’, ಎಂದು ಬರೆದ ಫಲಕಗಳನ್ನು ಹಿಡಿದು ಸಾಗಿದರು.

ದೊಡ್ಡಬಳ್ಳಾಪುರದ ರೈಟೆಕ್‌ ವಿಶ್ವವಿದ್ಯಾಲಯವನ್ನು ಮುಚ್ಚಬೇಕು ಮತ್ತು ಅದರ ಆಡಳಿತ ಮಂಡಳಿ ವಿರುದ್ಧ ಕಾನೂನು ಕ್ರಮ ಕೈಗೊಳ್ಳಬೇಕು ಎಂದು ಪ್ರತಿಭಟನಾಕಾರರು ಆಗ್ರಹಿಸಿದರು.

ಕೃಷಿ, ಕೃಷಿ ಎಂಜಿನಿಯರಿಂಗ್‌, ಕೃಷಿ ಮಾರುಕಟ್ಟೆ, ಅರಣ್ಯ ವಿಜ್ಞಾನ, ಆಹಾರ ವಿ‌ಜ್ಞಾನ, ಕೃಷಿ ಜೈವಿಕ ತಂತ್ರಜ್ಞಾನ ಮತ್ತು ರೇಷ್ಮೆ ಕೃಷಿ ಪದವೀಧರರಿಗೆ ಸೂಕ್ತ ಹುದ್ದೆಗಳನ್ನು ಸೃಷ್ಟಿಸಬೇಕು, ಕೃಷಿ, ತೋಟಗಾರಿಕೆ ವಿಶ್ವವಿದ್ಯಾಲಯಗಳಲ್ಲಿ ಖಾಲಿಯಿರುವ ಬೋಧಕ ಮತ್ತು ಬೋಧಕೇತರ ಹುದ್ದೆಗಳನ್ನು ತುಂಬಬೇಕು ಎಂದು ಆಗ್ರಹಿಸಿದರು.

ದೊಡ್ಡಬಳ್ಳಾಪುರದ ರೈಟೆಕ್‌ ವಿಶ್ವವಿದ್ಯಾಲಯವು ಭಾರತೀಯ ಕೃಷಿ ಸಂಶೋಧನಾ ಮಂಡಳಿ(ಐ.ಸಿ. ಎ.ಆರ್‌) ಮತ್ತು ಕೃಷಿ ವಿವಿಗಳ ಮಾನ್ಯತೆ ಪಡೆಯದೆ ನೀಡುತ್ತಿರುವ ಕೃಷಿ ಪದವಿಗಳು ಕೃಷಿ ಇಲಾಖೆಯ ಹುದ್ದೆಗಳಿಗೆ ಅರ್ಜಿ ಸಲ್ಲಿಸಲು ಅನರ್ಹವಾಗಿವೆ. ಈ ಬಗ್ಗೆ ವಿದ್ಯಾರ್ಥಿಗಳ ಪೋಷಕರು ಸಂಬಂಧಿಸಿದ ಇಲಾಖೆಗೆ ದೂರು ನೀಡಿದ್ದಾರೆ. ಆದ್ದರಿಂದ ಕಾನೂನುಬಾಹಿರ ಪದವಿಗಳನ್ನು ನೀಡುತ್ತಿರುವ ರೈಟೆಕ್‌ ವಿವಿಯ ವಿರುದ್ಧ ಕ್ರಮಕೈಗೊಳ್ಳಬೇಕು ಎಂದು ಪ್ರತಿಭಟನಾಕಾರರು ಒತ್ತಾಯಿಸಿದರು.

ಬೆಂಗಳೂರು, ಧಾರವಾಡ, ರಾಯಚೂರು, ಶಿವಮೊಗ್ಗ, ಬಾಗಲಕೋಟೆಯ ಕೃಷಿ ಮತ್ತು ತೋಟಗಾರಿಕೆ ವಿಶ್ವವಿದ್ಯಾಲಯದ ವಿದ್ಯಾರ್ಥಿಗಳು ಪ್ರತಿಭಟನೆಯಲ್ಲಿ ಪಾಲ್ಗೊಂಡಿದ್ದರು.

ಕಾಯ್ದೆಗೆ ತಿದ್ದುಪಡಿ: ಭರವಸೆ 

ಟೌನ್‌ಹಾಲ್‌ ಮಾರ್ಗವಾಗಿ ಪ್ರೆಸ್‌ಕ್ಲಬ್‌ಗೆ ಹೊರಟಿದ್ದ ಮುಖ್ಯಮಂತ್ರಿ ಕುಮಾರಸ್ವಾಮಿ ಅವರು ಕಾರು ನಿಲ್ಲಿಸಿ ವಿದ್ಯಾರ್ಥಿಗಳ ಅಹವಾಲು ಆಲಿಸಿದರು.

ಅವರು ಕಾರಿನಿಂದ ಇಳಿದು ಬಂದಾಗ ವಿದ್ಯಾರ್ಥಿಗಳ ಪ್ರತಿಭಟನೆ ಕೈಜೋಡಿಸಿದ ನಟ ಚೇತನ್‌ ಅವರು ಬೇಡಿಕೆಗಳ ಬಗ್ಗೆ ಹೇಳಲು ಬಂದಾಗ ಸಿಎಂ ಭದ್ರತಾ ಸಿಬ್ಬಂದಿ ನಟನನ್ನು ತಡೆದರು.

ಆಗ ಮುಖ್ಯಮಂತ್ರಿಯವರು ‘ಬಿಡಿ ಅವರು ನಮ್ಮವರೇ’ ಎಂದು ಸಿಎಂ ಭದ್ರತಾ ಸಿಬ್ಬಂದಿಗೆ ತಿಳಿಸಿ, ಚೇತನ್‌ ಅವರಿಂದ ಅಹವಾಲು ಆಲಿಸಿದರು.

ಸಭೆ: ಸಂಜೆ 4 ಗಂಟೆಗೆ ಮುಖ್ಯಮಂತ್ರಿಯವರು ‘ಕೃಷ್ಣಾ‘ದಲ್ಲಿ  ಕೃಷಿ ಸಚಿವರು, ಹಿರಿಯ ಅಧಿಕಾರಿಗಳು ಹಾಗೂ ವಿದ್ಯಾರ್ಥಿ ಮುಖಂಡರೊಂದಿಗೆ ಸಭೆ ನಡೆಸಿದರು.

ಯಾವುದೇ ಖಾಸಗಿ ಕೃಷಿ ಕಾಲೇಜಿಗೆ ಅನುಮತಿ ನೀಡಿಲ್ಲ. ಆ ಬಗ್ಗೆ ಯಾವುದೇ ಆತಂಕ ಬೇಡ, ವಿಧಾಸನಭೆ ಅಧಿವೇಶನದಲ್ಲಿ ಕೃಷಿ ವಿಶ್ವವಿದ್ಯಾಲಯ ಕಾಯ್ದೆಗೆ ತಿದ್ದುಪಡಿ ತರುವುದಾಗಿ ವಿದ್ಯಾರ್ಥಿಗಳಿಗೆ ಭರವಸೆ ನೀಡಿದರು ಎಂದು ಮೂಲಗಳು ತಿಳಿಸಿವೆ.

ಬರಹ ಇಷ್ಟವಾಯಿತೆ?

  • 1

    Happy
  • 0

    Amused
  • 0

    Sad
  • 1

    Frustrated
  • 1

    Angry

Comments:

0 comments

Write the first review for this !