ಥಣಿಸಂದ್ರ: ಗಬ್ಬೆದ್ದು ನಾರುತ್ತಿರುವ ಕಸದ ರಾಶಿ

ಬೆಂಗಳೂರು: ರಸ್ತೆ ಬದಿಯಲ್ಲೇ ಸುರಿದಿರುವ ಕಸ. ಮೂಗು ಮುಚ್ಚಿಕೊಂಡೇ ಸಾಗಬೇಕಾದ ಸ್ಥಿತಿ. ಇದನ್ನು ದಾಟಿ ಹೋದರೆ ಪಾದಚಾರಿ ಮಾರ್ಗ, ರಸ್ತೆಯಲ್ಲೇ ತರಕಾರಿ ಅಂಗಡಿಗಳು. ಸಾಲದು ಎಂಬಂತೆ ಅಡ್ಡಾದಿಡ್ಡಿ ಅಡ್ಡಾಡುವ ಬೀಡಾಡಿ ದನಗಳು. 

ಥಣಿಸಂದ್ರ ಮುಖ್ಯರಸ್ತೆಯಲ್ಲಿನ ಅಧ್ವಾನ ಸ್ಥಿತಿ ಇದು. ಇದೇ ರಸ್ತೆಯಲ್ಲೇ ಇರುವ ಕಾಲೇಜುಗಳ ವಿದ್ಯಾರ್ಥಿಗಳು ರಸ್ತೆಯಲ್ಲೇ ವಾಹನ ನಿಲುಗಡೆ ಮಾಡುತ್ತಿದ್ದಾರೆ. ನಾಗವಾರದವರೆಗೂ ಇದೇ ರೀತಿಯ ಹಲವು ಸಮಸ್ಯೆಗಳಿದ್ದು, ಬಿಬಿಎಂಪಿಯಾಗಲಿ, ಸಂಚಾರ ವಿಭಾಗದ ಪೊಲೀಸರಾಗಲಿ ಯಾವುದೇ ಕ್ರಮ ಕೈಗೊಳ್ಳುತ್ತಿಲ್ಲ ಎಂಬುದು ಸ್ಥಳೀಯರ ದೂರು.

ಕಸ ವಿಲೇವಾರಿಯನ್ನು ಮಾಡದೇ ಇರುವುದರಿಂದ ಸಂಪಿಗೆಹಳ್ಳಿ ಎಸಿಪಿ ಕಚೇರಿ, ಸಂಪಿಗೆಹಳ್ಳಿ ಪೊಲೀಸ್‌ ಠಾಣೆ, ಇಂದಿರಾ ಕ್ಯಾಂಟೀನ್‌, ರಾಷ್ಟ್ರೋತ್ಥಾನ ವಿದ್ಯಾಸಂಸ್ಥೆ, ಚಿಕ್ಕಜಾಲ ಸಂಚಾರ ಪೊಲೀಸ್ ಠಾಣೆಗಳ ಸಮೀಪ, ಥಣಿಸಂದ್ರ ರೈಲ್ವೆ ಸೇತುವೆ, ಅಶ್ವತ್ಥನಗರ ಬಸ್‌ ನಿಲ್ದಾಣ, ಸಾರಾಯಿಪಾಳ್ಯ ಬಸ್‌ ನಿಲ್ದಾಣ, ಪೆಟ್ರೋಲ್‌ ಬಂಕ್‌, ಮಾಲ್‌ಗಳ ಮುಂಭಾಗ ಹೀಗೆ ಎಲ್ಲ ಕಡೆ ಕಸ ಎಸೆಯಲಾಗುತ್ತಿದೆ. ಮಳೆ ನೀರಿಗೆ ತ್ಯಾಜ್ಯ ಕೊಳೆತು ನಾರುತ್ತಿದೆ. ಇನ್ನು ಕೆಲವು ಕಡೆ ತ್ಯಾಜ್ಯಕ್ಕೆ ಬೆಂಕಿ ಹಚ್ಚಿ ವಾಯು ಮಾಲಿನ್ಯ ಉಂಟು ಮಾಡಲಾಗುತ್ತಿದೆ.

ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣಕ್ಕೆ ಸಂಪರ್ಕ ಕಲ್ಪಿಸಲು ಇರುವ ಪರ್ಯಾಯ ರಸ್ತೆ ಇದಾಗಿದ್ದು, ಕೆಲವು ಕಡೆಗಳಲ್ಲಿ ಪಾದಚಾರಿ ಮಾರ್ಗ ಸುಸ್ಥಿತಿಯಲ್ಲಿಲ್ಲ. ಪಾದಚಾರಿ ಮಾರ್ಗ ಚೆನ್ನಾಗಿರುವ ಕಡೆಗಳಲ್ಲಿ ಹಣ್ಣು, ತರಕಾರಿ ಇನ್ನಿತರ ಅಂಗಡಿಗಳು ಆಕ್ರಮಿಸಿಕೊಂಡಿವೆ. ಜನರು ಅಪಾಯ ಲೆಕ್ಕಿಸದೇ ರಸ್ತೆಗೆ ಇಳಿದು ಸಂಚರಿಸು ವಂತಾಗಿದೆ. ಇಷ್ಟು ಸಾಲದು ಎಂಬಂತೆ ಕೆಲವು ತಳ್ಳುಗಾಡಿಗಳನ್ನು ಪಾದಚಾರಿ ಮಾರ್ಗಕ್ಕಿಂತಲೂ ಮುಂದೆ ತಂದು ರಸ್ತೆಯಲ್ಲೇ ವ್ಯಾಪಾರ ಮಾಡಲಾಗುತ್ತಿದೆ.

‘ಕೆಲವು ಕಡೆಗಳಲ್ಲಿ ರಾತ್ರಿ ಹೊತ್ತಿನಲ್ಲಿ ಸದ್ದಿಲ್ಲದೇ ಬಂದು ಕಸ ಬಿಸಾಡಿ ಹೋಗುತ್ತಾರೆ. ಸಾರಾಯಿಪಾಳ್ಯದಲ್ಲಿ‌ ಕಾನೂನಿನ ಯಾವುದೇ ಹೆದರಿಕೆ ಇಲ್ಲದೇ ಹಗಲು ಹೊತ್ತಿನಲ್ಲಿಯೇ ಬೈಕ್‌, ಕಾರುಗಳಲ್ಲಿ ಬಂದು ವಾಹನ ನಿಲ್ಲಿಸದೆಯೇ ಕಸ ಎಸೆದು ಹೋಗುತ್ತಾರೆ. ಇದರಿಂದ ಕೆಲವು ಬಾರಿ ರಸ್ತೆ ಮೇಲೆಯೇ ಕಸ ಬೀಳುತ್ತದೆ. ಆಹಾರ ಸಿಗಬಹುದು ಎಂದು ದನಗಳು ರಸ್ತೆಯಲ್ಲೇ ನಿಂತುಕೊಂಡು ಕಸ ಕೆದಕಿ ತಿನ್ನುತ್ತಿರುತ್ತ ವೆ. ಹಲವು ಬಾರಿ ಈ ಕಾರಣಕ್ಕೆ ಸಂಚಾರ ದಟ್ಟಣೆ ಆಗುತ್ತಿದೆ’ ಎಂದು ಸ್ಥಳೀಯ ವರ್ತಕರು ದೂರಿದರು.

‘ರಸ್ತೆಯಲ್ಲಿನ ಕಸ ಗುಡಿಸುವ ಯಂತ್ರ ಇದೆ. ಐದಾರು ತಿಂಗಳುಗಳಿಂದ ಇಲ್ಲಿಗೆ ಬಂದಿರಲಿಲ್ಲ. ದೂರು ನೀಡಿದ ಮೇಲೆ ಅಪರೂಪಕ್ಕೊಮ್ಮೆ ರಸ್ತೆ ಸ್ವಚ್ಛಗೊಳಿಸಲಾಗುತ್ತಿದೆ. ತ್ಯಾಜ್ಯ ಒಯ್ಯುವವರು ಎಲ್ಲಿ ಗುಜರಿ ವಸ್ತುಗಳು ಹೆಚ್ಚಿರುತ್ತವೆಯೋ ಅಲ್ಲಿ ಹೋಗುತ್ತಾರೆ. ಅವರಿಗೆ ಮಾರಾಟಕ್ಕೆ ಏನೂ ಸಿಗದ ಬರೀ ಹಸಿಕಸ ಇದ್ದಲ್ಲಿಗೆ ಬರುವುದೇ ಇಲ್ಲ’ ಎಂದು ಸ್ಥಳೀಯರು ಅಸಮಾಧಾನ ವ್ಯಕ್ತಪಡಿಸಿದರು.