ಚೌಕಾಕಾರದ ಹಾಸುಗಲ್ಲುಗಳು (ಜಾಯಿಂಟ್ ಲಾಕ್) ಕೆಲವೆಡೆ ಮೇಲಕ್ಕೆದ್ದು ಬಂದಿವೆ. ಇನ್ನು ಕೆಲವೆಡೆ ಅವು ಒಂದೂವರೆ ಅಡಿಯಷ್ಟು ಆಳಕ್ಕೆ ಕುಸಿದು ಗುಂಡಿಗಳು ನಿರ್ಮಾಣವಾಗಿವೆ. ಇನ್ನೂ ಕೆಲವೆಡೆ ಹಾಸುಗಲ್ಲುಗಳೇ ಇಲ್ಲವಾಗಿದ್ದು, ಕೆಸರು ತುಂಬಿಕೊಂಡಿದೆ. ಅಲ್ಲಲ್ಲಿ ಸಿಮೆಂಟ್ ಉದುರಿ ಬಿದ್ದಿದ್ದರೆ, ಬೊಲ್ಲಾರ್ಡ್ಗಳಿಗೂ ಸಿಮೆಂಟ್ ಮೆತ್ತಿಕೊಂಡಿದೆ. ಒಂದೆರಡು ಕಡೆ ಹೊಂಡಗಳೇ ನಿರ್ಮಾಣವಾಗಿದ್ದು, ಅದನ್ನು ದಾಟಿಕೊಂಡು ಜನ ಓಡಾಡಬೇಕಾದ ಸ್ಥಿತಿ ಇದೆ.